يعني ركَّبُونا؟

بابكر سلك

*يقولون إنَّ المريخ أنهي عقده مع البلوشي بالتراضي
*والبلوشي هو أحد الانتدابات الفاتت
*ومعاهو أوجو برضو
*أودجو برضك أنهينا تعاقدنا معاهو بالتراضي
*وغيرهما كُثر
*دفعتهما فيهم واحدين أنهينا تعاقدنا معاهم قبل يدقوها معانا
*والسؤال
*تراضي ليه؟
*ماكان في فرصة تسويق تعوضنا ماديًا شوية؟؟؟
*أم أن جميع تلك الانتدابات لا تصْلُح للتسويق؟؟؟
*زول بدفع في واحد منهم قرش ما في
*يعني انتداباتنا الفاتت كانت تركيب
*ركَّبُونا مواسير وقعدوا
*وإذا ما كدة
*تبقي في دقسة إدارية تتمثل في عدم تسويقهم والاكتفاء بإنهاء العقد بالتراضي
*وأري إنو ما  في داعي للهرولة لفلك الارتباط بإنهاء العقد بالتراضي
*طالما كانت في (رقشة) في الذين انتدبناهم في الانتدابات الفاتت
*لذا تعصرنا الحيرة
*ونسأل
*هل كانت الدقسة في انتدابهم
*ام كانت الدقسة في التراضي عند إنهاء تعاقداتهم
*وفي الحالتين انا الداقس
*المهم
*الصبر مفتاح الفرج
*بس الصبر فوق راي
*ما الصبر ساي
*أيُّها الناس
*علم من بيارق كرة القدم
*قمة في التهذيب والأدب والتأدب
*رجل وضع بصمتو إنجازا علي صحائف الإنجاز الكروي في بلادي
*موهبة تكرارها ضرب من ضروب الخيال واللَّاممكن
*رحل عنا في موسم الهجرة لله
*موسم رحلنا فيه فُرادَي وجماعات فدا لوطن يستحق ذلك
*حزن أصاب الجرح النازف فينا
*رحل دكتور حيدر
*أو قل رحل علي قاقرين
*ذلك الرمح الذي اشتعل أهدافا في شباك المنتخبات التي نازلَتنا
*رحل وترك لنا صفحة مُشرَقة عن إبداعات كرة القدم السُّودانية
*وعن تفرُّدها وتجرُّدها وريادَتِها
*صفحة مليانة موهبة بتواضع وأدب وتأدُّب
*رشحناه من قبل لمنصب وزير الرياضة الاتحادي
*لأنه رياضي
*موهوب
*دولي
*مثل السودان ولم يمثل به
*ومتعلم
*تعليم جد
*لم يحصل علي شهادة مجاملة
*ولم ينل دكتوراه من السوق العربي
*كان المنصب سيتشرف به كثيرا
*فهو يضيف للمنصب
*والمنصب لايضيف له شئ
*فهو لايحتاج لاضافة
*ولا محتاج يتمها موية
*إنه علي قاقرين
*لم يتشرف به المنصب
*لأن الرياضة في بلدي
*وزارة من وزارات الترضيات
*غشَّاشة سياسية لا بزازة ترضع وتكبر وتأهل وتصنع أبطال
*اللهم تقبله عندك قبولا حسنا
*واجعل الجنة مأواه
*وألزمنا وأهله وقبيلة الرياضيين والأخوة الأهلة وآل آفرو الصبر وحسن العزاء
*وإنَّا لله وإنَّا إليهِ راجعون
*أيُّها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*كلو يوم من بلدنا برحل زول جميل
*ويبقي الجمال في بلدنا يا والينا
سلك كهربا
ننساك كيف والكلب قال ناس كتااار رحلوا ولم يجلسوا علي كراسي يستحقونها.. ضَيَّعتوا بلدكم براكم.
وإلي لقاء
سلك.