حبة البركة

بابكر سلك

*حبة البركة علاج لأمراض كتيييرة
*بتعالج النفاخ
*والانتفاخ
*والنفخة الكضابة
*بتعالج أمراض كتيرة
*زي الغرور
*الغرور ذاتو بتعالجو
*و مريض الغرور بعد العلاج بحبة البركة كان سألتو عن أغنيته المفضلة
*حايقول ليك يامغرور مادي الحقيقة
*وهي انك مابتطيقها
*ولو غنيت ليهو بركة الجيت بركة الجيت
*بقوم جاري
*نعم حبة البركة علاج لكنه حااااااااااار
*بتشك في حنانك
*حبة البركة ماعندها انتهاء صلاحية
*مابتبوظ لو عطنتها في جاز
*اسي الجاب سيرة الجاز شنو؟
*لكن كمان عشان تتعالج بحبة البركة في طريقة استعمال
*تبلعها بالشقلوب
*يعني لا تتقلب حتي تبلعها
*تاني حاجة ماتشوفها
*بس تحس بيها جوة
*وبمناسبة تشوفها دي
*قالوا في سوق المطلقات بموريتانيا
*المطلقات كانن بتونسن
*واحدة قالت ليهن قون بركة شفتوا؟
*قالن ليها بري بري ماشفنا
*قالت ليهن يعني زي ابو عشرين
*واقف ماشافش حاجة
*لكن حبة البركة من ناحية بتعالج بتعالج
*كل الشناقيط اقتنعوا بيها
*بتوديك طوالي بالشنقيطي
*وتخليك تحفز المغلوب
*ما القون كان بالشقلوب
*بقي اي شي بالشقلوب
*تحفز المغلوب
*تطقع بالطوب
*تقيف في صينية مرور وتمرر الحركة
*دي كلها من الآثار الجانبية لحبة البركة
*لانو مكتوب عليها من الآثار الجانبية
*انها بتخلي المجنون يهبش والعاقل يطقع
*ومرات بتخلي الزول يفهم غلط
*تقول ليهو دبل ليهو
*يقوم يدبل كيك ليهو
*دبل دانة ممكن
*مسيرة تدبل ممكن
*لكن دبل كيك دي يسموها شنو؟
*وعشان قولت دبل ليهو كيك كتيرة
*قول كيك ليهو
*طبعا الافارقة مابعرفوا عربي
*عشان كدة الطمنطاشر افريقي ديل الشقلبة ما فهموها
*ياخ هو العربي العديل ده مافهموهوا لما العليقي حفزهم كمهزومين شر هزيمة
*عشان كدة راجع الفيديو تلقي الصفقوا فرحة بحافز الهزيمة
*هم الطيب عبدالرازق وفارس والغربال وابو عشرين لاشاف لاسمع
*اللهم ادم عليهم حافز الهزيمة وادم علينا الغنيمة
*المهم
*ده كوووووولو في إطار الإعداد
*مؤشر يوري إنو إعدادنا ماشي كويس برغم ضعف ووهن الخصم
*الخصم الذي اضطر للبلطجة من ربع الساعة الأولي معلنا خلو جعبته من القدرة علي مجاراة مهارات شفع المريخ
*فتمت تصفية قباني بدري
*وفوفانا مرق زي الإعصار محمد معانا ما تغشانا
*داير يكتل الأسد
*مرق مرقة مرقتو من الجنة وسقطها
*لكن نفعتو لانها من الدبل كيك خارجتو
*غايتو وقعتك وقعة يا ابا عشرين
ما كان أخير ليك خمسة مليار سوداكال وتعيش مستور!
*انتوا مسؤولين من الخير
*الدبل كيك كان بالشمين ولا باليمال؟
*اسي الجاب لامين يامال شنو
*أقصد باليمين ولا بالشمال؟
*ولا كلكم ماشفتوهوا؟
*غايتو الماشاف عليهو بحبة البركة
*أحسن علاج
*لكن بصراحة
*بركة البطير، ويدون ده
*مفروض يستنفر طوالي مع نسور الجو
*يطير فوووو
*ويدخلها محل برك الطير
*قالوا ناقصين
*كورة النقصية بمقصية في المقص
*وطبعًا سيما حكايتو حكاية
*عكسها كلهم جروا الشبكة
*خلوا بركة براهو
*ودبل ليهم كيك
*لكن بصراحة برضو اعداد والخصم ضعيف
*اسي ده لعب داير ليهو جاز قدر ده؟؟؟
*دايسين الابنص لما طلمبة الجاز عضت
*بقت تدفق الجاز سااااااي
*اسي عليكم الله ده لعب داير ليهو يونميد قدر ده؟
*لكن بصراحة اعداد
*والخصم ضعيف جدًا
*لو محل ميشو بشوف لي فريق موريتاني درجة تالتة استفيد من اللعب ضدو
*علي الاقل فريق بلعب كورة موش بلطجة وتصفية
*لكن بصراحة
*السماني ده متعاون في القون ده
*والمتعاون دايما اخطر
*لأنو بحاول يخفي نفسو
*لكن بصراحة كووولو إعداد
*والخصم ضعيف
*وغدًا إن شاء الله نتحدث عن راجل كعابيش
*لكن حبة البركة لو ما قدرت عليها ناشفة
*في زيت حبة البركة
*مسوح
*باااااارد ومابغلط عليك
*أيُّها الناس
*إنْ تنصروا الله ينصرُكُم
*اها
*نجي لي شمارات والي الخرتوم
*تعرف يا والينا
*قعدة في ضل البرندة
*وعضة فتة او سخينة
*وتعزم الجار البسالم
*ماعشان بغمت ليك سمينة
*محبة في الله بينكم
*وعشرة طالت سنينا
*ده البنحلم بيهو اسي
*وبمسح الدمعة الحزينة
سلك كهربا
ننساك كيف والكلب قال لقيتوا المعاملة كيف؟
وإلى لقاء
سلك