الشاعر الكبير مدني النخلي في بوح خاص لـ  “الصّفوة”

ماعندي كتير للكورة ..واحب هذا الفريق !

الحرب قلت اسبوع وتنتهي ..وانا في رحلة استشفاء .

كتبت في اتجاه السلام ونبذ الكراهية والوطن في قلبي .

الصّفوة – د. طارق عوض

مدني النخلي زول سوداني بكامل ابهة الجلابية والتوب ..
يمشي بين الناس في مدني تحديدا في حي الناس الجميلة خلق واخلاق ودين حي مايو اربعين ..
واحد من الذين جملوا وجدان الشعب السوداني باجمل واعذب الاغنيات..
..
واحد من الذين كتبهم الابداع انهم مبدعين من ما ولدوهم سلموهم صك الابداع الذهبي ..
..
النخلي الان نازح زيو وزي معظم ابناء وطني ..
..

*مدني اخبارك وصحتك

انا كويس
في البدايه قلت الحرب لربما تنتهي الاسبوع القادم ..
قعدت اسبوع اسبوعين شهر شهرين ..
كعادة الابناء
يا ابوي اطلع

طلعت قطر .. الغربه عن الوطن حاره
تعبت
مرضت
الان انا في رحلة استشفاء بالمملكه العربيه السعوديه ..
..
*لسه الوطن معاك؟

ضل عديل كده
الليل ما فيهو ضل ..
لحاف ونيل
وينك من معركة الكرامه ..
..
موجود بالقلب والقلم والسيف

قلبي العليل

وابنائي في سوح المعارك
وسيفي في غمده مشوق لرسم الغيمات..
..
النخلي عندك حاجه للكورة

ما كتير

*بتحب منو

المريخ والهلال والمنتخب

المنتخب وين حاليا

ليبيا
..

*متين ناديت الوطن اخر مرة
___
اقيف ماتمت اللوحه

صحينا على مناك نحلم .
ولاغرب نجم يلقاك..
تفج زحمة حبايب جوك
من البلد الوراك مفجوع..
فيا ترياق حنين الجاك..
من الضيم والالم موجوع…
ويا صوت النزيف جرحك
من حرقة حشا ومسموع…
ويا الشمس الابت تمرق..
وراك حردانه مابيه طلوع
ومكتوب ليك قبل مايتم
منى الامات..
تمش مفجوع
ياحسرة غناء البنوت
علي المطر الهجر
واديك…
وبناديك
وياجرح الكلام فقدك
مدن مفجوعه بتناديك
اقيف .. ماتمت اللوحه
ولا رشت مطيرة
روحك السمحه
غناء وموال
ولا اتكت الشمس
مالت
تصحي بشاير الحلال…
ولا اكتملت فصول
القصه
في سفر الحبيبه
الطال
فيا. صاحب
جميل حزنك
يسامر في شوارع
البال
وساء الحال..
ساء الحال
صحينا على
مناك نحلم
وهسه حبايبك
الرايعين.
نجوم المنفى
والضايعين
يغنوا على وتر
نازف
حنين الام على
الغايبين
غبار الارصفه
الفاقداك
غيب خطى
العابرين
وشوقنا علي
الوراك صابرين…
والمارقين
على مجهول
سفر مارقين
على وجه الأرض
هايمين
ومنسيين
منسيين..

*البلد دي ادتك كتير ..

اديتا شنو انت
..
والله ياحبيب الحصل ده افقدنا الكثير من الوطن واهلنا والاحباب وانا قبل ما اكون مريض عملت كم حاجه في اتجاه السلام وخطاب الكراهيه الممستشري بسبب الحرب وكل الحاجات دي موجوده وفي التلفزيون القومي ويتم بثها باستمرار حسب علمي
..

*تفتكر كده كفاية؟

هناك اخوه اقدر كني علي التعبير
هلاوي وموصلي وملحنين كالاخ هلالل وايهاب الامين والكتيابي واخرين كتبو اعمال متزامنه مع الحرب نادو بالسلام

* مدني مشتهي شنو في البلد

مشتهي الروح الملاذ
..
يا مشتهي الروح
الملاذ
موطن الناس العزاز
اقل من قامتك
غناي
ولاقرب المعني المجاز
دونك نهارى الانتظار
ومنامي يا وطني الخزاز
…
علك بخير والناس
هناك ايضا بخير
كيف الخطي
العبرت طريقا
وجاده سير
نهضت حياه
وثابه من هذا
الخراب
مرقت شمس
وهاجه من
خلف الضباب
والنيل يلاقي
الضفتين
بي شوق حبيب
من وطنو غاب
وتكون بخير
ويبقي البلد
دائما بخير
تصفي وتعود
للشارع الحزنان
حشود
اوركسترا
كمان وناي
جيتار وعود
كورال وفال
حتما نعود
الدنيا لا زالت
بخير
وارضنا معطاءه
وولود
وصتنا وادتنا
الطريق
نختلف في
كل شي
نختلف
بس في الوطن
ما نختلف
والصعب منم
نفوت
للضنا وحزن البيوت
يا نويح الريح
وليل
والدموع النازله سيل
يا حليل لو
فينا حيل
نمشيكا يا
درب الرجوع
..
..

*عايز تقول حاجه تاني

الكلام جاء بلغة القلم واحساس الالم
خالص الدعوات لعودة الوطن لانسانه ونيله وعشبه
عوده بادوات الشعر والنغم وصوت مبدعي بلادي اللذين تقاسمتهم المطارات البعيده
نتضرع للحق عز وجل ان يزيل البلاء وينعم علي شعبنا الصابر بالسلام والامان ..

..
تحياتي لموقع الصفوه الالكتروني فردا فردا