مهندس المريخ يرسم بالكلمات على “الصّفوة”

“ده سؤال عجيب لم أتوقعه.. وعودتي للسودان مرتبطة بهذا..!”
“صوتي ما جميل.. وهذه رسالتي للوطن والصفوة”

الصفوة – حوار: د. طارق عوض

ناس بحري ديل حقهم براهو

بحري سر الهوى .. هم بقولو على نفسهم كده
..
كلهم شايتين في المحطه الوسطي ..
..
من زمن جدهم الأول مرورا بالنشامي خضر بشير وادريس جماع و و و و و
الناس جميله زي النسمه ..
..
معاى واحد كورنجي من الطراز الزبرجدي ..
..
لعاب

حريف

اشتغل كوره جميلة في بحري ومنها جاء المريخ..
..
ما قعد كنبه كتير

تمرين تمرينين وحجز خانتو ..
وبعد أن قدَّم أجمل المَوَاسِم في المريخ لفت إليه انظار كشيفي المغرب العربي فاصبح وداديِّ السِّر والهوى

..
درب عدد من أندية ومنتخبات البلد ايمانا منه بضريبة تحتمها فرضية حب الاوطان ..

صقل الموهبة بالعلم كفر وسبورة
طرق باب التعليم العالي والآن بصدد تقلد شارة كابتنية الدكتوراة

..
مؤخرا سافر محبوب الملايين إلي بلاد العم سام أمريكا

الكابتن المهندس محمد موسي

حصلناه هناك ودردشنا معاهو..
..
خليني أسلم عليك باسمك حااااااااااف كده

** ازيك يا محمد
رمضان كريم
تصوم وتفطر علي خير..

حبابك وحباب موقع الصفوه الالكتروني
وكل سنه وانتو طيبين .. التحيه لكم
وعبركم لكل الشعب السوداني ..

** الفرق شنو يا محمد بين رمضان بالدولار
ورمضان بالجنيه

“ضاحكًا”: ده سؤال عجيب نهائي ما خطر ببالي
علي أيِّ حال رمضان بالملاليم مش بالجنيه بالنسبه لي أغلي واقيم من رمضان الدولار
رمضان الجنيه بقودنا لحاجات كتيره ..
للحنين للوطن
الترابط الأسري والاهل والاخوان والوالدين وكل الناس الجميله تحت مظلة العائله بمعناها الشامل السودان الكبير
وما تنسي التكافل الاجتماعي
والبرش والضراء
تفتكر الدولار بقدر يعمل كده
اذن قيمة الجنيه اعلي واقيم واسمى واعلي كعبا من الدولار
** الناس عرفتك في المريخ.. قبل المريخ كنت وين .. السكن .. الكورة؟

قبل المريخ كنت في بحري حلة خوجلي، لعبت لفريق العامل. ومعروف العامل خرج لاعبين كبار وعظام في دنيا المستديرة، منهم من رحل اترحم عليهم جميعًا، ومنهم من هم علي قيد الحياة ودي مناسبه ابثهم التحايا وغالي الأمنيات بالصِّحَّة والعافية..من العامل انتقلت مباشرة لنادي المريخ العظيم.

** ما عايزين كورة، ولكن هي أصلًا الكورة مرض عٌضال لو اتلايقت فيك صعبه جدا
من الذي اطلق عليك لقب المهندس..؟

لقب المهندس كان في اول ظهور لي في مباراة وديه ضد فريق الشعب البحراوي الفريق الشمباتي الجميل الانيق ..
وكان المدرب المجري دوشان يتولى الدفه الفنيه..

المباراه دي قدمت فيها نفسي لجمهور المريخ والاعلام بمستوي رفيع جدا وسجلت هدف بعد راوغت كل من قابلني من نص الملعب
انتهت المباره سبعه صفر
بعد المباراه اطلق عليا اللقب الدكتور مزمل ابوالقاسم..
..

** من هو او هم مهندسو صفقة انتقالك للمريخ

السؤال فيه شقين
اولا الترشيح الفني
وده كان من قبل الهرم الكابتن سامي عزالدين الف رحمه ونور عليه وزوجته
التحيه لاولاده دكتور معتز سامي عزالدين واشقائه..
كابتن سامي كان حينها المدرب العام لمنتخب الناشئين
كان اول من رشحني وتحدث معي للانضام للمريخ
الشق التاني تكملة الصفقه كانت من قبل المرحوم اللواء فيصل محمد عبدالله الف رحمه نور عليه
ازجي عاطر التحايا لاسرته عبدالناصر وجنابو ياسر وبقية افراد الاسره الكريمه
كان برفقة السيد اللواء فيصل المقدم حينها صديق علي صالح التحيه له

هم اللذين اكملو صفقة الانتقال

ما كان في مشكله ف التسجيل لرغبة الطرفين الصادقه ف اكمال العمليه تحت اشراف السيد رئيس النادي اللواء ماهل ابوجنه ايضا له التحيه ورفيق دربه سكرتير النادي الاستاذ عصام الحاج

تم التسجيل بمكتبه ببرج البركه ..
..

**  محمد الان بصدد اعداد رسالة الدكتوراة
بتفكر الصقل الاكاديمي ممكن يساعد في ترفيع وتزكية درجة الوعي لدي اللاعب والاداري والمشجع ام ان القصه في النهايه كوره وخلاص

في البدايه نسال الله يوفقنا في انجاز رسالة الدكتور..
بدون شك الصقل الاكاديمي مهم جدا..
ابدا القصه ما كوره وبس
بالعكس ده الصقل الاكاديمي ..
يسع الاداره والرياضه وكل ما من شانه ان يساعد في تهذيب المتعاطين والشان الرياضي
..
صحيح الجانب الفني حقيق باستيعاب الشق التقني
لكن بتلقي الاداره كعلم مهم جدا تكون مصقوله اكاديميا ..
حتي تستطيع الاداره من الاسهام في رفع درجة الوعي والمساعده في النهوض بكرة القدم والترقي نحو ترميم الانديه والمنتخبات وقيادتها لمنصات التتويج ..
..
هنا برضو بتخش حتة الاستثمار وفقا للاداره الواعيه
ايضا نقل الانديه من الهوايه
للاحتراف
والاحتراف باختصار هو الاكتفاء المالي للفرق
بعداك تجزئة متطلبات النادي وفق معايير العمليه العلميه
وهنا تنبع قيمة الصقل الاكاديمي.

**أجمل اهدافك
في مرمي ملعب الملك فهد في البطوله العربيه في فريق عناب الجزائري بتهديفه من وسط الملعب

مشيت الوداد المغربي
كنت مغاضبا
ام رغبة في الاحتراف..

عمري ما غضبت المريخ لانو المريخ فضله علي كبير بعد الحق عز وجل
انا مشيت الوداد للاحتراف ولانال شرف اول لاعب سوداني يحترف في شمال افريقيا في نادي كبير كالوداد
وكانت نقله كبيره جدا لي الي يومنا هذا
..

** اكتر الاوقات البحبها محمد وبكون فيها خالي الا من نفسه

بحب جدا الاختلاء بالنفس لاستعادة الذكريات وترتيب الاولويات ووضع استراتيجيه وسيناريو للخواص

طبعا نحنا بنقول كده لكن السيناريوهات والترتيبات الالهيه ليها كلمتها
نحنا بنقول ..
ولرب العباد قول فصل

تانيا :
**الجلوس بكامل صفاء الذهن وبعيدا عن ضغوط الحياة وبعيدا عن المشاغل في المتزل مع اسرتي الصغيره .. بنسي في اللحظات دي كل هموم الدنيا وبعيش السعاده كما ينبغي..
..
** حصل غنيت ي محمد

صوتي ما جميل .. لكن زمني كويس

ممكن ادندن مع فنان بغني
او اغني مع المجموعه
لكن براي ما حصل غنيت

** بتسمع منو من الفنانين
الكبار والصغار

أنا زول سميع جدا
مدمن حقيبة
وحافظ كتير جدا منها
واذيعك سر وانا صغير حفظت زهرة الاغاني للعملاقين المرحومين عبدالعزيز داوؤد والعطبراوي
حافظ اغانيهم عن ظهر قلب
بسمع كل الحقيبه
الكبار
وحتي الصغار بالاضافات والمعالجات الموسيقيه الحديثه

من الفنانين الصغار بسمع كتير جدا من الفنانين بدون تحديد

لكن علي الصعيد النسائي ممكن احد لانو الخيارات بالنسبه لي واضحه
سميره دنيا لا يعلي عليها
ثانيا انصاف فتحي

اجمالا بحب الغناء .. بستمع للغنا الهادف الرصين
علي صعيد غناء الطمبور بستمع للحبيب الصديق القريب الي نفسي محمد النصري

 

** رايك عموما في غناء اليومين ديل

 

انا ما عايز اكون ديكتاتور واحجر على راي الناس
لكن رايي الخاص انا واضح جدا
اي غنا هابط ما بسمعو
لكن بحب الغناء الذي يمس شغاف المشاعر الانسانيه والعاطفيه والوطنيه ويخاطب الوجدان
..

طبعا رمضان في السودان احلي واجمل ..
اكتر حاجه بتحبها في الصينيه شنو

** عندك طقوس معينه؟ 
وأصعب ساعة في رمضان؟

طبعا رمضان في
السودان احلي وزي ما ذكرت قبيل
رمضان الجنيه اجمل ….
ما عندي اكله معينه ..
المشروبات بحب الكركدي جدا ..
في رايي ما في حاجه اسمها طقوس معينة
لانو الشي الطبيعي في رمضان ان أقرأ القرآن باعتبار الذكر الحكيم المفروض يتلوه اي مسلم ..

 

..
** أصعب ساعه في رمضان

ما عندي ساعه صعبه بالتحديد
رمضان بالنسبه لي كلو ساهل جدا ومتعة كبيرة..

..
ضربه حره مباشره في راس خط تمنطاشر
وانت كابتن الفريق

** منو من اللاعبين كنت بتثق فيه لدرجه كبيره لتنفيذ الركله
بدون تفكير
الكابتن الكبير ابراهيم حسين ابراهومه

الكورة دي زي اللبانة لو اتلصقت في الشعر ما بتطلع بسهوله
تاني جاتنا

** نادي عالمي بحبو محمد
عربي
منتخبك المفضل

عالمي بشجع الملكي ريال مدريد

والمان يونايتد رغم انو حاليا مش ولا بد

 

ليفربول

والايطالي اي سي ميلان

عربيا الوداد لانو لعبت فيه ومتعاطف جدا معاهو

الاتحاد والنصر السعوديين
الاهلي المصري
الترجي التونسي

 

السودان وحرب الكرامه
النزوح
النزيف
والعنت
والتعب
القتل
والاغتصاب
..
ابتلاء رباني
درس لكثير من العبر الممكن الناس تعتبر بيها
بتقول شنو في المحنه دي يا محمد

..
**حرب الكرمه بكل تاكيد ابتلاء وامتحان للشعب السوداني
ما عايز اتكلم عن الاموال والسيارات وعموم المقتنيات..
الالم الكبير في الارواح التي ازهقت والدماء التي اريقت
اطفال ونساء ورجال شيبا وشبابا والاعتقالات والاغتصابات لشعبنا واهلنا ..دي الابتلاءات العظيمة.
الجميل انو معركة الكرامه اظهرت قوة واصالة معدن هذا الشعب الابي
واظهرت قوة وبسالة قواتنا المسلحه في رد العدوان
..
اعتقد درس مفيد لكل العالم ..
واذا ربنا كشف الحجاب ورفع الغطاء
ح نختار ما اختاره ربنا .. الحرب ثم الحرب

اختيار ربنا ده اصلا مافي افضل لنا..
ربنا اختار لينا كده كابتلاء وامتحان

ما علينا الا نسلم ونبصم بالعشره لاختيار ربنا وان شاء الله لخير كبير جدا..
..
**رسالتي المقتضبه في كلمات
نحن قاعدين في الوطن حتي الذين بالخارج
ما كنا عارفين غلاوة وعظمة هذا الوطن الا بعد هذه الحرب
انا متاكد بعد نرجع بلد تمكسنا بوطنيتنا وبلد حيكون اكبر واكبر..
..
بترجع متين يا محمد البلد

..
**انا لو عليا ارجع الليلة
دعواتك ..
..
**نشوف لغاية السنه الجايه نرتب امورنا ونكمل الدكتوراه وكذلك الجانب الفني ونزيد معرفتنا باصول كرة القدم ونطور نفسنا اكتر حتي بعداك نرجع السودان عشان نفيد البلد في حقلها الرياضي والعلمي
..

شلت معاك شنو من البلد وحابي تجيب معاك شنو من هناك

..
**شلت معاي كل الحب والود واصالة السودان ومعدن الشعب السوداني
وحابي اجي راجع بنفس الحب والموده والاصاله

..
** رسالتك للوطن والشعب والصفوه

 

**بقول للشعب السوداني .. انتو شعب عظيم شعب ابي شعب معلم وصابر ومحتسب
قادرين علي الصمود وتقديم الدروس للعالم
يكفي ايمانكم الثر والرضاء بالقضاء والقدر
احيي فيكم هذا الصمود
رسالتي حتما حترجعوا بلدكم
حينها اعيدوه سيرته الاولي وابعدو عن العنصريه .. اتوحدوه .. شيلوه .. علوه .. ابنوه وطن الجمال .. كونو قوميين .. دعو التحزب ..
..
الصفوه ..منسوبي المريخ

المريخ الأمه ..
..
اديتونا الحب والتقدير والمكانه الاجتماعيه المرموقه

.
اسال الله ان يجمعنا بكم في استادنا ووطنا ونعيد ذكرى مانديلا وكل البطولات المحموله جوا

 

موقع الصفوه الالكتروني .. شكرا
ولدتم باسنانكم ..
كتاب كبار وقامات سامقه اسعد جدا وانا احد المعجبين باصدارتكم الفتيه ..
دردشه انيقه خفيفه مختلفه شجعتني اقعد معاكم رغم اني كنت ممتنع عن كل الاستضافات ..
..
لكن انتو غير

ربنا يوفقكم ويسد خطاكم وكان حيين بنتلاقا