من حوش حواش في دردشة مع ملكة القوافي الشاعرة أسماء عبد الخالق

*ليست لدي طقوس للكتابة

*القصيدة في الحرب سلاح

*نحن الشعراء نقاتل جنبا إلي جنب مع جيشنا بسلاح القصيدة

*في السلم بيت الشعر يتم بنائه، كسائر البيوت لتتجمل المدينة
*تعظيم سلام لزوجي

الصّفوة – حوار: بابكر سلك

** أستاذة أسماء نحنا في منصة “الصّفوة” سعيدين اننا نلتقيك في دردشة من حوش حواش وسعيدين أننا نلتقي قامة فنية ومفردة شعرية نسائية مبدعة فرضت نفسها بقوة في عالم الشعر والثقافة.

– انا سعيدة بيكم شديييد ويشرفني ان اطل من خلال منصتكم علي الناس عموما وعلي الرياضيين علي وجه الخصوص واشكركم لاتاحتكم لي هذه الاطلالة عبر الصفوة التي تستضيف بالتاكيد الناس الصفوة

**من هي أسماء؟

– أسماء، عبدالخالق مواليد بحري (قشلاق) الجيش درست الأساس في شرق النيل وجزء بدنقلا اما الثانوي فكان بالجريف وأخيرا تخرجت في كلية الاعلام جامعة ام درمان الإسلامية تخصص اذاعة وتلفزيون واعمل بالحقل الاعلامي.

** هل لديك طقوس للكتابة؟ وكيف ترين القصيدة في الحرب وماذا عنها بعد الحرب؟

– ليست لدي طقوس للكتابة فأنا اكتب اينما شعرت بأني أريد أن أكتب القصيدة في الحرب سلاح ونحن الشعراء نقاتل جمبا الي جنب مع جيشنا بسلاح القصيدة.

في السلم بيت الشعر يتم بنائه كسائر، البيوت لتتجمل المدينة.

** هل لزوج الفنانة دور في إبداعها؟

– بالتأكيد الزوج الفنان المثقف يساعد كثيرا في إبداع زوجته الفنانة، وليس بالضرورة أن يكون فنَّهما من نفس الكار وتعظيم سلام لزوجي.

** منو الوقف مع موهبة اسماء الشعرية؟ ومنو القدمها للناس؟

– أسماء عبدالخالق هي من جاهدت لتقديم نفسها للآخرين ولكن هذا لايعني عدم الدعم الذي وجدته من شخصيات بعينها بعد ان طرحت نفسي بعد حرب ومعاناة شديد مثل بابكر صديق في نجوم الغد الذي اتاح لي الفرصة لتقديم نفسي عبر نجوم الغد والاستاذة كوثر بيومي التي استضافتني ببرنامج شوارد والاستاذ ربيع عبدالماجد المخرج بتلفزيون السودان عليه رحمة الله من اهم الناس الدعموا تجربتي، وبصراحة ليهو فضل علي كبير جدا لانه وجهني لتعلم فن الالقاء وقدمني من خلال برنامج عناقيد واهم البرامج الشاركت فيها برنامج ريحة البن وسط زملاء، عمالقة ولكن الخلاصة ان اسماء عبدالخالق هي من جاهدت لتقديم نفسها للآخرين.

** الشعر في المقام الأول هو احساس وليس صناعة ماهو قول أسماء في ذلك؟

– ياسلام يا أستاذ، ده كلام جميل ومختلف. انا دايما بقول في فرق بين كتابة الشعر والاحساس بيهو ونظم الشعر كصناعة

** نعلم انك كتبتي اشعار اغنيات وشعار مسلسل اقنعة الموت الذي يعرض في هذا الشهر الفضيل بقناة الزرقاء وكتبتي بمنتهي الاحساس والدليل علي ذلك تأثيرها الواضح علي كل من تابع المسلسل برغم ان ماكتبتيه لم تكتبيه ابتداءا ولكن قمتي بذلك بعد ماكلفوك به.. يعني صنعتي النصوص ونجحتي.. دي دايرة شرح

– لما طلبوا مني كتابة اشعار واغاني المسلسل طلبت قراءة السيناريو عشان اعيش الاحداث بصورة كبيرة واصورها شاعريا والساعدني ان اكون حقيقية في طرح الكلام هو وجودي في ذات الفترة وانا عايشت الحرب وعانيت فيها ونزحت وطلعت من بيتي، لبلد تاني وكلو زول فينا بشبه شخصية في المسلسل. عشان كدة لما قريت النص ووجدت مابه من ابداع ده حركني بطريقة سريعة خالية من احساس الصناعة واذا بالغت ليك بقول ليك وانا بتابع بث المسلسل والله ببكي وكأني لم اكتب الكلام

**أستاذة اسماء الدرس الادتنا ليهو الحرب شنو؟

– الدرس الادتنا ليهو الحرب مابنلقاهوا في اي كتاب ولا في اي مدرسة ولا اي بلد لانو كان درس قاسي والحرب كشفت مواقف الناس وحقائقهم وتقبلنا لبعضنا

** أستاذة اسماء أول ما كتبتيه عن الحرب؟

– انا في طريق النزوح للولاية الشمالية دنقلا ونظرت حولي لقيت اخواني اغلبهم مشتتين كتبت
بقي كلو واحد في بلد
الفرقت بيننا الحرب في جيدنا زي حبل المسد
وبقينا بنخاف المطر نندسه من صوت الرعد
نفتكروا صوت دانة وكلاش
جوانا صوت الحب سكت
يارب يعود لينا الامان
معني السلام الما اتوجد
ترجع بلدنا ملانه خير من تاني يكتمل العدد
والكل يقول سودانا فوق
سودانا جد اروع بلد

**أستاذة أسماء معروف أنو الرؤية تختلف عن الأمنيات.. دايرين نعرف رؤيتك لسودان ما بعد الحرب أمنياتك

– رؤيتي لسودان ما بعد الحرب ان يتعلم السودان من أخطاء الماضي بنهضة عمرانية وثقافية وعلمية وشبابية علي كل الدروب. أمّا امنياتي أن يكون السودان دائمًا حرًّا مستقلا أبيا قويًا بهيا زاهيا كما عهدناه

**الثقافة يجب أن تقود الشعوب لا السياسة.. ماقولك في ذلك؟

– اصبت القول يا أستاذ لانو حقيقة الثقافة يجب ان تقود الشعوب لانو حتي لو كنت سياسيا ولم تكن محنكا ومثقفا ده بقود الامة لعتمة قاسية.. انت تكون سياسيا خاويا لاتفقه شيئا فهذه مصيبة في حد ذاتها والثقافة دائما لها القدح المعلي فإن كنت مثقفا فانت قادرا علي ان تكون سياسيًا علي أن تكون وطنيًا حقيقيا أن تكون مُحبا أن تكون أبا صادقا ان تكون أخا سندا ان تكوني أما قوية وأختا بارعة.؟

**اكتر قصيدة لأسماء وجدت رواج

– الرخيس ماببقي غالي
ناس بيكبروا بالتواضع
وناس بيصغروا بالتعالي
ناس بحاولوا يداووا جرحك
وناس بيجرحوا بالتوالي
زول بيستغرب طباعك
وانت في طبعك مثالي
زول بلومني اذا انفعلت
وزول بقدر انفعالي
يبقي طبع الناس بيفرق
فيهو حنين وفيهو سالي
في المابقدر مقامك
وفي المقامك عندو عالي
في البيضرب لي ويسأل
وفي البيرفض اتصالي
والرخيس ماببقي غالي

**آخر كتابات أسماء

– قلت
صدق حايكون العيد عيدين
من تاني حانرجع لي بيتنا
واخواني اشوفهم متلمين
صدق حايكون العيد عيدين
صوت القرآن وابوي بتلي
وامي بتدعي وبنقول آمين
صدق حايكون العيد عيدين
صوت الجيران ريحة الحبان
سيد الدكان نسوان الحلة المجتمعين
صدق حايكون العيد عيدين
وااشفع بلعبوا في الشارع
والقمرة هديك ضيها ساطع
والكل بفرحة مبسوطين
صدق حايكون العيد عيدين
والنص ده اول ناس يسمعوهوا هم ناس موقع الصفوة

** كلمة أخيرة أستاذة أسماء

– كل الشكر لموقع “الصّفوة” وجمهورو علي اتاحة هذه الفرصة وياريت يكون لي شرف كتابة كلمات الشعار وبرومو قناة الصفوة التي اعلم انها تولد في هذه الايام

شكرا ليك استاذة ونتمنى لقاءً يجمعك معنا على شاشة “الصّفوة” قريبا

وإلي لقاء