فرتقت الشلة ياقله لـ”الصّفوة”: ختيتا للرميلة..وهدفي في الهلال الأجمل
لهذا السبب رجعت مدني.. وأنا غناي وأخوي ألعب مني
فرتقت الشلة ياقله لـ”الصّفوة”: ختيتا للرميلة..وهدفي في الهلال الأجمل
الصّفوة – حوار /د. طارق عوض
زول يشهيك الجناح الشمال..
أعسر قاتل حتي في التفاته لقصم ظهر حراس المرمي.
كفر ووتر ووضاحة، زي ناس مدني الحنان.. طماعين جدًا المدنيين ديل.. ما بقتنعو بميزة واحدة.
بكتلو الجدادة وبخموا بيضا.
لعاب وثاب وغناي.
كان اغرودة معسكرات المريخ.. يخفف عن البعثة رهق وطول المعسكر.. بصوته الغنائي الطروب أنه: مرتضى عوض الأمين.
** قله ازيك ورمضان كريم
تصوم وتفطر علي خير
– رمضان كريم عليكم الأخوة الأعزاء الموقع السمين الثمين “الصّفوة” الالكتروني.
**ادينا بطاقتك يا قله
– أنا مرتضى عوض الأمين محمد اللقب “قلة الصغير”
حي القسم الأول (ود أزرق) ولدت وترعرت في هذا الحي العظيم الذي قدم للسودان الافذاذ من اللاعبين الذين عطروا الكرة السودانية والإفريقية بفنهم الراقي، منهم الفاضل سانتو وإخوانه وإبراهيم محمد علي (ابراهومة الكبير)، وفيصل كوري، وخضر كوري، وشقيقي مصطفي أبو زعبل وحداثه، وعبد العظيم قلة الكبير.
درست الابتدائي بمدرسة القسم الأول، والثانوي العام مدرسة الهواره الثانوية، والثانوي العالي بالمؤتمر.
**رمضان كيف معاكم في مدني؟
– من وجهة نظري أنا.. أجمل رمضان في الدنيا في مدني
بس للأسف الحرب والنزوح والتزيف أثر كتير علي رمضان السنة دي حتي حركة الناس بعد الفطور ما زي زمان لانعدام الكهرباء وعدم رجوع الأسر، بتمني الناس ترجع عشان مدني الفن والجمال ترجع زي أول.
طقوسك كيف في رمضان؟
مدمن للجلوس وسط الأسرة وتلاوة القرآن في حلقات بمسجد الحي.
**ناس مدني يا قله بحبو مدني شديد
وريني أول رمضان ليك خارج أسوار مدني
– ناس مدني ناس حنينن علي قولك ..
صعب جدًا الواحد يصوم رمضان خارج مدني
صحيح الظروف مرات بتحكم، لكن الشوق وذكريات رمضان في مدني بتكون متجذرة فينا.
**ابتسم انت في مدني
العبارة دي مكتوبة في مدخل المدينة.
**هل لا زالت مدني ضاحكة مستبشرة في وجوه الزوار
أم الزمن والحرب غيرت ملامح الابتسام؟!.
شوف مدني براها كده من غير لافتة الميناء البري .. مدني دي زي اغنيه ودندنه .. اول ما تجي وانت نازل من البص بتحس كانك بتسمع في اغنيه وبدون ما تشعر تلقي نفسك مبتسم، أكيد الحرب أثرت.. لكن الجينات موجودة وحتمًا حتزهر مدني من جديد.
**جيت الخرطوم ولعبت للمريخ وكنت نجم النجوم، لكن رجعت سريع، هل لانو مدني وحبها الجارف سبب في عودتك؟!
– أنا سجلت للمريخ عن حب جارف جدًا وقضيت فيه أحلى أيام مري رجعت مدني لظروف قاهره جدًا إضافة للظروف دي .. مدني كان لها دور كبير في رجعتي ليها، مدني مدينه بكل المدن، ونحنا لسه مبحرين معاك في مدني الجمال.
**ناس مدني قالو لي قلة ده غناي خلاص الكلام ده صحيح؟ واكتر أغنية بتحبها شنو يا قلة؟
– ضاحكًا.
ده كلام صحيح أنا فعلًا بغني والناس بتقول صوتي حلو لكن أنا شايف غير كده بحب الحقيبة، اعمامنا محمد احمد عوض
صديق الكحلاوي، اكتر أغنية بحبها لصديق كحلاوي اسمها (طريق الحب).
**اللاعب الفلتة أبو زعبل برضو قالو فنان صراحة صوتك أحلى أم أبو زعبل؟
– بصراحه أنا صوتي أحلى وأسأل اي زول في مدني
مع اختلاف خاناتكم في الملعب أنت وأبو زعبل.. منو الأفضل فيكم؟
– أبو زعبل اصلًا رأس حربة في عمق الهجوم ويجيد الألعاب الهوائية خاصة الدبل كيك، أنا طرف بلعب جناح شمال، أما اذا جينا للحكم في أيهما الأفضل.. أبو زعبل الأفضل
**حصل لعبت مباراة إفريقية في رمضان؟
– نعم في يوغندا ضد فيلا، لكن معروف المناخ اليوغندي رطب وبارد جدا ما اتأثرنا بالصيام.
لعبنا وكأننا لم نكن صائمين.
**بتشجع منو خلاف المريخ والاتحاد؟
– في السودان بحب حي العرب بورتسودان كان بقدمو كورة راقية جدًا، وعربيًا النصر السعودي، أما عالميًا برشلونة، و المنتخب البرازيلي.
**حصل غنيت في حفلة؟
– ضاحكًا مرة وااااااااااحدة في مناسبة دكاكينينة.
** موقف طريف
– مباراة مريخ هلال، وكان مدرب الهلال وجه وليد النهضة بمراقبتي، وحصل فاول في رأس خط تمنطاشر في اللحظه ديك وليد سرح عني لعبو لي الكوره باص خطفتها وجبت قون.. جيت جارى جنبو بحتفل بالهدف وكان زعلان شديد لاني هربت منو قال لي انت كنت وين، قلت ليهو كنت في دردق، وهو طبعا ساكن دردق.
**هل كنت في يوم من الأيام بتتوقع تلعب في القمة؟
نعم كنت متوقع وفقًا لآراء العديد من الفنيين في مدني
وأنا ذاتي كنت بحلم باللعب في المريخ، الحته دي ساعدتني بالتجويد والاجتهاد والحمدلله اتوفقت.
**منو الاكتشف قله وسجلو في نادي الاتحاد؟
– الأسرة كلها اتحادية ووالدي قطب من اقطاب نادي الاتحاد، ممكن تقول جمهور مدني الذواق هم الاكتشفو قله لانو زي ما قلت ليك الناس في مدني ذويقه جدًا.
** منو اللقبك باسم قله؟
“قله” اصلًا لقب أخوي الكبير عبدالعظيم، لما ظهرت أنا لصقو فيني واضافو ليهو الصغير بقيت “قله الصغير”.
** لاعب من جيلك اتوقعت انو يتسجل للمريخ وما حصل؟
– اتمنيت المرحوم خالد جبريل استوبرنا في نادي الاتحاد، زول كان لعاب جدًا وحريف ومهولله الرحمة والمغفرة
** مدرب له الفضل عليك؟
– المدرب الأمين أبو ليلى له الرحمة كان بعمل تمارين خاصة في التقوية والسرعة.
**منو من أولاد مدني لقيتم في كشف المريخ لحظة تسجيلك؟!
– المرحوم سامي عز الدين
**قله
لينا زمن ما سمعنا حاجة عن الاتحاد
وين الاتحاد ؟!
– الاتحاد موجود .. المشكلة في تعاقب الادارات وضعف الامكانيات وعزوف الرأسمالية من الدخول في متاهات كرة القدم .. الحاجات دي خلت الاتحاد بعيد عن اجواء التنافس .
لكن الان وقبل تحرير مدني في خطط كتيره الناس شغالين عليها لاعادة الاتحاد سيرته الأولى.
** قله بشهادة الجميع أنت كنت لاعب مهارى من الدرجة الأولى ومعروف اتسببت في شطب مدافعين كتار
حدثنا عن واحد منهم؟
– بدون تردد الصديق العزيز صديق الرميله زول قريب مني شديدبس حصل مرة وقبل المباراة اعتدى عليا بالضرب بدون سبب قمت ختيتا ليهو ..بدت المباراة راوغتو اكتر من مره وكنت بستلم الكوره وبمشي ليهو عديل وبراوغو ..
وخليت جماهير الهلال تثور عليه،وكانت المباراة دي سبب في شطبو من الهلال
**أجمل هدف؟
– في الهلال .. تحديت الهلال وفعلًا هزمتو واحد صفر
هدف كان غالي جدًا.
** مدافع بتعمل ليهو ألف حساب؟
– مافي مدافع معين كده، المدافعين ديل بخافوا من المراوغة وأنا ملك القصة دي.
**أول يوم في سقوط مدني كنت وين؟
– كنت خارج مدني في قرية طيبة الشيخ عبدالباقي واستقرينا هناك لغاية تحرير مدني.
– ما تتخيل سعادتي كيف بتحرير مدني
ودي فرصه احيي فيها قواتنا المسلحه وكل القوات المساندة لتضحياتهم الجسورة وتحرير كل شبر من وطني مع أمنياتي لهم بالمزيد من الانتصارات.
** كلمة اخيرًا
– شكرًا “الصٌفوة” وكل التيم العامل بها.
قداااااام
