بابكر سلك
إذا عدنا للقاء السنغال
نجد أن الإيجابيات كتيرة
برغم بعض الهنّات والتي تم علاجها وإبعاد الخطورة بفضل الله أولًا ثم ببراعة ود المصطفى والكابيتانو رمضان عجب
عجب عجيب ياخ
بس نحنا ما بنعرف نوثّق لي ناسنا كويس
ولا بنعرف نسوّق إنجازاتنا
المهم
يقولون
هم البقولون
يقولون إنه في تصريح لساديو ماني قال
لعبت في الليفر والبايرن ولم أجد مدافع أفضل من رمضان
ياخ ده تصريح مفروض نحتفي بيهو
ونقدل بيهو في جميع المنصات الإعلامية
ونشيل كاميراتنا ونجي لي رمضان
نوثّق ليهو ومعاهو هذه التصريحات
نخلي العالم كلو يعرف رمضان
لكن تقول شنو
المهم
ساديو قال لف الدنيا بكراع كلب ما قابلو مدافع أفضل من رمضان
ده حالتو ما مدافع يا مان يا ماني
ده كان لعب ليك في النص يحيرك
وكان لعب مهاجم يحيرك
عفوًا يا ماني
ده جوكر
ده مع أي كرتين خمسين يا معلم
ده موش يغطيك أنت ويقفلك
ده يقفلها غطا عام
ده رمضان يا عمك
ظاهرة في مسيرة الكرة السودانية يجب أن يصحبها التاريخ معه كي لا ننسى
وده نتاج ممارسة الكرة من سن صغيرة وبجدية
رمضان لم يعاقر الكرة كلعب
ولكنه اتخذها (جِدًّا) واحتساها بجد زي ما قال الدكتور
لذا تجده اليوم قمة الإدهَاش والإمتاع
ده يقفل موية النيل إذا أراد يا ساديو
أيها الناس
رمضان ربنا يحفظو
ويتوج جهودو بلقب أول كابتن للمنتخب السوداني يصعد لنهائيات كأس العالم
دعونا نوثّق ونسوّق لقامات وضعت بصمتها على تاريخ الإبداع بمنتهى الروعة
الحرب دي علمتنا الكتير
إيجابياتها أكتر من سلبياتها
عشان كده أنا دايمًا بقول
اللهم اجعلها حرب خير وبركة
شكرًا لكل كِلية المنتخب
وتعظيم سلام للعجب العجب ماني
ويا أرض احفظي ما عليك
المهم
خمسة وعشرين رمضان
مبادرة الأسطورة محمود عبدالعزيز
قايمين بيها حيران الشيخ محمود
تحت شعار محمود موجود
مساعدة اللاجئين إلى مصر
ترحيل عودة طوعية مجانية
وحاجات كتيرة
ويستمر الخير طالما الحيران (الحواتة) ممسكون بتعاليم الشيخ محمود
رموز المجتمع
وجميع أصحاب المقامات السامية
والإعلام كله حضورًا ليسجل روعة المشهد
ونحنا كمريخاب أهل الحوت وحيرانو
بالتأكيد حضورنا الأنيق وإسهاماتنا الكبيرة ستشكل لوحة تعبر عن جمالنا
خمسة وعشرين رمضان
بحواش شارع اللبيني فيصل
أكيد حانبقى كتااااااااار
لأنو أصلًا نحنا كتااااااااااار
أيها الناس
إن تنصروا الله ينصركم
أها
نجي لي شمارات والي الخرتوم
كان شفت يا والينا
نحنا الضيق ما هامينا
ومهما ضاقت بينا
سماحتنا ما بتسمح للظروف تكتل روح التكافل فينا
نحنا شعب كده يا والينا
سلك كهربا
ننساك كيف والكلب قال الدنيا امتحان يكرم فيه المرء أو يهان ولك الإكرام دومًا يا سودان
وإلى لقاء
