بابكر سلك
آمالُنا كانت كبيرة.
ولكنها بالأمس خابت.
خسرنا بالتعادل مع جنوب السودان.
وهل كنا نستحق حتى التعادل بالأمس؟.
جئنا نَقدِل تملؤنا الخيلاء.
جِينا نلقى مِحنة عندك.
جئنا نجرجر أذيال الهزيمة غرورًا بعد أن أتتنا الصدارة مُنقادة تحرجر أذيالها.
جئنا عشان نُكمل أفراحنا.
فنصبنا سُرادق الأحزان على أرض الطموحات التي كبرت.
ولكنه الغرور.
لم نحترم الخصم.
لذا لم نكن نستحق الاحترام.
أبو عشرين خلوه.
هل كان أداء البقية يحمل شيئًا من المسؤولية والرغبة في الانتصار؟.
بالحسابات وشكل المباراة.
خسر الجنوب بالتعادل معنا.
لأنه كان الأجدر.
الأكبر رغبة.
الأكثر حركة.
المليء بالإصرار.
لذا كانوا يستحقون نقاط المباراة الثلاثة.
ياخ معقول.
في ناس كده في منتخبنا ده؟.
خليك منهم.
منو البختار اللاعبين؟.
كواسي؟.
براهو؟.
معقولة بس؟.
ما بصدق.
بتعرفوا تلعبوا هارد؟.
سمعتوا بالديس؟.
في لعيبة كده مفروض يطلعوا ديس ونسك الزول المُرقنا ليهو الديس.
بالديس لما ياكل الدامة.
نقوم نمسك ديسنا فوق.
ويسكونا بيهو ويأكلونا الدَّلَمة بي آسها؟.
منو البختار لي كواسي؟.
الديس ظااااااهر.
لكن منو الحريف البتخذ القرار ويمرق الديس؟.
معقولة بس نطلع ديسنا غلط؟.
المهم.
صعُبت.
صعُبت شديد.
ولكن ما استحالت.
كثير من الجهد.
وقليل من الحظ.
ونحنا فيها.
بس نمرق الديس صاح.
ما نحتفظ بالورق البدردقونا بيهو ويأكلونا الدامة.
بستغرب من زول يمرق الديس ويحتفظ بي الدامة واقفة.
لكن منو البختار لي كواسي ده؟.
أيها الناس.
قليل من الجدية يعيدنا للمنافسة من جديد.
بطلوا مجاملات وخلُّوا صالح الوطن هو الهدف الأساسي.
بقية المصالح لا تغلب على صالح الوطن يا ناااااااس.
غايتو الجاتنا تختانا.
أيها الناس.
إِن تَنصُرُوا اللَّهَ يَنصُرْكُمْ.
أها.
نجي لي شمارات والي الخرطوم.
ما شُفت يا والينا.
الأمس بقت فينا.
جينا مغرورين يا أخينا.
مرقنا حزنانين من العلينا.
برانا سويناها فينا.
ناس تجليها بي أيدينا.
تلحقها ناس بي ريسينا.
معقولة بس يا والينا؟.
سلك كهربا
ننساك كيف والكلب قال كلمناكم سديتوا دي بي طينة ودي بي عجينة يا العملتوها فينا.
وإلى لقاء
سلك
