بابكر سلك
*النتيجة الكارثية لمباراتنا ضد الاشقاء جنوب السودان
*بقت لينا زيّ الحرب دي
*مرقت كل عيوبنا
*العيوب الماكنا بنعترف بيها
*ولابنواجهها
*عيوب إدارية
*من الدولة اعلى مستويات الادارة
*وحتي اصغر الحلقات
*لا بنعرف تخصص ولا بنفهم تقسيم عمل
*كل مقومات العمل الاداري الناجح نضرب بها عرض الحائط
*ولا نعترف بالادارة كعلم
*ولكنها عندنا زندية
*نقدل فوق عديلنا
*والطمبارة يطمبروا
*كدي كدي كدي
*ودور المرأة حتي ولو كانت داخل البرلمان
*مجرد زغروده عندما يطمبر الطمبارة
*المرأة كمان دور شنو الليها
*تزغرد وتصلح توبها وتتطلب الله
*نستوعبها في اعلي المقامات
*ليس ايمانا بها وبمقدراتها
*ولكن لتكمل الصورة وتجملها
*زي المصلاية في بيت الزول المابصلي
*عندك مصلاية؟
*كيف ياخ…. اجري ياولد جيب المصلاية
*والولد المسكين يفتش مايخلي تحت مرتبة وورا دولاب وتحت الكرسي
*وبعد جهد يلقاها
*نحنا كدة
*لامنهجية ولا بنترك العيش لخبازو
*ابو عشرين
*موضوع الملايين
*انا لا الومه في المقام الاول
*ولكني الوم الاسباب الحقيقية الخلت مصير المنتخب بين يدي ابو عشرين
*الاتحاد السوداني لكرة القدم
*هو الجهة المناط بها ادارة وتنظيم وتطوير كرة القدم بالبلد
*في زمن شداد طلعوا قرار بتحديد سقف الاجانب بالفريق في الدوري
*حتي لايعتدي الاجانب علي خانات الوطنيين والنشئ
*تدخلت الدولة
*عن طريق القصر
*القصر الاتحرر ده
*رمز السيادة
*والقصر يعلم ان الاتحاد السوداني لكرة القدم
*هو ريس الموضوع ده
*برغم كدة تدخل القصر واتي ببدعة التجنيس
*وكان الرقم الوطني علي قفا من يشيل
*تعدت الدولة علي خطط الاتحاد العام
*فتعدي الاجانب علي خانات الوطنيين
*منع الاتحاد استجلاب حراس مرمي اجانب
*لم تتعب الدولة في الالتفاف علي هذا القرار
*المراقة قاااعدة
*وتم تجنيس الحراس
*وتعدي الاجانب علي احد اهم الخانات الميدانية والتي يفترض ان تكون حكرا علي الوطنيين
*كي يشاركوا ويتطوروا ويتقدموا
*فكان جمال سالم وصحبه الميامين
*وتقلصت فرص الحراس الوطنيين
*الي ان اصبح ابو عشرين حارسا للمنتخب
*الطشاش في بلد العمي شوف
*ده شوفنا في الخانة دي
*طشاااااش لي بهناك
*فهل يقع اللوم علي ابي عشرين
*ام يقع علي دولة تريس وتتيس؟؟؟؟؟؟
*وقس علي ذلك في كل مناحي الحياة
*تجد رؤوسا ليست سوي تيوسا
*تجلس علي كراسي
*وليس مطلوب منها حتي الاعتراض علي نوعية الكراسي
*وده السبب كلو
*والله يجازي الكان السبب
*لكن ابو عشرين ما السبب
*المهم
*لسة نحنا فيها
*نعتمد علي اخفاق الآخرين لنتتوج بطلا للمجموعة ونمضي لنهائيات كأس العالم
*واذا مرقت انا
*ان شاء الله بطن امي تقفل بعدي
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*المجهجهنا وسبب الفشل الفينا
*اننا بنريس ونتيس يا والينا
*وبنحابي ويمكن تلقي خريج تاريخ جراح يشرط فينا
*وممكن تلقي سواق ركشة
اكتر واحد مؤهل بيننا
*وممكن تلقي وزيرا يجعجع
طول اليوم فينا
*لاقرا معانا لاقدامنا لاورانا ولا زامل زولا فينا
*وتلقي بروف واقف في الصف مزنوق ومكتف بيننا
*وتلقي زملطحي ماشات قدامو ستين سارينا
*بس كيف الحرب ماتجينا
*لكن بركة الجاتنا ونحنا وعينا
سلك كهربا
ننساك كيف والكلب قال مرة مشيت البطري لقيت الدكتور خريج آداب ودكتور البطري شغال نقاش رجعت طوالي
والي لقاء
