الفريق الخطير ..عابدين الطاهر يبوح بالاسرار في العيد :

أنا أصلا معلم ..وشاعر وممكن أكون ممثل!

محظوظ لهذا السبب…وهذه علاقتي باحتراف كرة القدم..!

الصَّفوة -حوار : د. طارق عوض

العسكر ديل عندهم تراتبيه كده بعرفوها براهم خلاف الانجم السماهر التي تزين كتوفهم ..
..
بذكروني العقد النضيد بتاع الجلاد
عرفتك
وكنت زي شفتك
قبل القاك..
..
اي عسكري حتي لو لاول مره قابل زميل ليهو في الميري ..
ما محتاجين جهد كتير للتعارف

سؤال واحد بس

انت الدفعه كم . .؟!

سرعان ما تتري المحبات والمعزات والزكريات والليالي بشقيها الحلو والمر..
..
قمرنا الليله سعادة الفريق عابدين الطاهر حاج ابراهيم خوجلي
..
سيادتو عابدين فطحل لحاله
بوليس سري قديم
وفي رواية اخرى رجل مباحث
ورجل دولة
..
صعب المراس وسهل الايناس
..

شمباتي قح بوليس بامتياز محامي بايجاز

المولد شمبات
والدراسة بشمبات الشرقية والصافية الابتدائية

الوسطي مدرسة بحري الاهلية

الثانوي بحري الحكوميه
كلية الشرطه
تنقل في مختلف وحدات الشرطه
كما نال العديد من الدورات والورش داخل وخارج السودان
..
رياضي مطبوع .. عضو مجلس ادارة نادي شمبات

لديه العديد من المؤلفات
شهادة الزور واثرها علي سير العداله

شمبات الحبيبه خواطر وزكريات تحت الطبع

ربع قرن مباحث .. حوادث ووقائع
..

تعالو نشوف باقي الكلام ..
..

سيادتو عابدين رمضان كريم تصوم وتفطر علي خير

رمضان كريم عليكم وسعيد جدا بوجودي معاكم في موقع الصفوه الالكتروني

رمضان وبس..
..
رمضان شهر عظيم جدا .. الحمدلله انا صمت في عمر مبكر جدا
بتزكر اول مره انا صمت كنت في اولي اوسطي .. قبل كده كنت بصوم يوم وافطر يومين ..شويه شويه بقيت اصوم الشهر كلو وطبعا بداية صيامنا الدنيا صيف وانت تعلم صيف وشمس السودان في ذلك الزمان ما كان في مراوح ولا مكيفات ولا تلاجات لذلك رمضان كان محتاج لقوة وعزيمه زي ما بقولو ودرمضان كان بخش العضم من اول ساعتين مش من اول يوم
…

**سمعنا انك في رمضان زول جرسة جدا..

– جرسة جدا جدا جدا

لكن بتذكر مره صمت في جدة وطبعا الناس هناك بتصلي الصبح .. الليل كلو شغل اكل ..
والنهار ده كلو ينومو .. ف قتليهم والله يا اخوانا رمضانكم ده الا نعيدو
لأنو ما في احساس بالجوع والعطش وكده
انا افتكر من اهم الاشياء في رمضان انو الزول يبذل مجهود ويجهد نفسو لا ده شهر بختلف من باقي الشهور وتحدث الفائدة .. لكن حكاية انك تصوم وما تبذل اي مجهود ما بتحس في فرق وبين الشهور

العبادة دي تعود زي الصلاة لانو من اتعودت علي العبادات من الصغر يصعب على الانسان في الكبر يؤديها..
كل العبادات من صيام وصلاة وحج وزكاه فيها نعم كتيره وروحانيات ونعم كبيرة ..
وتعتز انك مسلم
اذن
علينا في هذا المعظم يتقبل كل الشهداء ويشفي الجرحى من مدنيين وعسكريين وزي ما بدات الحرب في رمضان نسال الحق عز وجل ان ينهيها في رمضان..
..
**أين يكمن سر الهوى في بحري

..
بحري مدينه استثنائية لا يعرف قدرها الا من نشا فيها وترعرع ودائما انا بقوليهم ان الواحد اول ما يدخل تخوم بحري بحس بالأكسجين زاتو والهوى اتغير وفعلا بحري سر الهوى
أنا شخصيا بعشق بحري عشق لا متناهي
ما بجد نفسي إلا في بحري وتحديدا في شمبات
وفي مقولة بتقول تشتغل في الخرطوم وتساهر في أم درمان وتسكن في بحري ..
لانو الهدؤ يسكن بحري وتسكنه
وفعلا بحري سر الهوى
فيها العلاج والدوا
..
بحري هي مرتع صبانا .. ورغم كبر حجم المدينه لدينا زكريات وخطي مشيناها
مدينه تغلب عليها روح القريه
لانو معظم الساكنين فيها هم مرتبطين بصلات قويه مع بعض حتي الوافدين تطبعو بطباعها
وانا شخصيا لما اكون بعيد من بحري بحس بالغربه فعلا
وهنا يكمن سر الهوي وتظل بحري هي هوانا ومبتغانا وسر حبنا
ايضا من المدن التي لها في الذاكره وفي الاعماق مكان مدينة كسلا
اشتغلت فيها تلات سنوات وانا شرطي
تركت في اعماقي ذكرى جميلة بسماحتها وطيبتها واهلها وانا بقوليهم انو اهل كسلا ديل الناس الانت بتغلط عليهم وهم يعتذرو ليك
لذلك نحنا ما حسينا ابدا باننا غرباء عن هذه المدينه لطيبة اهلها ومحبتهم للاخرين واحتفائهم بيهم بالذات الناس البجو يشتغلو في المؤسسات الرسميه بجدو احترام وتعاون من ناس كسلا وما بدوك احساس انك غريب منهم
كسلا توتيل الادتنا كل الحب لذلك نحنا برضو اهديناهم اثناء فترة وجونا هنا
اهديناهم فندق ساهرون ..
وقصدنا يكون هديه حقيقيه لمدينة كسلا وهو فندق شامل فيهو مسرح وحديقة طيور وغزلان وملهي للاطفال وقطاطي علي نسق البيوت الاثيوبيه ..
واصبح الفندق متنفس وبه امان لانو محروس بالشرطه ولذلك كان معظم البعثات بتنزل في فندق ساهرون وكان فعلا هديه وهم بالجد يستحقون..
اهل كسلا تركو في دواخلي انطباع لن انساه ابدا وتمثل ذلك في وداعي وانا طالع من كسلا منقولا لجنوب دارفور
واذكر في تنفيذي للنقل اتصل علي زميلي وصديقي كمال جعفر وهو من ابناء كسلا وهو عارف اني ح امشي نادي الميرغني للصلات بين نادي الميرغني وشمبات لتشابه الشعار والمحبات والصلات المتبادله
..
طلب من امشي نادي التاكا لانو محتاجين ليك وقد كان ..
دخلت كسلا عبر التاكا وتشرفت برئاسة نادي التاكا ووجدت تعاون ومحبه من الناس واتيحت لي فرصه اقعد مرات ومرات مع الشاعر المتفرد شاعر الحب اسحاق الحلنقي ربنا يديهو العافيه ويطراهو بالخير وجلست مع الصحفي الاعلامي المتميز عبدالجليل من ابناء كسلا وعقدنا منتديات عده علي مسرح ساهرون واستمرت هذه العلاقات في كسلا ولعبنا مباريات بين الشرطه وشباب كسلا ..
ذكريات حلوه ومتعدده لن تنسى ابدا
وحقيقي المجتمع الرياضي في السودان مجتمع جميل وكذلك المجتمع الفني لكثافة المثل والاعراف النبيلة
اكثر الناس تواصلا وتعاضدا وتواددا هم الذين ينتمون للمجال الفني وعشان كده كنت حريص جدا امارس انشطتي الثقافيه والاجتماعيه والرياضيه علي المستوي الادارى .
ولعل منتدي النيمه الثقاقي بشمبات شهد تواجدي المستمر ..
منتدي عامر بالليالي الشعريه والغنائيه والندوات ..
لذلك الثقافه ان بفتكر مهمه لوحدة السودان..
..

**علاقتك كيف بالكوره

رياضتنا في السودان تحديدا كرة القدم لم تتطور .. صحيح في محاولات ولكن لم تستمر ..
بتذكر في سنه من السنين كان الاتحاد على راسه نادرإابراهيم مالك وهذا الرجل كان مهتم جدا ومعه نفر كرام من فطاحلة القيادات الرياضيه كانو مهتمين جدا بمسالة الاحتراف وتقنينه في السودان
اتذكر وانا ماشي في مهمه لبريطانيا تتعلق بالتحقيق حول اختطاف طائرة سودانير
كلفوني ناس الاتحاد العام اقف على تجربة الاحتراف في بريطانيا وامدهم باي معلومات يستفيدوا منها وهم بصدد تطبيقها ..
سبحان الله الشرطة البريطانية الانا كنت في ضيافتهم وطلبت منهم الطلب ده
هم تواصلو مع نادي درجة تانية وانتظرنا اسبوع كامل عشان يعملو لي مواعيد .. طبعا الأندية هناك محترفة جدًا
تلقي الفريق فيهو ناشئين وشباب ورديف والفريق الأول
وفي وحدات علاجيه وتسويق
مشيت وقفت علي التجربه والفورمات واخدت منها عينات وجبتها سلمتها للاتحاد العام

لكن المساله مرتبطه بالنظام الكامل للدولة فما تقدر تطبق القصه دي في نادي واحد او ناديين
لازم يكون برنامج وفق قوانين ولوائح تعتمد من قبل الدوله وشروط ملزمه وعقود
كانت خطوة جريئه لكن اصطدمت بمعوقات محلية
كان ممكن تنقلنا للعالميه ولكن
أتمني القايمين علي أمر الرياضة في البلاد الالتفاتة للحته دي..

**قرارك وأنت في مقتبل العمر بالالتحاق بالشرطه

القرار ده كان صحيح ؟

وهل كانت في فكرة لمهنة تانيه خلاف الشرطه..؟!

– شرطة السودان هذه المؤسسه الحبيبه الى النفس ..
اخترتها عن قناعه تامة واتذكر انتظرتها تحديدا لانو كان دائما التقديم لكلية الشرطه والحربيه بتزامنو مع بعض..
كنت شايف اني اقرب اني اكون شرطي
وفعلا قدمت زيي وزي الآخرين ودخلت المعاينات..
اتخذت القرار ده عن قناعه
والحمدلله ما خاب ظني ..
..
ما كان في أسرتنا ضباط في الشرطه عدا ابن خالي العقيد عبد الحميد عبد الوهاب له الرحمة ..
..
وانا اصلا كنت في المدرسه شغوف بكتب الالغاز والمغامرات والقصص البوليسيه بحبها جدًا .. لذلك ركزت علي المجال الجنائي رغم الإرهاق
..
الشرطه ادتتا الاسم والشهره رغم السهر والغياب الا أنها ادتنا الكتير
وانا عابدين الطاهر لولا الشرطة ما كان في زول بعرفني
ومن هنا بحيي كل قادتنا الاماجد العلمونا حب الوطن والشرطة
وتظل شرطتنا السودانيه مصدر فخرنا..
..
قبل الشرطه اشتغلت لمدة سنه معلم وهذه المهنه من المهن العظيمة
ولو ما دخلت كلية الشرطه كنت ح اظل معلم ..
عظمة مهنة التعليم تكمن انك بتغرس الغرس تجد الثمر امامك..
..

**القاهره تكتب
بيروت تطبع
الخرطوم تقرأ
السلطنه دي كان ممكن تسهم في اشباع قصيد الثقافة السودانيه المقرون بالتعدد الاثني..
هل نضب المعين السوداني؟!

– مقولة القاهره تكتب وبيروت تطبع والخرطوم تقراء
مقوله قيلت في وقتها .. الآن تغير الحال .. الخرطوم أصبحت تكتب وتطبع وتقرأ
الشعب السوداني شغوف بالقراءة والأكثر تميُّزا في المنطقة
ولكن بفعل فاعل انهار هذا التميز حتى طال شرطتنا..
ولكن نحن الشعب الاول ف الثقافة وحتي في التعليم كان عندنا حصة المكتبه والجمعيات الادبية ..
الامل لا زال معقودا على الجميع الحل باستغلال التكنولوجيا لاحياء الثقافات المندثره ..
نحنا ناس متميزين جدا

لك ان تتخيل ان عدد الاطباء السودانيين في بريطانيا يفوق التصور…
يوما ما سنعود..

**علاقتك بالدراما كيف ..
ممثل سوداني شايف انو مالي قاشو..؟!

– المسرح السوداني والدراما السودانيه من اعظم مجالات الفن هي الدراما ..
انا بفتكر مشينا خطوات كبيره رغم شح الامكانيات..
انا شخصيا ميال جدا للدراما خاصة الاذاعيه ..
وكنت بتابع وانا طفل بتاع الجرعات الخاصه بالنشء وساهمت بشكل كبير في تشكيل وجداننا ..
كبرنا وبقيت من رواد المسرح
كانت برضو اهتمامات كبيره وانا طالب بالعمل الدرامي وكتبت سيناريوهات وكتبت شعر ولا زلت اكتب في قروباتنا الخاصة واملك العديد من العلاقات مع الشعراء..
أكاد أكون مدمن للمسرح دخلت مسرحيات كتيرة وعدد من المنتديات

وكان ممكن أكون ممثل لولا الشرطة
وكان عندي محاولات لتقديم برنامج عبر إذاعة ساهرون والإذاعه الرياضية باسم من الأعماق
ولا زالت الفكره قائمة..
وتحضرني طرفه خلتني أنتبه انو عندي صوت مفروض استثمرو بتزكر ايام التلفونات وطبعا الخطوط كان بتتشابك ترفع السماعة تلقي في اتنين بتكلمو يا خت السماعه ياخ انا ضربت قبالك وكدة

مره في اتنين مشتبكين مسافه قلت يمكن واحد فيهم عاقل أخت السماعه وما حصل
فقمت اتدخلت وقتليهم يا اخوانا واحد فيكم يتنازل لانو كلنا عايزين نتصل .. قام طوالي اها العامل مشكله ده قال محمد خوجلي صالحين ده جانا من وين
وكتير من الناس بقولي لي صوتك اذاعي والمفروض ترتاد الاذاعه

لذلك أنا ما زلت والله أعيد التجربه
برنامج ونسة كبار بس ما واصلت لأنو غادرت السودان

**زول سوداني
بغض النظر عن شكل محتواه الفكري ..
كنت بتعتقد انو ممكن كان يلعب دور في رقعة الشطرنج السودانيه ….
– ده سؤال كبير جدا ..
بفتكر رموزنا السودانيه ابلوا بلاء حسن
وكان ممكن يكون اكبر في اعتقادي
سياستنا الخارجيه حصل الكثير من التخبط مما اثر بشكل او اخر في حالنا اليوم ..
انا ما سياسي بتوصية من الوالد انو ابعد السياسه قدر الامكان
لكن لو جاز لي الاجابه على سؤالك
هم كثر
عبدالله خليل واسماعيل الازهري والصادق المهدي والسيد عبدالرحمن المهدي والسيد علي الميرغني ومحمد احمد مححوب ومبارك زروق وفي العهد القريب منصور خالد ومن المهنيين غازي سليمان د حسن الترابي اخدتو السياسه مفكر ومتحدث لبق كان ممكن ادينا اكتر واكتر لولا السياسي ..
كمان كنت دائما بقول انو الرحيل المفاجي للسيد الصادق المهدي اثر في دولاب الدوله لانو زول مرجع وهادي للطريق ومجيد في راب الصدع.

**أبو حامد الادروبي. القح كتب سال من شعرها الذهب
البوليس الزمن ده وين الناس الجميله دي..؟!

..
– الغنا والطرب والشعراء ..
انا شمباتي .. وشمبات زاخره بالفن .. اولاد شمبات عوض وابرهيم شمبات والاستاذ خضر بشير .. وثنائيته ومحمد بشير عتيق رحمهما الله..
في الشرطه عندنا ابو حامد سال من شعرها الذهب فتدلى وما انسكب كلام عجيب..
العسكريين الناس كانو بفتكروا ما عندهم علاق بالفن ولكن تجد ابراهيم احمد عبدالكريم قائد فذ واديب رائع لا تمل الحديث معه كان قائدنا في المباحث المركزيه كان اخ وصديق ومعجبين بيهو جدا وكنا محظوظين جدا
طبعا كلمة محظوظين دي فيها قصه ..
المغرضين قالو عابدين الطاهر ده محظوظ جدا بحقق نجاحات كتيرة وطبعا كنت بزعل جدا لكن في النهايه اكتشفت اني فعلا كنت محظوظ بعد ما نزلت المعاش لاني اتيحت لي فرصة عملت تحت قاده مبدعين فنيا وثقافيا ومهنيا وزملاء مميزين لا يردون لنا طلبا وكنت محظوظ لتميز ابنائي في الحياه كلهم اتخرجو من جامعة الخرطوم وده قمة الحظ والتوفيق

..
**معركة الكرامه .. الغزاة .. البطوله والثبات
خوار البنيه التحتيه
موت دنيا
دمعة خد
ده شنو البحصل ده ..؟!

السودان الوطن الحبيب عندما نشاهد الذي حدث من خراب ممنهج
المؤلم ان الحرب الحصلت في السودان لم تحدث في اي مكان في العالم علي مر التاريخ..
وظل العالم يتفرج علي السودان
حتي من قدم لنا الاعانه قدمها علي استحياء
ايادينا مددناها بيضاء ولم نجد رد لجميل عطايانا ..
.
معلوم دويلة الشر والعاقين من ابناء الوطن الخونه اللئام ..
الشعب السوداني لن يغفر جرمهم
حرقوا مؤسسات الدوله القضاء ودور الشرطه والمصانع وبنك السودان والوزارات لكانهم ارادو محو هويتنا ..
سيقتص منهم الشعب يوما ..
قتلوا واغتصبوا ونهبوا..

**رساله لقواتنا المسلحه وشرطتنا وامننا ومشتركتنا والبراوؤن
ولكل من نذر الدم والاعراق في سبيل الوطن ..

…
اقول لكل هذه القوات .. اعطيتم وما استبقيتم شي .. أنتم مؤسسات شعب السودان ..
سيرو ..
ضعو الخطط وتعاضدو .. السودان يحتاجكم
استعينو بخبرات المقاعدين من ضباط القوات النظاميه .. القوانين موجوده .. فقط فعلوها ..
ومن ثم احترام القوانيين ..
..
إذا أردنا ان نبني دوله قويه علينا باجتثاث الفساد من جذوره..
وعلي بني وطن رفد القوات بالثقة
نحن الآن نعيش حِقبة ما قَبل الإعمار ..
لا بد ان نفعل مؤسساتنا العدليه لتمكين الشعب السودان من التعويض المجزي..

** شكرًا معاليك ..

..
– شكرا موقع الصّفوة” الالكاروني واتمنى أن ألتقيكم مُجَددًا.