بابكر سلك
أول مرة تحصل.
كورة في استاد القاهرة.
طرفها الأهلي.
ومصر كلها تسخط على التحكيم.
دليل عافية.
عافية للتحكيم الإفريقي.
الحكم تشادي.
لدرجة في مرحلة كدة، شكيت إنو الحكم ده داير يكفر عن فضيحة تشاد وتآمرها علينا.
المهم…
المدرجات تصرخ:
“الله يخرب بيتك يا حكم!”
المصريون في الكافيهات، كشحوا القهوة وهم يصرخون:
“هوا جالنا من فين الراجل ده؟”
الخطيب قال لمقربين منو:
“مش مصدق اللي بيحصل ده!”
كولر دقَّ لغة لمن مترجمه ذاتو ما فهم حاجة.
الجهاز الفني للأهلي قالوا:
“الحكم ده أكيد مسحور، لازم نبعتو الحسين!”
نحنا ذاتنا ما مصدقين!
بوغبا ذاتو بقى زي الما فاهم حاجة.
بوغبا ما صدق!
هرج ومرج وهتافات ضد الحكم التشادي.
والحكم بجازو، ما شغال ليك بزول الشغلة!
ماسك في جازو قوي، نسوي ليهو شنو عاد؟
الزول اختار الانحياز لي جازو، هذا ما أملاه عليه ضميره.
أيها الناس…
الأهلي في أسوأ حالاته.
ليهو مدة كعب.
ما كان محتاج خندقة قدر دي!
وما كان محتاج تحكيم دقيق ومتابع وتشادي للدرجة دي!
فقط كان محتاج ثقة بالنفس، ويتغلب زي السلام عليكم.
ما ممكن تكون مفكر تجيب قون، وخاتي روفا برة!
أمال البيلعب باص القون منو؟؟؟!
ويلعبو لي منو ذاتو؟
مادام مزمل خالي خط طمنتاشر الأهلي، وساكن سكنة في خط طمنتاشر الهلال!
غايتو فرصة لن تتكرر!
تاني الأهلي بالسوء ده؟ خمسين سنة ما أظن نلقاهو!
طيب…
أسِّي الحل شنو؟؟؟
لازم الهلال يجيب قون في موريتانيا على أسوأ الظروف.
طيب…
يجيب القون كيف؟
يطلع من الخندق ويمشي قدام.
لو طلع من الخندق، والموية كسرت، وملت الخندق، القصة تبقى كيف؟
غايتو فرصة وراحت… وإن شاء الله في كورة الرد، الاتحاد الإفريقي يجيب حكم زي ده، بي جازو وما شغال بالاتحاد الإفريقي وين!
لكن الفرصة في… المهم…
الهلال والأهلي
البِتأهل منهما والبطير، الاتنين حظوظهم لقدام صعبة شديد من واقع الحالة الهم فيها، ويكاد يكون الهلال أفضل، لأنو ما أسوأ من الأهلي إلا الأهلي!
أها…
نحنا إعدادنا ماشي كيف؟؟؟
طيييب…
أيها الناس…
“إن تنصروا الله ينصركم!”
أها…
نجي لي شمارات والي الخرتوم!
كان شفت يا والينا، لو دايرين نبنيهو بحق، نعليهو ويعلي بينا، لازم تتوحد الجهود، وتتلاقى قلوبنا وأيادينا!
سلك كهربا
“ننساك كيف والكلب قال الحكم ده ماسك جاز، ما فاضي لي زول، عامل قدومو ده!”
وإلى لقاء…
سلك
