اسي النمير كان مشى

بابكر سلك

*موضوع فتحو القيصر ناصر بابكر
*تناولو العالم ياسر العمدة
*تداخل فيه فطاحلت الفهم الاداري
*اتخفنا مولانا شنداوي بمداخلاته العلمية
*وشارك الحبيب محمد يوسف
*وعلق بسخرية علي البرنامج الانتخابي لاحد المرشحين لما قال برنامجو الانتخابي يعمل سلك شايك حول الاستاد
*سلك شايك؟؟؟
*لا
*ننساك كيف والكلب قال
*المهم
*انا شخصيا الموضوع وجع قلبي
*الموضوع هو موضوع المريخ
*العمل الاداري الغير استراتيجي وغير مدروس
*بحثنا عن الرئيس العندو قروش
*تحجر الفكر وثباته الطويل متقوقعا في الفهم الاداري القديم
*الذي يعتمد في تسيير امور النادي علي التبرعات ودخل المباريات وكتابة الشيكات لحل الاشكالات ثم حل اشكالات الشيكات بالتسويات
*ونظل نبحث عن الرئيس العندو قروش
*والرئيس العندو قروش لو بقي نبي مابزرع لينا شجرة صندل من حر ماله لنجني ثمارها عطرا فواحا بعد خمسين سنة
*ويكون زمن الحصاد ليس في عهده
*لذا ماجانا رئيس فكر في الاستثمار للنادي ولصالحة
*فسكنا جيوب الرجال
*اتفه سكن
*بدينا كنتين
*لكنه كان عملا تجاريا مناسبا في زمنو
*تطور الامر في كل الدنيا واصبح اسواق ومجمعات ومولات مذهلة جاذبة تقدم الخدمة والسلعة والدهشة
*ونحنا مصرين علي كنتيننا نلتق فيهو ونحاول تثبيت الراكوبة العاملنها مظلة قدامو بشعبة جديدة وعود تليد
*وبعد ده دايرين ننافس المولات في الجاذبية ودايرين نحقق ارباح اكتر منها
*ونحلم بالاميرة السمراء
*اسي دي ما احلام زلوط ذاتو!!!!!
*ظلوط ذاتو لو شاف طريقتنا دي واطلع علي احلامنا
*كان قال لينا بالغتوا يا اخواننا
*ان لم نضع استراتيجية واضحة المعالم
*ولم نتبع علمية ومنهجية في الشأن الاداري
*وانشأنا استثمارات للنادي تخرجه من جيوب الرجال
*سيظل كنتيننا مشرعا ابوابه الخشبية العتيقة
*نمسحه كل موسم بزبالة حمير تقيه شر الانهيار
*وتقف الارفرف المتسخة الخاوية من البضائع شاهدا علي فشلنا في ادارة كنتيننا وتطويرة
*وسيستمر صراع السلطة بين الكيمان
*ويتحول لصراع الأسر علي حكم المريخ
*ولا استبعد ان تكون معارك السيادة عندنا بين اسرة آل دقلو واسرة آل بغلو وآل صبروا يمشوا يشوفوا ليهم نادي تاني
*ويصبح أخيرًا حتي الكنتين مجرد اطلال
*وحتي الأطلال سنعجز عن الحفاظ عليها كأثر تاريخي
*نحنا فشلنا في اكتشاف آثار حضارتنا وفشلنا في الاحتفاظ بما اكتشفناه منها
*نحافظ علي كنتين؟؟؟
*لذا
*سيكون الامر كذلك مالم نتبع منهجا علميا ونتبع استراتيجية مدروسة ونعتمد علي الكفاءات من ابناء المريخ الاوفياء
*موش كلو كوم جايب ليهو ناس ساي تامي بيهم المجلس
*ياخ ده كلو خليهو
*النمير ده كان مشي نودي وشنا وين؟
*حتقول لي حواء المريخ ولود
*برضو رئيس عندو قروش؟؟؟
*حواء المريخ دي مابتلد رئيس عندو استراتيجية وفهم اداري يبذله في النادي لاجل النادي لا لأجل تجميل صورته في المجتمع؟
*مابتجيب رئيس يفكر في جمع الشمل والكفاءات لوضع الخطط والاستراتيجيات؟
*واولها كيف يجلب الكيان المال
*يجلب لا يحلب
*كيف يخرج الكيان من جيوب الرجال الي آفاق الاستثمار؟؟؟؟
*حوا
*حواء المريخ
*حوتنا
*شدي حيلك واسعفينا
*اها
*البتأهل من الهلال والاهلي بصل النهائي
*لانو الاتحاد الافريقي سيحرم الترجي وصن داونز من الجمهور بسبب ماحدث من جماهيرهما في المباراة الاخيرة
*لكن براميدز قاااااعد
*براميدز لاي زول
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*شكرا مصر الرفعها جمهور الهلال كانت بتعبر عن الوعي الفينا
*ماكانت كسير تلج يا والينا
*لكنها عبرت عنينا
*وتعظيم سلام لجمهور الهلال وللوعي الفينا

سلك كهربا

ننساك كيف والكلب قال اسي النمير كان فات تاني نعلب الفات الفات وفي ديلو سبعة لفات والعسكر واقف طابور وعمي علي بياع الزيت عربيتو مربوطة بخيط

وإلي لقاء

سلك