بابكر سلك
*داير أتناول الواقع الفني للمريخ
*ولأني ما زول زول
*ولا حجر بكوم من الكيمان الطلعت (عيننا)
*داير أتناول الأمر براااحة كده
*حتى كوني مريخابي قرفان من حال ومستوى المريخ الحالي
*ما حا أخلي الحاجة دي تؤثر على تناولي للموضوع
*أيها الناس
*قصة الإحلال والإبدال والفشل ما دايرين نرجع ليها
*بس نقيف شوية عند أودجو والجمل
*فكّينا ود المصطفى (بناءً على رغبته) وجبنا أودجو
*والراجل بدا معانا زي الككو
*فجأة اتدهور فنيًا
*وفجأة استغنينا عنو بالتراضي
*لنأتِ بالجمل بما حمل من سنين عتيّة
*وحتى الجمل بدأ معنا وكأنه حاشي
*نشيط وخفيف
*وسرعان ما برك
*بركة عدوك
*حتى ناسنا في المنتخب
*مع المنتخب تدي ربك العجب
*معانا تقول الناس ديل ياربي ياهُم ولا تشابه أسماء؟
*القصة دي دحين ما بتثير سؤال؟
*ليه مستوى اللاعب في المريخ بمشي بالنازل؟
*والحكاية دي مردّها لواحد من اتنين
*سوء توظيف فني
*أو سوء إداري يجعل الجو بكوكب المريخ غير صالح للحياة
*الأولى أنا بستبعدها
*لأنو حتى التوظيف لو كان به سوء
*فإن الروح لا علاقة لها بالسوء الفني
*إذن الاحتمال التاني هو الأقرب
*طيب ليييه؟؟؟؟
*هل أُحادية وفوقية القرار هي المشكلة؟
*أم قلة خبرة أهل الشأن هي المشكلة؟
*ده كووولو خليه
*شفتوا أداء قلب الدفاع والجُمبو؟
*واحد يجلي وواحد يصرج وواحد التقول ما عندو راس
*كورة بي فوق دي ما بكلف نفسو حتى رهق الدفاع بالنظر
*وده بطرح علينا سؤال
*لما استغنينا عن كرشوم وبخيت وحتى حمزة داؤود وغيرهم من المدافعين
*ما كان الأجدر نستبدلهم بمستواهم أو قريب ليهم على أقل تقدير؟
*ياخ لو عندك شجر عمره الافتراضي انتهى زي لبخ شارع النيل
*قبل تقطعو بتزرع شتلات جديدة يربن تحتو
*عشان لما يشتد عودهن تقدر تقطع الشجر الكبار وهن يكونن حلاتن رامن ضلهن
*لكن اكسح امسح حتى تفكر في البديل من الشتلات
*وكمان تقطع مهوقني ولبخ وتك وتزرع نيم يغازل دقن الباشا وداير شارع النيل يبقى سياحي؟؟؟؟؟
*المريخ ده فيهو غلط
*من الناحية دي ما في نقاش
*والغلط نتاج نشاط إنساني متوقع
*تصيب أو تخطئ
*يبقى الغلط ما غلط
*الغلط هو الاستمرار في الغلط
*إلى متى يستمر هذا الغلط؟؟؟؟
*قلنا إعداد
*لكن هل ينفع؟
*إعداد بدون عداد؟
*بدون سجلات ومؤشرات صعود وهبوط المستوى؟
*بربكم لو عسكرنا في المالديف سنتين
*قلبا الدفاع ديل وحراسة المرمى والطرفين (عدا عجب) ورهط من الذين يتلاعبون بالوسط والهجوم
*تفتكروا بعد سنتين بنقدر نتخطى التمهيدي؟
*خليه التمهيدي
*داخلياً بنقدر نتأهل لتمثيل السودان أفريقيا ولو بالجعرانية؟؟؟؟؟
*ده ضياع تاريخ وضياع زمن
*ما داير أقول ضياع مال
*لأنو نحنا لعب الخمسين بنعرفو ولعب المليون بنعرفو
*ثيردباك ضعيف في الراسيات
*وما بخت الكورة في صدره
*ده روابط ما بلعب
*ولكنه زمن اللعب بالمريخ
*لكصر؟؟؟؟؟؟
*معقولة ياخ!!!!!!!!
*غايتو مدافعينا ديل متعاونين
*متعاونين مع مهاجمي الخصم
*متعاونين عديل كده
*والمتعاون أخطر علينا من العِدّة ذات نفسها
*يا ميشو
*العب لينا بالشفع الموهوبين
*ناس موسى وعنتر وأسد
*اتغلب يومي
*بنعتبره إعداد
*وزي العسل على قلوبنا
*بالطريقة دي الضحية القادمة ميشو
*ويقعد الغلط الجايب الغلط
*وهمسة في أضان ميشو
*زماااان يا ميشو
*بدري الكلام ده
*أيام عمك هافي زلاتان زاموفيتش كان حي
*كان في فريق اسمو الزمالك
*فيهو مدافع نار منقد
*اسمو إسماعيل يوسف
*أخو إبراهيم يوسف
*لما كبر حركتو بقت بسيطة
*لكن الكورة في الراس في
*قام المدرب وظّفو محور ولم يُوكَل إليه أي مهام هجومية
*زبط النص ده لما طقطق
*حايم قدام الدفاع زي الكلب
*وبدأ رحلة تألق جديدة في المركز الجديد
*أمير كمال ده يا ميشو احكي ليهو القصة دي يمكن نبدأ معاه عهد جديد من النجومية
*غايتو كان ده إعدادنا
*الترابة في خشم أعيادنا
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*واحد بحكي لينا
*قال حلمان إنهم شلة قاعدينا
*بس أشوف ليك دُرمة جاي علينا
*قال كلنا جرينا
*نحنا البحكي لينا
*ذاتنا جرينا يا والينا
سلك كهربا
ننساك كيف والكلب قال كان جاتكم الطاوية حبالها الجري بحلكم؟ دُرمة زول واجب
وإلى لقاء
سلك
