باكر سلك
طلوع القرار في المريخ أسهل من خروج الكلب من البيت،
عشان كده القرارات كتيييرة،
والسبب إنها مستعجلة وغير مدروسة،
تلفح توبها وتطلع مستعجلة،
تام باقي لباس التوب في الشارع،
ولما تصل للجارة القاصداها،
يادوب تخت توبها في راسها،
عجلة،
وفي العجلة الندامة،
وبالموتر الحوامة،
قرر مجلس المريخ إقالة ميتشو أو قبول استقالة ميتشو،
كلو واحد،
زي لما تقول ميشو وميتشو،
والمُحيّرني هو متين جا؟
ولما جا، هل جابوه بعد دراسة وقناعة؟
ولا خموه ساي وخمانا هو؟
وهل أسباب مواصلة تدهور فريق الكرة بسبب كيس ميتشو الفاضي؟
ولا بسبب نوعية اللاعبين العندنا؟
ولا بسبب سوء إدارة اللاعبين؟
ولا بسبب قلة الخبرات، لأنو خبراتنا كلها يا مشت براها يا مشيناها برانا؟
ولا السبب شنو؟؟؟؟؟
على كل،
شوقي غريب،
هل قرار تعيينه تم بدراسة دقيقة؟
ولا تم على طريقة “كان ما لقيت بامية جيب بامبيي”؟
بصرف النظر عن الأندية التي قام بتدريبها غريب،
حقق معاها شنو؟؟؟
وكفاءة الرجل شنو؟
وهل كشفنا به من اللاعبين ما يمكن أفضل مدرب في العالم من صنع فريق له شخصيته؟؟؟
لن أحكم على قرار تعيين غريب،
حلو الحكم في خشيم سيدو،
ولكني أخاف من يوم تلتقي فيه حناجرنا ونحن نشدو: يا غريب يلا لي بلدك
والبخوفني أكتر في الوقت داك،
أن يكون رد غريب:
إنتوا اليلا لي بدكم جاتكم البلاوي
ثم يقضم فحل بصل ويقرمش قائلًا:
آل الكلاكلة آل
المهم..
أخاف أن تستمر سياسة عزيل التمر عند انتدابات المدربين واللاعبين،
كلما نقرم تمرة نلقاها مسوسة،
نجدعها ونقرم غيرها،
وخيرها ما بكون في غيرها،
طالما اختيارنا لغيرها لم يتم بناءً على منهج ودراسة، واستفادة من ماضٍ أضحى مستوانا معه مخجلًا جدًا،
بالطريقة دي خيرها عمره ما حيكون في غيرها.
أيها الناس،
غيرنا مدربين،
غيرنا لاعبين،
غيرنا دائرة كرة،
والحال ياهو نفس الحال،
حقو نغيّر الدور دا ما لم نغيّره طيلة فترة السوء التي استمرت طويلًا،
ندوس كلتش،
وندبل الكلتش،
ونغيّر،
نخت نمرة خمسة،
يا مشت وفتحت تمام،
يا حتّينا الجربوكس وارتَحنا من عناء مشوار فشلنا في أن نخطو أولى الخطوات فيه.
مصرنة المريخ هردت مصارين المريخاب،
الله ينهي الحرب دي لنسودن المريخ ونبدأ من الصفر.
أيّها الناس،
إنْ تنصروا الله ينصركم.
أها
نجي لي شمارات والي الخرتوم،
كان شفت يا والينا،
كل البحصل ما هامينا،
ربنا قبل دعواتنا وحقق أمانينا،
موش كنا بنقول إن شاء الله تتدكك وتتشكك وتتوزع من جديد يا والينا؟
أهي اتدكت واتشكت وراجين التوزيعة،
إن شاء الله جوكرين وورق قافل يجينا،
غايتو لو قالوا لينا ورقكم زايد وحرقنا يا والينا،
تاني عشرتنا ما بتيجي لا بعد زمن ولا بعد حينًا،
والله يحيينا.
سلك كهربا
ننساك كيف والكلب قال: اتدكت واتشكت وطلعتوا (ديس)
وإلى لقاء
سلك
