بابكر سلك
بناء فريق الكورة بنادي المريخ
بقي زي السودان سلة غذاء العالم
كلام للاستهلاك وبس
لا استفدنا حتى من حصة المياه بحسب اتفاقية مياه النيل
لا زدنا الرقعة المزروعة
لا استثمرنا على مستوى الدولة في الزراعة
لا عملنا على زيادة إنتاجية الفدان
لا طلعنا من الاعتماد على الأمطار في الموسم الزراعي
مطرة جات نزرع تبش وبطيخ وعونكوليب
مطرة ما جات نقضيها ونسة للحول
ونتفاصح
نحن سلة غذاء، العالم
لأننا نملك هكتارات من الأراضي الصالحة للزراعة
وكل يوم تقل تلك الهكتارات للبوار وللزحف الصحراوي
ونتفاصح برضو
وحنبنيهو البنحلم بيهو
والبنا اللقيناهو فيهو بشتناهوا بالإهمال وعدم الصيانة
ونتفاصح
ده نفس حال البنا في المريخ
لينا سنين بنبني
الغريبة، قدر الطوب الببنيهو مجلس
يجي المجلس البعدو يهدو
عشان يبني من جديد
ومرات الهدّاهو ما بعيد تشييدو
نحنا كده
كان إدارات أو حكومات
الهم الأول للمجلس أو الحكومة الجديدة هدم بنيان السابق
ثم بعد ذلك التفكير في بنا جديد
فيها يبدأ وفيها ما يبدأ
لنعيش من جديد على الأطلال وإنجازات جيل مانديلا
ونخفف على روحنا بعبارات منهزمة
القادم أحلى
يمرض ولا يموت
هو الموت ده كيف؟؟؟؟؟
فريق البطولات لا يصنعه إلا مجلس بطولات
أما المجالس على شاكلة مجالس الفول فولي
دي لا هي مجالس بطولات ولا بتصنع فريق بطولات
وفريق البطولات يختلف عن فريق بطل
صناعة فريق بطل غير مرهقة
تستجلب محترفين تقال
أجهزة فنية عالمية
معسكرات مكلفة ونوعية
تشيل الكأس مرة
يتفرتق بنيانك القديم للتكاليف الباهظة
والموسم البعدو تطير من التمهيدي
لأنك صنعت فريق لبطولة واحدة
أما فريق البطولات
فهو المتواجد دومًا في النهايات
لا يغيب عنها نهائيًا
لأنه عمد إلى ذلك
مستوى المواهب
عمر المواهب
تدرّجها
توظيفها توظيفًا صحيحًا
استقرار للأجهزة الفنية والإدارية
اتباع العلمية
السير على نفس النهج في حال تغيير المجلس
وحاجات زي دي
لذا نحن لا نبني ولكن ندّعي
والجالوص عمره ما شال لي فوق
وللأسف تكلفة ما نخسره في الجالوص سنويًا
عليها زيادة بسيطة ماليًا
وزيادة وعي كبيرة وعلمية ومنهجية
يمكن ببساطة أن تصنع لنا فريق بطولات
وإلى ذلك الحين، خلونا مع سلة غذاء العالم ونحن نستورد القمح لنستر به عوراتنا في إدارة بلدنا
أيها الناس
إن تنصروا الله ينصركم
اها
نجي لي شمارات والي الخرتوم
يا والينا افتينا
رأيك في بلد تغيّر غرض أراضي زراعية لتصبح سكنية يا أخينا
وبلد لا تستفيد من عائد البترول في الاستثمار الزراعي لينا
نزرع أب سبعين ونستورد قمح يأوينا
ده يسموهوا شنو يا والينا؟؟؟
سلك كهربا
ننساك كيف، والكلب قال: “أنا خايف يوم القيامة كتير من أراضيكم الخصبة تسلموها بكر وتحرجونا”
وإلى لقاء
سلك
