بابكر سلك
*كلك واري اللو
*يقول الواقع اننا وغيرنا من الأندية في السودان
*نبحث دوما عن الرئيس العندو مال
*والرئيس العندو مال طبعا بدوره يبحث عن المكانة الاجتماعية المرموقة والشهرة والمجد الشخصي لا مجد النادي
*فما يقدمه لايخرج عن دائرة الاعلان عن نفسه في المجتمع
*ولما يجي الرئيس المغندل لسدة حكم النادي
*سرعان ماتلتف حوله حاشية من اصحاب المصالح
*قد يكون بعضهم من حاشية الرئيس الذي سبقه
*فهم شعب كل حكومة طالما الحكومات الهشة تقربهم وتقوم باعاشتهم
*منهم من يقبل بالفتات
*ومنهم بطون لابتشبع لابتحمد الله
*ويقوم الريس بجماعتو ويقعد بجماعتو
*والحال ياهو نفس الحال
*هتيفة وطبالين واقلام تعاني سلس الحبر تفرغ الدوايا
*وتفرغ النادي من طموحه وتغرز اليأس في نفوس المحبين
*الرئيس العندو قروش طالما استفرد بالصرف طبيعي ان ينفرد بالقرار
*وحكي لي احد الاداريين القدامي
*قال لي في المجلس بكون معانا عضوين تلاتة من المفلهمين الكلامهم كولو اعتقد وافتكر ومبادئ النادي والوجدان السليم والخطة الموضوعة والهدف المنشود
*ولما يكون في قرار دايرنو يطلع لكن المفلهمين ديل باقيين لينا في حلقنا
*بنطرح الموضوع في الاجتماع كآخر جند
*بعد بداية نقاشو نتعلل بان الوقت قد مضي ونواصل مناقشة الموضوع في الاجتماع القادم
*ثم نثير موضوع حوجة النادي لدعم مالي سريع
*ونقترح مثلا خمسة الف (الالف كانت الف) تبرع من كلو عضو يجيبها كاش الاجتماع القادم
*ونحدد موعد الاجتماع
*وبالطبع يغيب اهل الفلسلفة والمبادئ عن الاجتماع لانهم ماعندهم المبلغ
*فيتوارون خجلا
*وتتواري معهم الخطة والمبادئ
*ونطرح الموضوع ونمرره
*تخيل ده اسلوب الادارة في نادي مولود سنة تمنية القرن الفات
*الافكار والخطط والقيم والمبادئ تتم محاربتها من الداخل
*الفقرة بي مالها تهزم الفكرة العدمانه المال
*ومن وقتها نحن وغيرنا نبحث عن العناقر الكبيرة ونكتفي بدور الحاشية
*نطبل للعنقرة ونصفق للفقرة
*حتي من يانس في نفسه الكفاءة لدخول مجلس الادارة
*لايتجرأ علي ترشيح نفسه مالم يضمن فقرة كبيرة وعنقرة غليييدة ستترأس المشهد
*فينسق معها قبل الترشيح
*هكذا تأتي المجالس
*الجمعيات الانتخابية في ظاهرها شئ وباطنها غير
*بيع عضوية
*استجلابها كالبهائم في موسم الاضحية
*وجل الاهتمام كم راس
*العضوية بالراس
*قطعا تختلف عن العضوية ام راس
*لكن العضوية ام راس راسها قوي
*مادايره تفعل نفسها لترفع من مستوي جمعياتنا العمومية وتقضي علي العضوية بالراس
*وحتي عضوية الاندية الحالية لا اعتقد انها خالية من العيوب والتشوهات برغم الشعارات المرفوعة
*ممكن تقابلك لجنة عضوية بتلعب بالعضوية عادي
*زولي وزولك هي اساس مهم في التجاوز والتحايل
*وممكن يكون المبرر واهي
*فلان ده او فلانه دي ماعندو او عندها عضوية لكنه مريخابي معروف او لكتها مريخابية معروفة ونحنا دايرنو او دايرنها يدخل المجلس الجديد او تدخل المجلس الجديد عشان النادي بستفيد
*تنضرب العضوية (لعدم الامانة وانعدام الشفافية)
*ويدخل من ضربت له او ضربت لها المجلس
*ولايقدم الا لنفسه في السيرة الذاتية انه كان عضو مجلس بالنادي الهامل ده
*ايها الناس
*الاوجاع كتيييرة قد نجد براحات لنشكي عنها بالتفصيل وبدون (غتغيت)
*لكن ماذا يضير الرئيس ابو فقرة من دعم الفكرة؟
*حتي علي المستوي الشخصي دعم الفكرة بضيف ليهو
*جميعنا يتحدث عن الاستثمار
*وجلنا يقترح المشاريع
*وجميعنا نسي ان اول خطوات الاستثمار
*هي استثمار النادي لعقول ابنائه من مختصين في شتي المجالات
*لان الاستثمار في العقول هو الاستثمار الحقيقي الذي تقوم عليه جميع اشكال الاستثمار التي تنهي اشكالية التطور وتغيير النادي للمواكبة والعالمية بدل نقعد ندير شأننا علي طريقة ادارة فريق الحلة
*نلمهم يوم الكورة الظهر
*نأكلهم باسطة
*ونوديهم الليق
*ونقول عملنا معسكر ناجح
*ايها الناس
*الرئيس الناجح هو الذي يستفيد من موارد النادي البشرية ويستثمر في العقول المتوفرة لديه
*خلاف كدة كولو لاحق بعضو
*وكلك واري اللو
*بالطريقة دي التمهيدي الجاي بنستمر ولابنطير؟
*بنطير
*الله لي ولا فلاي دبي؟
*فلاي دبي
*اسسوسا اسسوسا ولا تزلقك موزة؟
*تزلقك موزة
*كلك واري اللو
*أيُّها الناس
*انْ تنصروا الله ينصركم
*نجي لي شمارات والي الخرتوم
*تعرف يا والينا
*السؤال الحايص لينا
*الهوية
*هويتنا يا أخينا
*لا لمِّينا في رأس أفريقيا
*ولا مسِكنا في ضنب العرب
*ولا بكوشيتنا اكتفينا
*اعزفوا لينا علي وتر سودانويتنا يا أخينا
*عشان نتلم والعالم كولو يشهد لينا
*هويات التلصق زي الطين ما بتبقي نعال لينا
*وما بتقدمنا وما بتمشينا
سلك كهربا
ننساك كيف والكلب قال لو تعرفوا عمق سوداني مابتتشرفوا بهوية غيرها
وإلي لقاء
سلك
