بابكر سلك
*في مصر دي
*ما حِلّ ما عينك تقع
*تقع ليها على لافتة كبييييرة
*البُنّ البرازيلي
*طبعًا إخواننا المصريين، إن شاء الله الجاتنا تختاهم
*ما شاء الله
*مية وأربعين مليون غير اللِسّة ما طلعوا ورق
*المية وأربعين مليون ديل
*عندهم مية تمانية وتمانين كافيه
*جبنات على الريحة، وبوش (بكسر الواو)، وبدون وش (نفس الكسرة)
*مغلية، سُكر مظبوط
*سُكر على الريحة
*طبعًا أي سوداني برلوم نُزوح، أوّل مَقلب بِقَع فيه بكون في كافيه
*طبعًا نحنا ناس جبنات وركلسة
*عشان كدا أوّل خُطاوي الغُربة (بعد أن نَسكن إليها)
*بتكون للكافيه
*قبال تقعد زي الناس.. يجيك الجرسون
*تاخد إيه يا بيه؟
*لو داير يعمل فيها بتكلم لغات
*بقول ليك: تشرب إيه يا زُوول؟
*بضموا (الزا)
*تطلع “زُوول” من (بُؤّهم) زي السُكر
*لكن في غالب الأحيان بقول ليك:
*خت إيه؟
*المُهم
*تقول ليهو: قهوة
*يقول ليك: قهوتك إيه يا زول؟
*تتلَعثم
*بِفهم إنّك ما فهمت
*يقوم يقول ليك: بوش ولا من غير وش؟ سادة ولا مغلية؟
*وعشان يسهّل ليك، بقول ليك: السودانيين بِحَبّوها مغلية، لأنها شَبه القهوة السودانية
*تقوم تقول ليهو: خلاس جيب مغلية
*يقول ليك: سُكرك إزاي؟
*طبعًا السوداني كَثافته بتكون جَات
*سُكر عادي
*يقول ليك: يعني على الريحة؟
*تَحمر ليهو، وشَنبك يَرجف
*يقول ليك: ولا سُكر مظبوط؟
*طبعًا نحنا شعب أي شي بنحبّو مظبوط
*قبل يكمل كلامو
*ينُط السوداني ويقول: أيوة، سُكر مظبوط
*يجيب ليك القهوة في ثانية
*ما زي ستات الشاي عندنا
*تقعد في البنبر، تطلب جبنة، تجيبها ليك بعد البن يصل من الحبشة
*بس البصيرنا كوز الموية اللّما تقعد في البنبر، بِقعد مع قعدتك
*ست الشاي، جِنّها وجن تقعد ليها في البنبر ساي
*زي ناس الكافيهات في مصر
*عندهم نفس الجِنّ
*المُهم
*القهوة أم سُكّر “مزبوط” الطلَبتها
*بتجيك
*تاخد رشفة
*(تتفها) وين ما تعرف
*مَرّة مَرّة مَرّة (بضم الميم)
*يا زُول، قهوتك دي مِسيخة؟
*يا عمي إنت الأولت؟
*يا زُول هُوي، أنا ما أولت مِسيخة
*أولت: سُكر مظبوط
*المصري: طب ده مظبوط
*إنت أصدك سُكر زيادة؟
*ويشيل القهوة، يطَعّمها، ويجيبها ليك
*لذا، في مصر
*إن طال السفر
*ما تقول: سُكر مظبوط
*قول: سُكر زيادة
*أصلنا متعودين على القَمْح والبذخ، وما بناكل الضعيفة
*المُهم
*من قِصص الكافيهات ومواقفها الطريفة
*قالوا سوداني وصل كرت كرتونة
*من “فلاي بوكس” لكعابيش، بالعنوان الإدوهو ليهو
*سأل، لما وصل البرج الفيهو الشقة المقصودة
*البواب ود حلال، ركّب صاحبنا في الأسانسير، ووصف ليهو الشقة
*صاحبنا قفل الباب، فنقل عيونو
*وبدأ يقرأ في دعاء السفر
*الأسانسير وصل
*صاحبنا دَفَر الباب ومَرَق، خايف الداهي ده يمشي مكان تاني
*الخوفة الدخلتو في “فلاي بوكس” ما دخلتو
*داك كان بالغ، بتشنقل في واطات الله دي
*لكن ده كان اتشنقل بيجي من السما، ده وتتلقاه الواطة
*كان بيدعو في سرّو
*اللهم لا تُخوزقنا، لا تُعولقنا، يا الله
*اللهم لا تُؤلِمْنا، لا تُضَقلِمنا، يا الله
*المُهم
*وصل الشقة
*لقى جماعتو ما في
*نزلوا
*أها، النزلة كَكيف؟
*القعاد فوق جنب الشقة ما بنفع
*المصريين ديل، جِنّهم وجن زُول يقعد ليهم في الممر، أو في خشم باب العمارة
*القصة دي فهموها ليهو قبل يصل
*ربك رب الخير، سوداني فتح باب شقة الجمب وطلع
*سلّم عليه
*حكى ليهو القصة
*قال ليهو: اتفضل اقعد معانا لَما ناسك يجوا
*قال ليهو: كتر خيرك، بنتظرهم تحت
*ودخَل الأسانسير
*وصاحبنا بحلَق من جديد
*تحرك الأسانسير نُزولًا
*وبدأ صاحبنا في دعاء السفر
*وبدأ العَرَق يتصبب
*المُهم، وصلوا بالسلامة
*صاحبنا طَبق كيسو، ومشى قعد في الكافيه المقابل البرج
*قعد وسَكت
*جاهو الجرسون بعد حين
*دَنقَر فيهو
*وبصوت خافت، قال ليهو:
*خت إيه؟
*صاحبنا عاين للمصري جوة عينو
*قلت شنو؟
*المصري هامسًا:
*خت إيه؟
*يا زُول هوووي
*احترم نفسك
*أنا محتاج ليك عشان آخد حاجة؟
*أنا والله أشتريك، وأشتري حلتكم دي كلها
*أنا والله أشتري…
*المصري قاطعو
*خايف يجيب سيرة الممنوع تجيب سيرتو
*وشَبكوا ليك: حأك عليّا، حأك عليّا
*وصاحبنا خَلاص قفلت معاهو وواصل
*نحنا يعني، عشان جابتنا الحرب، قايلننا ناس ساي؟
*المصري يشيل ويعتذر
*وصاحبنا يشيل وينفعل
*لَما اتدخلوا سودانيين، وفهموا صاحبنا إنو “خت إيه” تعني: طالب شنو؟
*فطلب جبنة
*جبنة “النجيتو”، زي ما بقولن حبوباتنا
*ولا أدري إن “النجيتو” هل تقصد بها حبوباتنا “النيتو” الحلف الواحد ده، ولا شي تاني؟
*لكن هو تعبير عن الشي الكعب شديييد
*المُهم، يجيب ليك أَبْيخ جبنة، ويقول ليك: أحلى أَهوة لأحلى زُول
*محلات البُنّ البرازيلي مالية البلد
*وما بلاقيك كافيه بديك جبنة فيها ريحة البُنّ
*الله ينهي حربنا دي، ويرجعنا لبنابر ستات الشاي، والجبنة الماخمج، والبخور المولع
*وست الشاي ذاتها الماخمج
*المُهم
*في مصر، تسمع بالبُنّ البرازيلي ولا تجد له وجودًا ولا نكهة
*ونحن في المريخ، نسمع بالكولومبي، ولا نجد له وجودًا ولا فرحة
*كولومبي النجيتو
*أكيد جابوا لينا جرسون مصري، بدون وش، وعلى الريحة
*قال البُنّ البرازيلي، قال
*الجِنّ الكولومبي ده
*لا رُقية بتفكنا منو، لا تحصينًا؟؟؟
*أيها الناس
*إن تنصروا الله ينصركم
*أها
*نجي لي شَمّارات والي الخُرطوم
*كان شُفت يا والينا
*حتى البواعيض بقت حزينة
*ما لاقيانا عشان تعضّينا
*ونحنا اشتقنا ليها، يا والينا
*دايرين نرجع، حتى لو تاكلنا، موش بس تعضّينا
*طال السفر، يا والينا
سلك كهربا
ننساك كيف؟ والكلب قال:
طال السفر، وبعدت المسافات، يا أخينا،
وغير بلدنا، مين يأوينا؟
وإلى لقاء
سلك
