بابكر سلك
*لما يكون في زول عيان وراقد
*وطول رقادو
*الناس بتتفاعل معاهو في البدايات
*وتزورو بالمستشفي يومي
*تلقانا بعفويتنا ديك
*مفرشين اكاليمنا وسجاجيدنا في المستشفي
*وحتي المستوصفات البتشدد علي زمن الزيارة
*وبتمنع الدخول العشوائي
*بتلقانا جمبها تحت اجعص شجرة مفرشين ومستقرين
*جايبين اكلنا وشرابنا
*اعمدة وساخن بارد وموية صحة
*الشاي بي جاي
*ونتقهوج
*رحلة المريض مع المرض
*توازيها رحلتنا
*نعمل رحلة في او جوار المستشفي
*نحنا كدة
*اللوائح لاتثنينا عن عاداتنا التي سادت وما بادت
*واخير اسي
*زمااااان
*بدري الكلام ده
*ايام الحكومة عندها مستشفيات مجانية
*ايام مجانية العلاج
*كنا بنجيب مناقدنا وحللنا
*وبنطبخ جوة المستشفي
*ونغسل هدومنا
*وفي ناس بستحموا ويغيروا في المستشفي
*والله جد
*ومافي زول بقول لينا
*تفووووو
*قوم ياعاطل
*وبين الفينة والاخري
*يمر الطبيب ويخرج علينا مجاوبا علي اسىئلتنا
*ماشاء الله الزول ده متحسن شديد
*نحن لانري تحسنا
*لكن مابنعرف اكتر من الدكتور
*وفجاة يجينا واحد مشنقل ليهو طاقية اسمو حماد
*يسالمنا ويطايبنا
*ويسألنا
*زولكم دخلتوهوا دكتور طارق؟
*نقول ليهو ايوة
*يقول لينا انا عندي بوكس تحت الشجرة ديك للايجار
*المهم
*لما تطول فترة رقاد المريض
*الناس بتمل وتزهج
*وتبدأ الزيارات تقل
*تبقي يوم بعد يوم
*وتبقي مرة كولو تلاتة يوم
*وتبقي الجمعة بس
*الي ان تبقي مجرد سؤال اذا قابلك بالصدفة زول من اسرة المريض من الدرجة الاولي
*الزول ده بقي كيف
*ويجي الرد
*والله متحسن الحمد لله
*وده رد فيهو امل في الشفاء
*متحسن الحمد لله
*ولما يصل الامر لدرجة اليأس
*ويبقي احتمال الموت اقرب من احتمالات الشفاء
*تتغير الاجابة
*الزول ده بقي كيف؟؟؟
*ويجئ الرد
*الحالة مستقرة
*اول من يقولوا ليك الحالة مستقرة
*جهز جلابية البكا يا اخوي
*الاجابة دي فيها قنعان مغلف من حياة المريض
*فيها تأكيد علي ان لادائم الا وجه الله
*اللهم لاترنا مكروها في عزيز لدينا يا الله
*ساقني لهذه المقدمة الحزينة حال المريخ
*بدينا معاهو بالسكن في المستشفي
*ولما طال السكن وكتر (الرقاد)
*زياراتنا قلت
*الي ان وصلت لدرجة مجرد سؤال
*وبقينا نكتفي بعبارة متحسن الحمد لله
*كل الطموح بقي في تحسين موقعنا في الدوري الموريتاني
*وحتي دي فشلنا فيها
*وبقينا نسمع الكلام الذي يقودنا للقنعان
*قنعنا
*لما فشلنا في سماع قولة متحسن
*بقينا نسمع قولة الحالة مستقرة
*ويفتح دكتور طارق الباب
*نجري عليهو
*يقول لينا النبض متحسن
*وزولنا ممدد قلبو ناسي حتي طريقة الخفقان
*ياربي اضخ الدم من الاذين للبطين
*ولا من البطين للاذين
*واخاف ان نمشي تجاه عمك حماد سيد البوكس البأجرو
*ونقر له بانو كلامو القالو كولو طلع صاح
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*ولا خليك يا اخينا
*حا اقول ليك شنو وانت شايف الحاصل بينا
سلك كهربا
ننساك كيف والكلب قال بوكس عمك حماد هو الحقيقة الوحيدة لانه لاتوجد حقيقة مطلقة غير الموت
والي لقاء
سلك
