بابكر سلك
في السلك
*لما تسمع مستوانا طوالي بتجري للمريخ
*انا ماقاصد المريخ
*المريخ ده وصل لمستوي ما داير نقاش
*مستوي المريخ لايختلف عليه شخصان
*لاتنتطح عليه نعزتان
*ولا نعجتان
*ولا عجلتان
*ولا عجلة وجاموسة حايمة في القيط تلقط من زرع (ايراطين ) الارض حيلة ابو فرجاني
*مستوي المريخ لايختلف حوله حزبان
*مستوي المريخ واااااضح وباين زي مثل العنز القالو حميدتي زمان
*ما داير نقاش
*عشان كدة مستوي المريخ ليس المقصود في هذه السانحة
*المقصود مستوانا كسودان
*مستوانا الكروي
*ياخ نحنا استاد متوفرة فيهو مواصفات اللعب في المراحل التمهيدية ماعندنا
*شفتوا الاستاد الاتلعب فيهو نهائي الكونفدرالية في تنزانيا؟؟؟
*بالمناسبة تنزانيا دي ما اسست معانا الاتحاد الافريقي
*الزمن داك كانت صغيرة وجاهلة
*حايمة سااااي
*حفيانه ونخرتها سايلة
*الليلة كبرت وبقت بنية
*ماشاء الله القوام ما قوام
*جسم يودي القسم
*ووجاهة وسماحة
*ماشاء الله تبارك الله
*ونحنا حليمة
*لسة في قديمها
*هزاز البيت المشرط بالجمبات
*والشعر نصو منقوض ونصو ممشط
*والكرعين مخرخرات
*قبح لايضاهيه قبح
*ملاعبنا لاتشتهي (بضم التاء)
*ولا تشتهي (بفتح التاء)
*قواعد من النساء
*لا اثم عليها ولا عليك اذا قعدت معاها وهي في اي وضع
*دولة
*ملعب مجاز مافيها
*وبرضو بنطلق عليها دولة
*اما المستوي الفني
*عاد لا حول لاقوة
*لا مدارس سنية
*لا منافسات سنية
*لا كفاءات تدريبية
*ولا ميزانية حكومية مخصصة للرياضة ولا استراتيجية
*ماشين سااااي
*بهايم في الخلا
*ونحب ان نساق بالخلا
*لكن نتمسك باننا دولة
*ولن نسمح بأي نقد
*نحنا اسسنا الاتحاد الافريقي
*طيب مانحنا اسسنا الاتحاد التعاوني وضربناهو وبشتناهو لما قفل
*العبرة ليست بالتأسيس
*العبرة في المحافظه والمواكبة والتطور
*والاتحادات الدولية
*لن تجز المراعي التي نسميها مجازا ملاعب
*لأننا اسسنا الاتحاد الافريقي
*وتعال شوف مستويات من يديرون العمل الرياضي علي مستوي الدولة والاتحادات والاندية وحتي الروابط
*الا من رحم ربي حتي تلقاهو كفاءة
*ويهرب بنفسه من رحم ربي
*ويبقي من هرب منه من هرب بنفسه يدير الشأن الرياضي
*لذا افضل انجازاتنا علي مر العصور هي اننا اسسنا الاتحاد الافريقي
*حتي علي مستوي الاندية
*تبحث الاندية عن الرئيس العندو قروش
*ويكون بمثابة صحن عسل
*يلم النمل حوله
*ثم يذهب بعد ان ينال شرف الرئاسة الذي سعي له
*ويترك لنا النمل
*النمل المفلس الذي اعتاد علي لحس العسل
*النمل البجي نتاج شلليات مع الرئيس صحن العسل
*يفوت العسل ويفضل النمل في حالو
*يلحس ماتبقي من عسل محتمل بالنادي
*ويقرص من يحتج علي وجود النمل (اللحاس القراص)
*مشكلتنا مشكلة
*ونقول نحنا دولة
*لازم كورتنا تشبه لقمتنا تشبه مدرستنا تشبه دولتنا تشبه حوصتنا النحنا فيها دي
*لازم استاداتنا تشبه شناتنا
*لو داير تعرف مستوانا
*ببساطة
*احضر الاستوديو التحليلي لقنوات بي إن سبورت
*تقيس الفم بودعة
*تلقي الودع واسع
*تقيس الليل بشعرو
*تلقي الفرق شاسع
*وانا انا في التمني
*مستني كاس العالم يجينا راكع
*نحنا يانا نحنا
*نمحن الدنيا ونزيدها محنة (بكسر الميم)
*واصلو ربنا خلق ناس
*وخلق ناس يمتحن بيهم الناس
*وخلق ناس يمحن بيهم الناس
*فأي الخلق نحن ياتري؟؟؟؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*الحاجة البتحير فينا
*انو الناس كولو يوم بتفوت قدام تخلينا
*ونحنا يانا نحنا يا والينا
*ماشايفين زول احسن منينا
سلك كهربا
ننساك كيف والكلب قال المدينة الرياضية ضقلموها… كولو يوم قاطعين حتة من التورتة…. وتتفاصحوا الجوهرة والقلعة والمسخرة
وإلى لقاء
سلك
