في السلك
أمس بنحضر في النهائي الأوروبي
لما باريس جاب التالت
الجمبي قال لي ليبيا فتحت
قلت ليهو ليبيا براها؟ البي إن سبورت ذاتها فتحت!
الراجل بتاع باريس زمان صرّح بأن باريس إذا فاز بالأميرة الأوروبية
حا يفتح قنوات البي إن سبورت مجانًا لناس الشرق الأوسط
ناس الشرق الأوسط ديل طبعًا منهم نحنا وناس غزة
عشان كده فرحنا لباريس شديد
نغني مع برج إيفيل الجميل
ونحنا أبراج راسنا طارن
سألت نفسي بمناسبة فتح البي إن سبورت مجانًا دي
لو الجماعة فازوا بالأميرة السمراء، نسوق عرباتنا ولوارينا ونمشي الطلمبات سنة كاملة (نغلق) التنك؟
ولا حتى الإعفاء ده فيهو عنصرية؟
الأميرة البيضاء إعفاء
الأميرة السمراء ولا مليمة!
مبروك باريسنا
باريس أفريقيا
وعقبالنا
عقبالنا دي بترجعني لموضوعنا بتاع أمس
من أنتم؟؟؟؟
الناس الساقوا الناس بالخلا ورجعوهم بالموردة وخلوا مريخنا في الخلا!
إنتو منو؟؟؟؟؟؟
المهم
سواقة الخلا والعودة بالموردة كانت دور بينا البلد ده
فحرقنا الجازولين والتاريخ والحاضر
ودي الإشكالية الأولى التي فتحت الباب أمام الفوضى الخلاقة والفوضى القاتلة التي أصابتنا في مقتل
هذه الإشكالية لا يمكن حلها إلا إذا انتهت الحرب
ونرجع زي ما كنا
نصفّي النية
ثم نفرض الحل على صاحب الحق وعلى المتسلبط في الحق لأجل المريخ
الإشكالية دي خلوها لي وقتها
الآن
الآآآآن
عشان ما نموت موت الضان
نفكّر في حل إسعافي يوقفنا على أرجلنا
ويوصلنا بس إن شاء الله حد تخطي التمهيدي التاني
ده ما ببقى إلا نستعجل في إعادة الحرس القديم أو بعضه
ضم محترفين على مستوى تظهر بصماتهم على الملعب بسرعة
الاستعانة بجهاز فني يعرف كيف يصنع من الفسيخ شربات
إحياء الروح عند الجميع جمهور ولاعبين
تتذكروا موقعة عزام؟؟؟؟
دايرين الروح ديك
الكلام ده يتم فورًا الآن
لأنو الظرف ضيّق
(والظرف الضيّق) ده هو الصنع من المريخ مكانًا طاردًا للجواهو وغير جاذب للبرا
المهم
إذا المجلس بقدر يقوم بالخطوات دي على وجه السرعة
خير وبركة
نتمنى له التوفيق لأنو ما عندنا عداء معاه
وإذا ما بقدر (وده الراجح)
حقو المجلس اليوم قبل باكر
يسجّل موقف للتاريخ
يجبر الجميع على احترامه واحترام مريخيته وأمانته
يستقيل
جت عليهو
عشان يتم تعيين لجنة تسيير تستطيع القيام بذلك
ويسعفها الزمن
وقتها سنقدّم صوت شكر للمجلس فردًا فردًا
فلهم أجر المحاولة
ونخص بالشكر النمير الذي تحمّل أعباء الإنفاق
وقد يقول قائل: النمير ما قصّر، لكن عديم خبرة وبيتعلّم بي حقو
نقدّر ذلك يا أيها القائل
ونشكر النمير على ذلك
لكن كمان كان ما بتعرف، ما تتعلّم الحلاقة في رؤوس الناس!
ما تتعلّم الحلاقة في ريسينا
هن كلهن صوفتين!
تودرن علينا وتقعدنا سااااي نناطح الزمن والمحن؟؟؟؟؟
أيها الناس
بقينا ما بنصدّق إنو المريخ غلب!
كنا بنقول: المريخ غالب كم؟
بقينا نقول: الكورة كم؟
ثم تحوّلنا للغالب منو؟
إلى أن وصلنا لمرحلة السؤال البقطع الحشا:
“إن شاء الله المريخ انستر؟؟؟”
ولذا أصبح النصر عندنا زي أم تشكا
إن جات: حبابا
وإن ما جات: إشكا!
أيها الناس
إن تنصروا الله ينصركم
أها نجي لي شمارات والي الخرطوم:
تعرف يا والينا؟
برانا جبنا البقت فينا
لكنها الأقدار يا والينا
باقية علينا… باقية علينا
سلك كهربا
ننساك كيف، والكلب قال: فريق يطير أكتر من سودانير، حقو يدوهو الأياتا
وإلى لقاء
سلك
