هوي يا ليلي هوووووي

في السلك

*البتأمل العنوان أعلاه
*طوالي بجري على غنا الحقيبة
*حليل أم در، حليل ناسها
*والغريب عن وطنه مهما طال غيابه
*مصيره يرجع تاني لوطنه وصحابه
*ومصيره وطننا يعود أحلى وأجمل وأنضر وأقوى
*المهم
*هوووي يا ليلي هووووي
*الكلام ده لي ليلي عبداللطيف
*العرافة
*قارئة الفنجال
*الرمالية
*ست الودع
*كلها مسميات لمهنة ليلي
*ليلي فاكاها فينا وفاكاها في روحها
*ولا يعلم الغيب إلا الله
*عارفنها كضابة
*وبنقول ليها عقب كل نبوءة
*كضاااابة
*وبرغم ذلك، قطعت قلبنا لما صرحت بقولها إن بطولة أفريقيا لهذا الموسم سينالها بطل جديد
*بشتنتنا عديل كده
*لأن التصريح ده أول حاجة بيستبعدنا نحنا
*الوقت داك كنا مشاركين أفريقيا ولسه ما طِرنا
*التصريح بوّظ أعصابنا
*لأنه نحنا بطل قدييييم لواحدة من بطولات الكاف
*ولما هذا التصريح يستبعدنا نحنا
*بيستبعد معانا – بحسب رصد الرد كاسل العملاقة –
*بيستبعد معانا الإسماعيلي، والأهلي، والزمالك، والمقاولون من مصر
*وسِطاشر فريق أفريقي عربي حصلوا على بطولة أو بطولات من بطولات الكاف
*بالطبع، من السودان غيرنا ما في نادي يدخل ضمن الـ 21 نادي الحصلوا على بطولة أو بطولات من بطولات الكاف
*بقينا 22 نادي عربي أفريقي من الكبار (من ضمنهم بيراميدز)
*أما بقية الأندية العربية الأفريقية
*فلسه صغار ولم يحالفهم الشرف
*طبعًا تصريح ليلي عبداللطيف الذي استبعدنا واستبعد معانا 20 نادي عربي أفريقي (الوقت داك بيراميدز ما معانا)
*ذلك التصريح أفرح ناس كتاااار
*وقالوا دي أكيد سنتهم ليلحقوا بالكبار جد جد
*وكان ردنا على ليلي عبداللطيف بقولنا
*كضاااااابة
*وبرغم تحقق نبوءتها وحصول بيراميدز على البطولة
*إلا إنها كضاااابة
*”كذب المنجمون ولو صدقوا”
*مبروك بيراميدز الذي لحق بركب الكبار وسجل اسمه على لوح الشرف الأفريقي
*وبالمناسبة
*بيراميدز ده كان اسمه الأسيوطي
*وكان يتبع لشركة الأسيوطي
*اشتراه عمك تركي وغيّر الاسم
*لم يكتفِ بتغيير الاسم
*غيّر أسلوب الإدارة
*وأدخل المنهجية في إدارة النادي
*والتي بدورها وضعت استراتيجية وهدفًا استراتيجيًا
*حققوه في خمس سنوات وصعدوا على منصة التتويج الأفريقية
*جهاز فني مقتدر
*أجهزة معاونة محترمة ومؤهلة
*لاعبون لهم من الطموح ما يفجّر طاقاتهم وإبداعاتهم
*ببساطة كده
*اشتغلوا الشغل نحنا ما بنشتغله في أنديتنا
*ومضوا بثبات في طريق المجد
*فكان من الطبيعي أن ينالوا المجد
*لا بمشي عضو مجلس معاهم موريتانيا
*ولا عندهم سماسرة بلقطوا ليهم “العويش”
*ولا عندهم جماجرة بنقلوا ليهم الكلام
*ولا بيغيّروا القطاع الرياضي والأجهزة الفنية والمساعدة في الموسم مية مرة تأسيسًا على “زولي وزولك”
*ولا عندهم خلاف حول النظام الأساسي
*ولا حادوا عن هدفهم السامي واستسلموا وقالوا لجمهورهم “اصبر”
*ناس عرفت كيف تدير المنشأة
*فحققت هدفها في خمس سنوات قضوها من تطور لتطور
*ناس ما عندهم “بوكلينق”
*لا بيحفروا لبعض
*ولا بيؤمنوا بالحفر
*ناس عندهم الرجل المناسب في المكان المناسب
*موش كل من هب ودب مستجلب ليهو خمسة وأربعين عضو
*ينسقوا معاهو ويبقى عضو مجلس
*ناس ناس
*لذا
*ليلي عبداللطيف لو صحي شاطرة
*تتنبأ كده وتورينا نحنا حنبقى ناس منهجيين متين؟
*المهم
*باريس سان جيرمان
*حقق أول بطولة أبطال في حياتو
*اشتغل منهجية وتخطيط
*جاب مدرب قدر الطموح
*استغنى عن ميسي ونيمار ومبابي
*لم يقف مكتوف الأيدي
*ما قال للجماهير “شيلوا الصبر لما ربنا يفرجها”
*اشتغلوا
*صبروا بجهدهم على خططهم فظفروا
*ما صبروا وربعوا إيدينهم
*آآخ يا ليلي عبداللطيف
*المهم
*الموسم ده كان موسم تحت شعار “كأس لمن لا كأس له”
*إلا ناس كده
*برضو في الهملة دي طلعوا “كيت”
*نحمد الله على مانديلا
*لكن بطريقتنا دي
*سيظل مانديلا وحيدًا في ربوع السودان لأجيال وأجيال
*إلى أن يتغير الحال
*ويتغير التفكير والطموح والطرح والخطاب
*وقتها يحق لنا أن نحلم
*أيها الناس
*الرئيس الفرنسي في استقباله لفريق باريس
*شكر ناصر القطري وشكر قطر على دعمها الكبير للرياضة بفرنسا
*رايكم شنو؟؟؟
*أيها الناس
*”إن تنصروا الله ينصركم”
*كان شفت يا والينا
*شكر رئيس فرنسا قطع مصاريننا
*الأولى بالدعم فرنسا ولا القضية يا والينا؟؟؟؟؟

سلك كهربا
ننساك كيف والكلب قال “ما تستغربوا لو لقيتوا عقالات بتدعم في نادي يحرنوت جالب الموت…”

وإلى لقاء
سلك