بابكر سلك
الراعي واعي
لكنه ليس بأكثر وعيًا من الذكاء الاصطناعي
ونعمة الذكاء يختص بها الله تعالى بعض عباده
وبعد داك يترك الأمر لمن أنعم عليه
يا يستخدم ذكاؤه لتطوير نفسه وخدمة البشرية
يا يستخدمه في أعمال الشر والبلطجة والإجرام
والدليل على ذلك أن عتاد المجرمين معظمهم أذكياء حد الثمالة
يخططوا لجريمتهم بدهاء كبير
وينفذوها بدقة متناهية
تعجز وزارات الداخلية وأجهزة الشرطة في فك طلاسمها بسهولة
نعم، في الآخر يتم الكشف عن الجريمة والوصول للمجرم
لأنه لا توجد جريمة كاملة
بالتأكيد هناك خيط يقود للكشف عن الجريمة والمجرمين
طال الزمن ولا قصر
حكاية “بلاغ ضد مجهول” البنسمع بيها في (بعض) الدول الإفريقية
دي حكاية تكشف عن قصور في شرطة تلك الدول الإفريقية
أو عيب في الشرطة، كأن تكون وسائل مكافحتهم للجريمة أو كشفها أقل نجاعة من وسائل ارتكاب الجريمة
فمثلًا، ما ممكن تاجر (البنقو) في تلك البلاد يستخدم بوكس موديل السنة (جمل)، وناس المكافحة راكبين تمّنية وسبعين بلوتينو لاطش
ودايرين يلحقوه ويمسكوه
عشان كده الجريمة في (بعض) تلك الدول سيدة الموقف
المهم
نرجع لموضوعنا:
الذكاء الاصطناعي
وتطور الأمر إلى أن أصبح الذكاء الاصطناعي اليوم مجالًا متطورًا ومتنوعًا، ويشمل تطبيقات في مجالات متعددة مثل الطب والمالية والتعليم والصناعة
لكن آخر وأحدث تطبيقاته التي أجبرت العالم على التزام الدهشة
هو تطبيق الذكاء الاصطناعي في انتخابات اتحاد الكرة السوداني الأخيرة
إبليس سجّل إعجاب
تقول لي منو وتقول لي شنو!!!!
المهم
خلونا من الاتحاد
أصلو ما عندنا فيه لا ناقة ولا جمل
وخلونا في مريخنا
كيف تسير أمورنا؟؟؟؟
ضربنا الشيات في سوق العزبات
ولا ضبحنا في البلد؟؟؟؟
الاجتماع انبثق ولا لسه؟؟؟
وانبثق على شنو؟؟؟؟
وهل
ولا ما هل؟؟؟؟
أيها الناس،
أنا عندي رأي
نتفق جميعًا على ضرورة إعادة البناء
وإعادة البناء لا تعني التلتيق
يعني السيراميك في بيت الجالوص ما حل
تعالوا نقنع من موسمنا الإفريقي الجديد
بس بشرط
أن نقوم بإعادة البناء بطريقة علمية
حتى نحلل أي لحظة صبر نتألم فيها على أمل الفكاك
نبني وفق خرط وخطط
وبتخصصية
البرسم يرسم
والبنفذ يقاول
والتشطيب فن
إذا كان هذا ديدن البناء الذي نتبع
صابرين يا مجلسنا
أصلنا ما مستعجلين
أما إذا كان الأمر سيراميك في بيت الجالوص
اسمحوا لينا يا حبايبنا
كدي قبال البناء
جيبوا السقالات والطوب من موريتانيا
الطوب ده برضو عنده أهل في كمائن الطوب على ضفاف النيل، افتقدهم شديد
الطوب ده برضو بشر
بشتاق وبتأثر وبزهج وبحن
في طوب متزوج وطوب خاطب وطوب مجكس
راعوه ليه شوية
البناء ما بيجيبوه ليا
أيها الناس
إن تنصروا الله ينصركم
أها
نجي لشمارات والي الخرتوم
كان شفت يا والينا
برغم الحال الفينا
بننظر للجزء المليان من الكوب يا أخينا
إنها فرصة لإنشاء بنيات تحتية حقيقية يا والينا
موش أسبستوس من زمن الإنجليز، يمرض فينا ويودينا
سلك كهربا
ننساك كيف، والكلب قال بلد آخر مرة شافت القطر قبل مية سنة، والسيول تجرف في طرقها البرية، وكهربتها لو ما قطعت نقول اللهم اجعلوا خير. والحمار حايم بالموية في عاصمتها ليهو عشرين سنة… ونتكلم عن بنيات تحتية؟؟؟
وإلى لقاء
سلك
