بابكر سلك
*لسه واقفين في الأثر السالب لامنا الحكومة على مستوانا الكروي
*أها
*بعد سرقة امنا الحكومة للملاعب بالأحياء والفرقان
*وبعد ضقلمتها للمدينة الرياضية
*وإهمالها البيِّن في إنشاء ملاعب تواكب المطلوبات
*وصيانة الموجود وتأهيله ليفي بالغرض
*وبعد تدخل امنا الحكومة في الشأن الرياضي
*أدخلت لينا السياسة في الرياضة
*ولما نحتج على ذلك طمبارة امنا الحكومة بيقولوا لينا ما تدخلوا الرياضة في السياسة
*أجي يا البرقش؟؟؟
*تدخلوا السياسة في الرياضة
*ولما نفتح خشمنا تعتبرونا أدخلنا الرياضة في السياسة؟؟؟
*طيب تعيينات السادة الوزراء والسادة الولاة لمجالس التسيير ولجانها
*لاعتبارات سياسية
*ده ما كان إدخال للسياسة في الشأن الرياضي؟؟؟
*ياخ حتى بعد تشديد المؤسسات الدولية الرياضية على إبعاد واستبعاد امنا الحكومة
*امنا الحكومة برضو ما لزمت مكانها ولا التزمت بالقانون
*تتجي تترشح لأي هيئة رياضية
*امنا الحكومة ما بتظهر ليك
*لكن بترسل ليك اتنين من الجماعة البلبسوا النضارات السودة بالليل
*ويقولوا ليك الجماعة قالوا ليك اسحب ترشيحك عشان ما نسحب لوحاتك
*تدخلات بشتى السبل
*حتى المتظلم من قرار حكومي أو تدخل
*إذا لجأ للقضاء الإداري العالي
*القرار ممكن بتوجيه من امنا الحكومة ما يطلع سنة كاملة
*خلال هذه السنة تجيب امنا الحكومة قرقريبتها وتقعد تعوس
*أصلو العجين بيكون مخمر من بدري ومكوجن وجاهز للعواسة
*ياخ اللجنة الأولمبية امنا الحكومة ممكن تدخل فيها وتجيب ليها سياسي كلمة أولمبية بتنتهي بالهاء ولا بالألف ما بعرفها
*ولكنها السياسة
*تأتي بمن تريد في مكان تُحرم منه من يريدهم المكان والزمان
*لذا لم ولن نستغرب إذا قامت امنا الحكومة بتعيين خريج الآداب أو القانون كبير جراحين
*هو نحنا بنعرف أكتر من الحكومة!
*ياخ مرة امنا الحكومة جابت لينا وزير ثقافة
*تاني يوم من تعيينو ناس الفنون الشعبية أقاموا ليهو احتفال كبير
*حتوهوا حت شديد
*أي أغنية تمثل إثنية من ثقافاتنا غنوها
*أي رقصة من جميع جهات السودان حتوها
*ولما انتهى العرض
*قدموا السيد الوزير الجديد في كلمة
*وزير الثقافة
*أول كلمة قالها ليهم
الله يهديكم
*شفتوا امنا الحكومة بتختار لينا كيف؟؟؟
*ياخ ده كلو خليهو
*أيام مشكلة سوداكال
*البدخل عبدالرحيم والي الخرطوم في مشكلة نادي يتمتع بالاستقلالية شنو؟؟؟
*امنا الحكومة حشرية خلاس
*تحشرها ده هو الحشرتنا بيهو في قاع المستويات
*لذا
*مهما تعددت الأسباب
*نجد أن التدخل الحكومي السالب في الشأن الرياضي هو أس البلا
*غدًا
*كان حيينا
*حانتكلم عن قصور امنا الحكومة تجاه الرياضة
*بلد فيها عشرين وزير رياضة
*طمنطاشر ولائي وواحد اتحادي وواحد وزير دولة
*لو كلو وزير جهز لاعب واحد بس
*ما كان شلنا كأس العالم؟؟؟
*أيها الناس
*إن تنصروا الله ينصركم
*أها
*نجي لي شمارات والي الخرتوم
*أوعك تكون يا والينا
*ما صدقت قصة وزير الثقافة العينوهو لينا؟؟؟؟؟
سلك كهربا
ننساك كيف والكلب قال ووزير السياحة أب بدلة داك كيف؟؟؟؟؟
وإلى لقاء
سلك
