عوراتنا وعواراتنا
بابكر سلك
من زمان ختوا لينا صورة في راسنا المدوقس ده وعشنا عليها مسلمين بيها
قالوا لينا غنانا ودرامتنا مافي زول شغال بيهم علي المستوي الخارجي علي الاقل في الدول العربية والدول الما عربية وعامله فيها عربية والدول الماعربية والناطقة بالعربية
والعربية (اللغة ) طبعا تقوم بينا كب تقع بينا رب
فما يسمي بالوطن العربي ينطق العربية كلو زول بطريقتو (لهجتو)
ونحنا نسمع غناهم ونتفرج علي درامتهم بلهجاتهم المحلية
وهم ماشغالين بينا الشغلة
ونحنا راضيين علي اساس الصورة الختوها لينا في دقنوسنا ده
حتي غنانا اكتفي بالشجن داخل مساحات الوطن
ودرامتنا كان مرقت مابتمشي بعيد
حدها تشاد
وقبلانين
راسنا المدوقس ده جواهو صورة نؤمن بها كانها سورة
الي ان كشف الزمان الخدعة
هاهي معظم الدول العربية
العاربة منها والمستعربة والمتسلبطة والمتلبطة
هاهي كلها تغني غنانا
السعودية واليمن والامارات والبحرين والليبيين والمصريين والصوماليين وفي جيبوتي لينا مساحات مقدرة
اما الحبش
الذين لم يتسلبطوا في عروبة
فديل بغنوا لينا من بدري
لاخلوا وردي
لاثنائي العاصمة ولاخوجلي عثمان
غنا جد
واشقائنا ناس عربي جوبا
بغنوا غنانا بلهجتنا وسلمنا الخماسي
ويغرودوا كمان عيونهم في غنا الشجن والمآسي
وتعال اسوان
مركز شباب خرطوم غرب او دار فلاح تظنها
الناس كلها بتغني غنانا
ان دل علي شئ
انما يدل علي ان الصورة القديمة الزرعوها في دقنوسنا كانت مقلوبة
وان لهجتنا لم تكن يوما سببا يعوق انتشار غنانا خارج حدودنا
وان سبب عدم انتشار غنانا هو عدم وصول ذلك الغناء للعالم
ولما وصلهم عبر الميديا عجبهم
عجبهم شديد
ادمنوهوا
رددوهوا
بقوا يقلدوهوا
فانكسر (الدش) في يد من يدعي ان سلمنا الخماسي غير (مستساغ)
القصة كولها كانت
عدم اهتمامنا بنشر وتسويق فنوننا
والميديا جات كشفت قصورنا
قصورنا الناتج عن عدم احترامنا لوزارة الثقافة وبالاعلام
نعتبرها وزارة ترضيات
نأتي لها بالعبر
عشان كدة منتوجنا الثقافي ما انتشر
بارك الله في الميديا التي كشفت لنا عوراتنا وعواراتنا
والحرب دي اجبرت بعضنا علي النزوح خارج الوطن العزيز
محل مامشي سوداني
بعد شهر تلقي الشارع السكن فيهو كولو بغني سوداني وبتكلم سوداني (راندوك كمان)
نحن شعب يؤثر ولا يتأثر
لكن وزارة ثقافتنا هي آفتنا
ووزارة اعلامنا ملومانا مع الثقافات الاخري
انتشرنا بسبب النزوح فنشرنا سودانويتنا بسهولة
اللهم اجعلها حرب خير وبركة
المهم
هل علمتنا الحرب محاربة الفساد
ام لم ينتهي الدرس بعد
الشعب السوداني ماغبي
سواء انتهي الدرس او لم ينتهي
اها
الجمعة اذا ماحصلت مفاجأة
نلتقي اهلي مدني العتيق بالنخبة
طبيعي ومتوقع ان يظهر المريخ بمظهر يعيد الثقة بين الجماهير واللاعبين
الماطبيعي مواصلة مأساة موريتانيا
نأمل ان تكون النخبة لطي صفحة الشناقيط
ندعم الزعيم بشدة
لقناعتنا ان اي شدة بتزول
لايوجد خصم للمريخ بالمريخ
وعلي المجلس ان لايرد الايادي التي تتسابق لتحمل الزعيم الي منصات التتويج
علي المجلس ان يجمع الشمل
ان يتسامي علي الصغائر (ان وجدت)
وان يبدأ بنفسه
يبطل كيمان داخل المجلس
ويعمل بقلب رجل واحد
وان لايخون بعضه بعضا
واذا كان رب البيت بالدف ضارب
ستجدونا بالمدرجات زي سنون السكري
كلو زول قاعد بعيد من التاني
اللهم انعم علينا بالاستقرار والوحدة بالوطن المريخ وبالمريخ الوطن
ايها الناس
ان تنصروا الله ينصركم
اها
نجي لي شمارات والي الخرتوم
تعرف يا والينا
نحنا ما بتاعين حركات
ومادايرين نعمل حركات وما دايرين حاجة يا اخينا
بس كمان حاجاتنا تدينا
وزارة الثقافة والرياضة ديل هيلنا
سلك كهربا
ننساك كيف والكلب قال نحنا الكلاب لو قلنا (هو) العالم كلو بفهمنا معقولة انتوا تغنوا وترقصوا وتحتوهوا وتنضموا مافي زول يفهمكم؟؟؟؟؟؟
الي لقاء
سلك
