يا ناس هووووي اتطلبوا الله
بابكر سلك
تطور الدنيا دي
عمل زحمة في السماء
كمية من الأقمار الفضائية زاحمت الأقمار الطبيعية وبقت ليها في روحها دي
وجات الميديا تمت الناقصة
لو واحدة ولدت قيصري في أمريكا
تلقى نسوان مايو جايبات الخبر
زحمة السما دي و(انطلاقة) الأقمار الصناعية
زي ما ليها إيجابيات
كان عندها برضو سلبيات
أكبر الآثار السلبية كانت على كورتنا
القصة دي خربت طبعنا
مشتركين في البي إن سبورت
وقاعدين أمام الشاشات
ثقافتنا الكروية اتغيّرت
نظرتنا الكورنجية للأمور اتغيّرت
ولاءاتنا وتعصّبنا لأنديتنا اتغيّر
بقينا منقسمين ما بين ريالب وبارساب
ما بين شلسياب وليفربولاب
حتى في المنتخبات دي
بقينا إسباناب أو أرجنتيناب أو فرنسيين
على الرغم من إنو الفرنسيين ما ناقصين
الفيهم مكفيهم
مساهرين مع كأس العالم للأندية
وصبحنا على خيبتنا.. أقصد نُخبتنا
ملاعب غير
استادات غير
مرابط حمير
الجمهور في المدرجات دي غير
جمهور مرتاااااح
ونااااير
هم ما شايل
وجوه نيرة
وسماحة.. اسكت بس
المخرج يمشي على الجماهير
تتمنّاهو ما يرجع للملعب
يمشي على الملعب
تتمنّاهو ما يرجع للمدرجات
وجوه تشع ضوءًا دون طاقة شمسية
جنس شعر (بفتح الشين والعين)
وجنس (شَعر) برضو
سماحة تعقّد
المهم
عدنا لي لخبطتنا.. أقصد نُخبتنا
ملاعب مفروض تتحجّب امتثالًا لأمر الله حتى لا تظهر عوراتها
استادات ورت العالم كلو إننا مدمّرين من قبل الحرب
جماهير أتت وهي تهرب من واقع الحياة المُر الذي أسكرها دهشة
جات علّها تنسى
فزادت مأساتها
جلست القرفصاء حسرة
كان في الدامر أو في عطبرة
ما كان في كورة
كان أي شيء
بس ما كورة
خمسة وعشرين رجلًا يركضون خلف جلدة منفوخة
اتنين وعشرين لاعب وتلاتة حكّام
لا مهارة
لا فهم كروي
لا أداء خططي
لم يكن هناك شيء جميل إلا الصبر
أجمل شيء فينا وعندنا هو الصبر الذي نمارسه على كل الكوارث والأقدار
الدوريات العالمية خربت طبعنا
تاني كورتنا دي متابعتها حتكون زي الخدمة الإلزامية
تحضر ليك دوريين من جوة الاستاد
كان مرقت حي.. يدوك إعفاء
وعشان الأجيال الجاية ما تنقطع عن كورتنا ومتابعتها وتشجيعها
حقو يجينا رئيس زي حق كوريا ده
يقطع النت والديجيتال والرقبة ذاتها
والله رئيس زي ده محتاجين ليهو شديد
البلد دي أي حاجة فيها قد أينعت
المهم
الطشّاش في بلد العُمى شوف
أمس الزعيم فاز والمحلي فاز وأمل عطبرة فاز وزمالة أم روابة فاز
لكن أخي الكريم
بعد الشفتو أمس ده
ارفع راسك
وافتح خيال
افتح فولدر منافسات أفريقيا
ونزّل ما شاهدته
بدون ما تسأل عمك قوقل
حتعرف الحقيقة
حتقتنع
أيها الناس
يا ناس هووووي
اتطلبوا الله
وكالعادة
انتصار المريخ أثار الأهلة
طفقوا يهرطقون بعدم صحة هدف المريخ
الأهلة الشرفاء يتحدّثون عن التحكيم
لك أن تتخيّل
الداعم الحقيقي ليهم ينتقدوه
يا ناس خافوا الله
أيها الناس
الشيء الوحيد الملفت
الشيء الوحيد الكان مميز ويستحق الإشادة هو الهلال
الهلال لعب بتشكيلة كلها وطنيين لأول مرة منذ سنتين
وطنيين لدرجة إن جماهيرهم ما كانت بتعرف غير محمد عبد الرحمن وروفا وصلاح عادل
آسي عليك الله حارس الهلال الأمس ده في هلالابي بعرف اسمو؟
في هلالابي شافو؟
في هلالابي سمع بيهو ساي؟
سيستم الهلال بعرفو؟
شخصيًا.. يخيل لي الزول ده جا ماشي جنب الاستاد قالوا ليهو تقيف لينا قون يا ابن العم؟
أيها الأهلة
بدل الحديث عن هدف قباني
تحدثوا عن غياب طمّنطاشر لاعب أجنبي عن الحضور للسودان
قباني ده أجنبيّنا
وجبناهو السودان
جيب كان تقدر
المهم
لا نستغرب من حال كورتنا
فالأمور لا بد أن تتشابه
فكورتنا بتشبه عيشتنا.. بتشبه لُقمتنا.. بتشبه كهربتنا.. بتشبه مويتنا
كلهن بتشابهن
أيها الناس
إن تنصروا الله ينصركم
أها
نجي لي شمارات والي الخرتوم
كان شفت يا والينا
مريخاب أم درمان ركبوا بصّهم قالوا جينا
وين هلالاب أم درمان يا والينا؟
هل هم زي المحترفين قالوا أبينا؟
سلك كهربا
ننساك كيف والكلب قال قوموا قدّوا يا بتاعين (التيوة)
وإلى لقاء
سلك
