بابكر سلك

خلينا الظفر بالنخبة
وقنعنا من البناء
أجلنا قصة توحيد الصفوف
ومستعدين نصبر على الخيبة إفريقيا لموسم جديد
كلها مصائب
ولأن المصائب لا تأتي بالقطاعي
جاتنا مصيبة إصابة قباني
فاحتسبنا جميع مصائبنا لأجلها
إصابة قباني يجب التعامل معها بجدية وأخلاق
واجبنا وسمعتنا تحتمان علينا ذلك
إصابة قباني لا تتحمل شماعات الموافقة الأمنية وحجوزات الطيران
ألف دولة متقدمة في طب إصابات الملاعب ممكن تقبل قباني بسهولة
يجب أن نتعامل مع الحدث بمسؤولية
ما نبقى زي الزول الأجر عربية من ليموزين وساقها في شوارع خربة وعمل بيها حادث
ثم استعان بسمكري من الشارع خاتي ليهو أسطوانة أوكسجين طرف الميدان الجمب المنطقة وواقع في عربات الناس تشتيش
العربية ودوها حيث الورش الحديثة التي تعمل بأجهزة وتقوم بتغيير الرفرف المانافع وتزرع قائم جديد مكان القائم المعوج
للدرجة التي لا يمكن معها معرفة الجزء الذي تضرر من الحادث
إذا كنا من أنصار الاستعانة بسمكرجية الواطة
الأفضل نسلم العربية بي حادثها ده لسيد الليموزين يصلحها بمعرفته
لكن التأجيل والتأخير بسبب الموافقة الأمنية
فإنه يضر بالقائم (المشقوق)
يجب أن نقوم بواجبنا الأخلاقي
حتى لا ينعتونا بعبارة (لا كورة لا أخلاق)
المهم
سبب الإصابة شنو؟
لأنه ما كان في احتكاك واضح مع قباني
هل من المحتمل أن تكون أرضية الملعب هي السبب؟
فوق قلت ليكم تأجر عربية من ليموزين وتسوقها في شوارع خربة
أها
الشوارع الخربة دي قصدت بها الملاعب غير المهيأة
الملاعب المهملة من الدولة
والاتحادات
مهملة من كل المنظومة
ثم نجبر اللاعبين على اللعب عليها
ونزوغ لما يحصل القدر
نزوغ من المسؤولية بالموافقة الأمنية
وخبر بالنشرة
قام سيادته في إطار خططه الرامية لتطوير الشأن الرياضي
قام بزيارة اللاعب فلان الذي أصيب في مباراة كذا
وكان للزيارة الأثر النفسي الكبير لدى اللاعب الذي تماثل للشفاء بمجرد ما زاره سيادته
وحتى الصور التي أُخذت له بعد الزيارة أثبتت ذلك التحسن
ويعلو صوت السارينات
تدور الفي إكس آرات
ويلملموا كاميراتهم
ويشوفوا ليهم خبر تاني يلحقوه النشرة
أيها الناس
لا تهملوا ولا تتأخروا في علاج قباني
إن فقدنا الكورة دعونا متمسكين بالأخلاق
أيها الناس
إن تنصروا الله ينصركم
أها
نجي لي شمارات والي الخرطوم
كان شفت يا والينا
كل يوم الأخبار تجيب لينا
لقى حتفه نتيجة هجوم من تسعة طويلة على منزل زول مننا
خلينا الشارع يا والينا
للمواتر البتشفشف فينا
وتسكن عيني عينك يا والينا
نخلي البيوت كمان يا أخينا
ولا في حاجة تعلموها لينا
قنعنا من أطعمهم من جوع لكن ما بنقدر نتخلى عن أمنهم من خوف يا والينا

سلك كهربا

ننساك كيف والكلب قال الزمن ده لو قلنا (هو) يقولوا لينا قوم فوق اقعد تحت جيب الموبايل ده

وإلى لقاء

سلك