بابكر سلك
والله أنا لو محل الفيفا كان «شطبتنا» زمااااان
معقولة الحصل أمس ده كرة قدم؟
والقمة أطراف فيها؟؟؟
الكورتين مية وامنين دقيقة ما شفنا فيها كورة واحدة حلوة نشجعها
ودايرن أميرة سمراء وسندريلا كمان
دي موش كورة
دي خرمجة ساي
قبلنا إنو كورتنا تشبه حياتنا
تشبه مماتنا
لكن حياتنا ومماتنا ما بالسوء ده
أنا غايتو الهلالاب ما بعرف رأيهم شنو
لكن كزعيمابي شاحد ربي يرمينا في مجموعة فيها باريس سانت جيرمان
عشان يكتلنا مرة واحدة يريحنا
ويا الماشي لي باريس
ما داير أقول ليك جيب لي معاك رئيس
لكن جيب لي معاك سانت جيرمان باريس
عشان يلاقينا ويورينا الطفا النور منو
فعلاً شوقي غريب
ولو قلنا نرجعوا أهلو
ما ظنيت أهلو بعد اتفكفكوا بدوهوا موافقة أمنية تاني
إلا نرجعوا ليهم فلاي بوكس
ونرجع بالبوكس
نركب اللعيبة ديل كلهم
ونحوم بيهم
زي سيد اللبن
كلو زول في خشم بابو
وأكيد نرجع بالبوكس
المرة دي الشحنة كبيرة وثقيلة
ثقيلة شديييد
ثقيلة جدًا
نشيلها براااااحة
نتأكد إنو ما اتحتحت منها شي
نشيلها كولها
ونوديها بعيد
بعيد شديد
لأنها زي الكديسة
كان جدعناها قريب بترجع
كان وديناها الموردة بترجع تاني
عشان كدة
نسأل الله يرمينا في مجموعة فيها باريس سانت جيرمان مطعّم بي لامين يامال كمان
عشان يكتلونا يرحونا
أيها الناس
قول أسد جاب ضربة الجزاء
هل يمحو ذلك خيبات موريتانيا؟
هل يعني ذلك أن نجاعة اكتسبناها؟
هل يعني ذلك أن شوقي ما غريب؟
هل يعني ذلك أنو في شي في المريخ ده ما غريب؟؟؟
أيها الناس
الحل في العقل
عودوا للنقطة التي فارقتم بها الحقيقة
واجتمعوا بالحقيقة
اتفقوا مع الحقيقة
وجددوا المسير
غير كده
الله يرمينا في مجموعة فيها باريس سانت جيرمان
عشان يكتلنا يريحنا
بس
ملحوظة
حقارة المدربين
لما يكون في لاعب صغير في السن ممكن يجي منو
برجعوهوا طرف طوالي
قدر الكورة الفي راسو يطيروها ليهو
ونقعد نحنا نتمنى الله يرمينا في مجموعة فيها باريس سانت جيرمان
أيها الناس
إن تنصروا الله ينصركم
أها
نجي لي شمارات والي الخرطوم
كان شُفت يا والينا
مزيد من الأمان بقوّينا
ونشارك في البناء يا أخينا
ومافي زول لحب البلد بوصّينا
بس كربوا الأمن وخلوا الباقي علينا
سلك كهربا
ننساك كيف والكلب قال لو قلنا ننبح في شفشافي أو حرامي ما حانسكت ولا دقيقة
وإلى لقاء
سلك
