بل جد

بابكر سلك

بل جد
في العالم المعاصر أضحت الأمية هي عدم الدراية باللغات والحاسوب
يعني فك الخط ولو كان بأجمل الخطوط وبجميع أنواعها لا يمحو أمية إطلاقًا
واللغات بقت إجادة بنفس لهجة أسيادها
اللغات الدرسونا ليها زمان ديك الزمن ده رطانات ما بتشتغل
جيل (أول أوف يو سي بهايند مي)
بوي بوي بوي
ومستر قرين هاز أ لوري
سي لوري، لوري، لوري
الكلام ده كلو بقى ما كفاية ولا بقسم
إجادة اللغة بمهاراتها الأربعة
وبعوجة لسان أسيادها هي وحدها المؤهل
ولما كان تعلم لغة العصر هو الطريق لمحو الأمية
يجب علينا أن نتعلم لغة الزمن العايشنو زي ما قال الكتاب
يلا
أول أوف يو سي بهايند مي
بل
بل
بل
بل جد
فتك. فتك. فتك
متك متك متك
لقيتوا المعاملة كيف
يلا… أول أوف يو
لقيتوا المعاملة كيف
ومهارة النطق لا تعفينا من فهم المعنى أو المعاني للكلمة وحسب موقعها من الجملة
بل….. بل….. بل جد
ودي بتشبه قون عوض الله أنور في مرمى الزمالك لما عكسها ليهو عاطف منصور
يعكس الجناح اليمين
يدخلها قون الجناح الشمال
وبي كدة نكون عرفنا معنى فتك ومتك
فتك هو الجناح اليمين ومتك هو الجناح الشمال
عشان كدة بتلقى الجملة شكلها فتك ومتك بل جد
أما الاتدردقت في العارضة ومشت مشوار ديك
فدي هي مصطلح السؤال الشهير لقيتوا المعاملة كيف
الطعمجة في كل الظروف واردة
ونحن ملوكها
لدرجة بنتطعمج على روحنا مرات
أمس في أحد القروبات وقبل بل باريس سانت جورج
كنا بنتطعمج
فحدثنا أستاذنا مامون أبو شيبة عن حكومة الأمل وفرضها للواقع
لي أسي لا عرفتها معلومة لا عرفتها طعمجة ولكني عرفت جيدًا كم هو خفيف الظل أستاذي أبو شيبة
المهم
قبل هزيمة الهلال كانت كورتنا
سوء سوء سوء
سوء يا سواء
نص المريخاب قربوا يتلحسوا
وإلى أن انتهت المباراة والسوء في حالو
لم يتحسن أداء المريخ في مباراة الوادي العصرية بالدامر
إلا ليلاً في مباراة الأمل بعطبرة
حتى يادوبك لعبنا لينا باص باصين وعندنا بلنتي ما اتحسب
لكن
بعيدًا عن الطعمجة
الهلال بدون أجانب بقعد ساي
وده عيب الاعتماد على أجانب أكتر من الوطنيين ونتيجة سالبة لفوضى الاحتراف الأجنبي في أنديتنا
وبعيدًا عن الطعمجة المريخ ده بطريقتو دي أخير ليهو ما يشارك أفريقيا
وإنو أنديتنا دي لن تقم لها قائمة طالما هي معتمدة على مشاطيب وقدامى القمة في المنافسات
يعني كورتنا الجاية لو لقينا ميرغني كسلا مثلًا فيهو جمال أبو عنجة وفتح الرحمن سانتو وكرار أبو علي ما نستغرب
وإنو العالم ده كووولو شغال كورة
إلا نحن
بنلعب بس
وإنو لو بارينا اتحادنا ده ولعبنا الكورة الجاية بأبي حمد
البعدها بتكون في قبقبة والبعدها بالكسارات ريفي أسوان
وإنو أجمل حاجة في كورتنا دي
الطعمجة واللمة والونسة والروح الرياضية بين أهل مجتمع الرياضة (الأصيل)
وأننا سنظل على هذا الحال طالما لم نغير ما بأنفسنا
لذا فإن الله لا يغير ما بنا
بل جد
وفتك ومتك
وآخرتها كوم تراب
أيها الناس
إن تنصروا الله ينصركم
أها
نجي لي شمارات والي الخرطوم
كان شفت يا والينا
آخرتها ما كوم تراب زي ما قالوا لينا
بالواسوق والكوريق يتردم علينا
آخرتها حساب وثواب وعقاب بالذرة يا والينا
ومن يعمل مثقال ذرة خيرًا فينا
ليس كمن يعمل مثقال ذرة شرًا يطلع عيننا

سلك كهربا
ننساك كيف والكلب قال من أمن الحساب ما حايعمل حسابو
والي لقاء

سلك