نفقة متعة

بابكر سلك

كتير من الناس مفتكرين المحاكم دي جامدة وجادة وكلها صرة وش
عشان كدة بجوا المحكمة يرجفوا
صمت شديد
الواحد كان سالوهوا مابرد
مستني بس لحظة يمرق من المحكمة
شغالين صامت
وشغالين هزاز
صامت مع الاهتزاز
وطبعا الوضع مفروض خلاف كدة
لأنو المحكمة ساحة عدالة
والزول البجيها مفروض يكون مطمئن وما خايف
مفروض الزول لما يكون جوة المحكمة يكتب في حالتو
يشعر بالأمان
المهم
المحاكم برغم تلك التكشيرة المفترضة فيها
إلا أنها لاتخلو من مواقف طريفة
ومواقف محرجة تجلب الطرافة للجلسات الجافة
من تلك الطرائف
مرة طلقوها (قبلها وحدها)
ماعندها أولاد
مشت المحكمة رفعت دعوى نفقة عدة ونفقة متعة
كتب ليها العريضة عرضي حلجي جمب المحكمة
صرحوا ليها العريضة وحددوا جلسة أعلنوا بيها المدعى عليه (طليقها)
يوم الجلسة حضروا الاثنين
ندهوهم دخلوا على القاضي
القاضي قال انتي السرة؟
قالت ليهو نعم يا مولانا
القاضي قال انت حامد؟
حامد قال ليهو بالحيل يا مولانا
القاضي قال ليهم مافي طريقة صلح؟
السرة قالت ما دايرة أي صلح مع الراجل ده لأنو كضاب وما عندو كلمة بتتمسك
القاضي قال لي حامد مافي طريقة تسوية وتدفع للمرة دي؟
حامد قال ليهو تسوية مع السرة الغالاطه دي ما دايرو
محكمة بس.. لو حكمت يا مولانا بمليار بدفعها
نطت السرة مليار بتدفعها يا حامد أمريكا
القاضي وبخها وأمرها بعدم الهرجلة
وفي سرو قال وانتي قايلة روحك خديجة أمريكا يا سرة أم بدة؟
وواصل القاضي مخاطبهما
قولي يا السرة كلامك وخلي بالك للكلام يا حامد
السرة… الراجل ده كان متزوجني سبعة شهور على سنة الله ورسولو وشايلاؤه في راسي ده
يصحي الصباح يلقى حمامو جاهز (رغم إنو ما محتاج ليهو) ويلقى شاهيهو وجبنتو وجلابيتو مغسلة ومكوية
يتحنطر ويتجوغر ويلبس ويمرق يجي المغرب
يلقى بيتو منضف ومبخر وسريرو مفرش وغداهو جااااهز
يتسمم ويرقد ينوم
ما قلت شي
بسكت والم عدتي وارقد أنوم
يومي الم عدتي وارقد أنوم عشان أصحي قبلو أجهز ليهو حمامو وجبنتو
بعد ده كووولو يا مولانا ما طمر فيهو طلقني قبال أربعة شهور
أربعة شهور ما شفت فيهن منو (ملين) حمرة
زي السبعة شهور القعدتهن معاهو وما شفت لا جنا لا تنا
أسي دايرة جميع حقوقي
اتلفت القاضي على حامد
يا حامد كلام السرة دي سمعتو؟
سمعتو
رأيك فيهو شنو؟
ممكن يا مولانا (سوعال) قبال أرد؟
ممكن يا حامد… سؤالك شنو؟؟؟
نفقة المتعة دي شنو؟
ده نظير أجر تمتع الرجل بزوجته أثناء قيام الزوجية الصحيحة بينهما
حامد صنقع ودنقر وقال
ممكن (سوعال) تاني للسرة دي يا مولانا؟؟؟
مولانا….. اتفضل يا حامد
حامد يلتفت على السرة
السرة…. قبل عام أول كنتي متزوجة؟
أيوة قبلك كنت متزوجة
حامد أنا الزوج رقم كم ليكي يا السرة؟
السرة… رقم خمسة
حامد يلتفت نحو القاضي
بتقولك يا مولانا (ني) رقم خمسة في الرجال الاتزوجوها.. متعت شنو الدايراها مني،،،،،
قال ليك القاضي ضحك لمن رفدوهوا وأسي شغال عرضي حالجي جمب نفس المحكمة
من هذه الطرفة التي حدثت بالمحكمة الشرعية
حقو يستفيد محامي المريخ منها ويصطحبها معه في الرد على الفيفا في جلسة مطالبة سانتياغو
قال من طرف واحد وداير نفقة متعة كمان

أيها الناس
إن تنصروا الله ينصركم
أها
نجي لي شمارات والي الخرتوم
كان شفت يا والينا
زي السرة كتار فينا
وزي حامد البنوموا من عصرا بدري برضك فينا
واللي شبكنا يخلصنا يا والينا

سلك كهربا

ننساك كيف والكلب قال نفقة المتعة دي زي رسوم المحلية من تاجر ما استفاد من المحلية شي وبتقول ليهو رسوم تمتعك بالخدمات الحكومية

وإلى لقاء

سلك