بابكر سلك
قبل أن يلفت نظري ارتفاع مستوى المسؤولية في الأداء المريخي،
وقبل أن يلفت نظري المستوى الرائع الذي أدى به محمد الرشيد والاحترافية التي زاملت أداؤه (ما تستغرب لو قلت ليك أول يوم أشوف حمو يلعب بهذه السلاسة)، السهل الممتنع،
وقبل أن يلفت نظري عدم لجوء حمو للت والعجن واستخلاص الكرة بمخالفة،
وقبل أن يلفت نظري التحكيم في كورة الهلال الذي أعفى الهلال من ضربة جزاء صحيحة وحالة طرد، وحرم الوادي من ضربة جزاء خدمة يمين وعرق جبين،
وقبل أن تلفت نظري ضربة جزاء الهلال القاطعها الحكم من راسو،
وقبل أن يلفت نظري إلغاء الحكم لهدف رمضان الصحيح واحتساب هدف الأنيق الأوف سايد،
وقبل أن يلفت نظري خرمجة الجمل واستهتاره،
وقبل أن يلفت نظري كانتي بمشاكساته التي تحتاج لتوجيه بسيط،
وقبل أن يلفت نظري كسير تلج ياسر مزمل للغربال حينما مرر الكرة وهو داخل المرمى للغربال كي يحرز الهدف (يؤثرون على أنفسهم)،
وقبل أن يلفت نظري أن أمل عطبرة طوالي لاعب على أرضه ووسط جمهوره، ومفروض مجلسنا يكون ليهو رأي،
وقبل أن يلفت نظري هدف الوادي التالت الاتخطف من جان كلود،
وقبل أن تلفت نظري حركات الحكام التي أكدت أن مصيبتنا دائمًا في حكامنا،
قبل كل ذلك لفت نظري عبارة مكتوبة على شعارنا:
كن شريكًا
عبارة جميلة في معناها.
سألت عن سرها، قالوا لي: دي لجنة الاستثمار الجديدة وقاصدين تجديد العضوية.
فسألت نفسي: كم يا ترى أصبحت رسوم العضوية الشهرية؟
وكم تساوي أمام الدولار الجمركي الهايج فينا ده؟
وهل رسوم العضوية تعتبر استثمارًا كافيًا أو أحد الاستثمارات التي نعتمد عليها في تمويل النادي؟
ما علينا…
أنا أول حاجة كنت قايلها (مغرزة)، مكاواة للأفواه الكتيرة الشغلتها بقت انتقاد الأداء والجهاز الفني والمجلس.
والخلاني أذهب للرأي ده بقولوا النمير بنفرد بالقرارات، لا بشاور مجلس ولا بشاور محلية.
الدليل قالوا: التمديد لسوليناس.
هم بقولوا كدة لأنو معروف إن النمير (كتر خيرو) هو الدافع الوحيد في المجلس، فطالما انفرد بالدفع يبقى طبيعي ينفرد بالقرار، وهي سياسة تضع بقية المجلس في مربع القبول لقرارات الرئيس، وهز الرأس دليل الموافقة.
مرات الزول بهز راسو فوق وتحت في إشارة إلى إنو فاهم، وما بكون فاهم الترابة، والمادافع الترابة يهز راسو موافقة وبس.
وكأن شعار النمير هو العبارة (الترباسية) الشهيرة:
جني وجن الزول المادافع في السمكة ويقلبها
عشان كدة سمكتنا على منضدة المجلس كملت بي سايد، لحقت أُمات طه، وزول قادر يقلبها مافي، قاعدين راجين سيد السمكة يقلبها، عشان بعد يقلبها يغنوا:
قلبا قلبا قلبا
شغلة زي باص ياسر مزمل وهو جوة الشبكة للغربال الأبعد منو.
ولما جات قصة كتابة كن شريكًا، أنا فهمت منها إنها خطاب للنقاد من الجماهير والإعلام، عبارة فهمت منها إنها تريد أن تقول:
ما تقلب السمكة يا زول هووي طالما أنت ما دافع فيها.
ومن حقهم… أو من حقو… دي الأصح.
المهم:
يقول صديقي: النخبة دايرة المريخ، فهل المريخ داير النخبة؟
ابقوا معنا.
أيها الأهلة الشرفاء:
الهلال ما كعب، ما اتغلب من الأمل ولا درن استروبيا مع الوادي.
الهلال قاصدها… نططوه أولى (سيكافا)، نططوه تانية (الكونفدرالية)، ودوه تالتة طوالي (الأبطال).
عشان كدة نيف وتسعين سنة بسقط.
السنة دي الهلال قاصدها… داير يرجع تانية (الكونفدرالية).
لو سقط يرجع أولى (سيكافا)، ولما يسقط يودوه محو الأمية يفك الخط، أخير من قعاد ساي.
كلمناكم
قلنا ليكم فتح الأبواب أمام سيل الأجانب يضر بالنادي والمنتخب، قلتوا أبددددا.
يلا خموا وصروا.
تحكيم نضيف وحريف، الشافكم في التأهيلي ما كضب.
أيها الناس:
إن تنصروا الله ينصركم
أها… نجي لي شمارات والي الخرتوم:
كان شفت يا والينا، حكامنا هم سبب بلاوينا، فيهم البخون وفيهم الما بعرف يا والينا، أي حاجة يحسبها علينا، أي قون يخش فينا يكون سارق يا والينا، والحكام ورجال البيارق عاملين رايحينا، الله ينتقم من الحكام القاصدين وعارفين عملوا شنو فينا.
سلك كهربا
ننساك كيف والكلب يهتف:
تسقط تسقط الأمطار
والي لقاء
سلك
