الجمل اداهم الإحداثيات
بابكر سلك
لا مطرة نزلت حلتنا من الفضيحة
لا كتاحة جات كندكتنا على الكندكة العلينا
ولا خجلة انتابت مجلسنا، بطل ثقالة ومارس أدب الاستقالة
ولا الهلال كان كويس
لأنو لو الهلال كان كويس كان مفروض يدينا دستة
لأننا فريق متهالك
متباعد الصفوف
جهازه الفني يشبه مجلسه
ما عارف روحو بعمل في شنو ولا داير شنو
لاعبين لا لياقة، لا لباقة، لا بلاغة، لا غيرة، ولا حتى خجلة
أما الجمل
الزول ده ماشيين بيهو أفريقيا!
الزول ده متعاون
متعاون كبير
برفع لي ناس الهلال الإحداثيات
وعلى أساسها يرسلوا المسيّرات
من أبعد المناطق يرسلوا المسيّرات بكل ثقة
إحداثيات مظبوطة
الجمل ده متعاون كبير خلي بالك
لكن والله الهلال لو كان كويس كان أدانا دستة عديل
غايتو الشفناه أمس ده ما مريخنا
ده مريخ (أهل المريخ)
ولا أدري
هل هي فضيحة بي جلاجل أم جلاجل بي فضيحة؟
معقولة توصلونا يا النمير لدرجة نتمنى تنتهي تلاتة؟؟؟؟؟
يخس على كده
تسعين دقيقة نقلتين صاح ما فيها
ده كووولو كوم
جملكم ده ما بودّينا لي قدام
لكن المحيرني
الهلال بالصف التاني يدينا أربعة؟؟؟؟؟؟
بي طريقتكم دي السنة الجاية (لو ما كتلتونا) بتنزلونا
صدقوني
واللاعب مهما يكون كيسو فاضي، ما بلعب زي ناسنا ديل
لعب الكيس الفاضي بنعرفو
ولعب الجيب الفاضي بنعرفو
ده ما لعب كيس فاضي غايتو
أيها الناس
تصدقوا وصلنا أو أوصلونا لدرجة إنو لا يفرق معانا شي لو التيم كلو ذهب
درجة ما فيها لاعب واحد يستحق أن نشجعه أو أن نندم على ذهابه
ففي عهد مجلسنا هذا ذهب (الذهب) ذاتو
الصفر ما بنندم عليه
لا حول ولا قوة إلا بالله
الفاتحة
وطبعاً الفاتحة بنرفعها في حالتين
لمباركة بداية مشروع خير، زي في الخطوبة أو عند توقيع عقد شراكة
والتانية لعزيز رحل، نسأل الله له الرحمة
يا ربي فاتحتنا دي تبع الأولى ولا التانية؟؟؟؟؟
أفتونا يا (أهل المريخ)
جريتوا بيهو الموردة، عستوا عواستكم، ولحقتوه أمات طه
أيها الناس
الحل واااااحد وواااااااضح
وإلا
نلتقي بدار الرياضة أم درمان
ذاتنا كبرنا وننوم بدري من المغرب أحسن لينا
مبروك للإخوة الأهلة الشرفاء
وهاردلكم الخروج بهذه النتيجة الضعيفة أمام فريق متهالك يشبه فرق الروابط، في ظل مجلس لا بحس لا بشعر
فرصة تاني ما بتلقوها
لأنو لو استمرّينا بهذا المجلس وهؤلاء الأشباح
بالتأكيد ما بنقعد في الممتاز عشان نلاقيكم
ولا إنتوا بتجونا في دار الرياضة أم درمان
والله يجازي الكان السبب
أيها الناس
إن تنصروا الله ينصركم
أها
نجي لي شمارات والي الخرتوم
كان شفت يا والينا
على العلينا
أمس في كورة الهلال اكتشفنا متعاون وسطينا
يرفع في الإحداثيات ونحنا اتبلينا
متعاون طويييل وكبييير يا والينا
سلك كهربا
ننساك كيف والكلب قال لما تلقوه كلموني أجي أشجع معاكم
وإلى لقاء
سلك
