هي وينا الشخصية؟؟

بابكر سلك

*في أقوى حالاتنا كنا ضعاف
*لما كان تيمنا يتلتل واستادنا يخبل
*ما كان عندنا شخصية
*تتذكروا الهلال وقتها كان كيف؟؟؟؟
*ينسحب من الممتاز كلو
*يوقف البلد على كراع واحدة
*نبحث له نحن الحلول مع الاتحاد
*والغريبة نطالب الاتحاد باحترام شخصيتنا
*زمااااان
*في المسرحية
*الشرطي قابل مواطن
*الزول اشتغل هزاز
*قعد يرجف كلو
*العسكري قال للزول: بطاقة
*زولك صنقع دنقر وقال:
*بطاقة شنو يا جنابو؟
*العسكري قال ليهو: بطاقة شخصية
*الزول ابتسم (حلااااتو)
*وقال للعسكري: هي وينا الشخصية البعملوا ليها بطاقة
*كلام الزول ده كنت دايمًا أتخيل الاتحاد بقولوا لينا لما نتحنفش ونطالب باحترام شخصيتنا
*أيام سولي شريف
*كسر الهلال اللوائح
*ورفض اللعب
*ونيل الحصاحيصا المسكين خسر حق المواصلات لما جا الملعب
*لا لقى الهلال ولا أدوهو النقاط، وأعادوا ليهو الكورة كمان
*ونحنا خاتين الخمسة في الاتنين بغم ما قلناها
*بل كمان اتدخلنا وتوسطنا للهلال وخارجناهو من تلك الورطة
*ونطالب الاتحاد باحترام شخصيتنا
*ولسان حال الاتحاد يقول لينا:
*هي وينا الشخصية البعملوا ليها بطاقة
*في أقوى حالاتنا كنا ضعفاء
*ضعف زي ده في مصر خلّى الزمالك في مصاف أندية الوسط
*حتى لاعبينو بمشوا يخلّوه
*ذلك الوهن للأسف هناك أسباب ليهو قادتنا
*قادتنا هم السبب، لأنهم قادونا لهذا الانكسار والدونية التي أفقدتنا الشخصية
*فعلام نبحث اليوم عن استخراج البطاقة الشخصية؟
*أيها الناس
*قطعًا ما فيكم زول نسي ولا بنسى تلك الواقعة التي أثبتت إننا فاقدين لسند الشخصية
*تتذكروا لما كنا مع الهلال في مجموعة واحدة أيام مشكلة الاتحادين؟
*أطراف المشكلة بردوا المشكلة، ووضعوا الكورة واطة، وأجّلوا عراكهم إلى ما بعد كورتنا ضد الهلال
*انتصرنا على الهلال اتنين صفر
*فقد الهلال الأمل في الصعود
*واتسعت أمامنا مساحات الأمل للصعود
*كان ممكنًا
*سافرنا لتونس لنقابل النجم، الذي ضمن الصعود، ولا صالح له في ملاواتنا
*فجأة قام طرفا النزاع ناس الاتحادين باستئناف العراك
*لا لشيء سوى تدخل الفيفا
*والذي يعني تجميد السودان
*وبالتالي تجميد الدم في عروقنا
*ماذا فعلنا حينها؟
*ألم يكن لدينا مجلس إدارة وقتها؟؟؟
*ماذا كان دوره غير تخدير الجماهير بأن هناك برقًا يلوح في الأفق؟؟؟
*منتهى الحقارة، وسكتنا كالعادة
*لأنهم عوّدونا على الإجماع السكوتي
*وبعد ده نسأل عن البطاقة؟
*في وقت الأجدر فيه أن نبحث عن الشخصية أولًا حتى نطلع ليها بطاقة
*أيها الناس
*تتذكروا مشكلة هيثم والبرير
*مشكلة بين لاعب ورئيس نادي
*تدخلت لحلها رئاسة الجمهورية
*القصر خلّى الوطن ومشاكل الوطن وتفرغ لحل إشكالية هيثم والبرير
*تقول لي فنيلة ميسي؟؟؟
*وهناك إصرار الاتحاد والحكم أبو شنب أن نلعب مباراة الأهلي بمدني رغم الأمطار التي خرّبت الملعب
*فلعبنا على سطح بركة زي البط
*وخسرنا بالتعادل
*وتم تأجيل مباراة الهلال على نفس الملعب، والتي كان مقررًا لها أن تُلعب بعدنا بيوم
*بل سمحوا كمان للهلال أن يؤدي مباراة ودية دولية معلنة عشان يكسروا بيها إيقاف ناس عمر بخيت الذين نالوا من الكروت ما يوقفهم عن اللعب
*ومجلسنا وقتها لم يفتح الله عليه ولا بمجرد (صرة وش)
*وتجي بعد ده كلو تقول لي شخصية؟؟؟
*الآن يقولون إن المريخ سيُجبر على أداء مباراة كأس السودان بأمر من السلطات
*السلطات دخلها شنو في الشأن الكروي؟؟؟
*السلطات ذاتها فاضية؟؟؟
*السلطات عليها أعباء فرض الأمان بالوطن، وإعادة إعماره، وإعادة أبنائه المشتتين بعيدًا عنو أو بداخله
*السلطات يجب أن تكون مهمومة بإعادة تأهيل نفسيات المواطن
*لذا أعتقد أنها لا تتدخل في هكذا موضوع أو يفترض
*السلطات تشوف جازها وين
*المريخ علاقتو شنو بذلك؟؟؟؟؟
*أيها الناس
*وأخص الناس الذين ذهبوا فرادى وجماعات للموردة
*تسوقهم الغيرة على المريخ
*ليقتلعوا مجلسًا فاشلًا بحسب تقديراتهم
*مجلس خلال أربعة سنوات فشل في أشياء كتيرة حسب قولهم
*لم ينجز سوى تلاتة ممتاز، والمركز الرابع بالبطولة العربية التي كنا مرشحين لبطولتها
*فضلًا عن بطولة (مركوب الفاشر)
*وهزيمة الهلال بالممتاز بعقر داره والتي لم تحدث منذ عشرين سنة
*ده كان الفشل القاد الناس للموردة لاقتلاعه
*الناس ديل هل سيذهبون للموردة مجددًا بنفس الغيرة؟
*سيما ونحن من مشوا الموردة قبل أربع سنوات لم نحقق ولا بطولة
*ولا الخروج على الحاكم في هذه الحالة حرام؟؟؟؟؟
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*في فقه الأولويات المفروض علينا
*يجب أن تتفرغ السلطات يا والينا
*لما يليها من أعباء في إعادة المواطن للوطن، والوطن لينا
*إنها مرحلة بناء يا والينا
*وأمر نلعب ولا ما نلعب تخليه لينا

سلك كهربا

ننساك كيف والكلب قال: هي وينا الشخصية الدايرين ليها بطاقة

وإلى لقاء
سلك