بابكر سلك
*زين العابدين بتاع تونس
*لم يعر شعبه اهتمام
*ساط وعاس زي ما داير
*توانسة السياسة نبهوهو كتير
*قالوا ليهو الشعب ده ما تشوفوا ساكت كده كان قام صعب
*ما اشتغل بيهم الشغلة
*اشتعلت الشرارة بسبب الحقارة
*عندما قامت ضابطة الشرطة بضرب مواطن شاب بالكف بالشارع العام
*الشعب أساسًا كان معبأ
*والتهب الشارع
*الشارع ثار
*غضب الأمة اتبدد ناااار
*والشارع ثار
*أدرك زين العابدين بن علي خطورة الموقف بعد خراب مالطة
*فخرج على الشعب بوعود للإصلاح وتحقيق الرفاهية
*وقال قولته الشهيرة
*الآن وعيت الدرس
*ولكن رد الشارع كان واضحًا
*انتهى الدرس يا غبي
*وها هو التاريخ يعيد نفسه
*النمير الذي مارس سلطاته بكل عنجهية وتهميش حتى لأعضاء المجلس الذين عيّنوه
*نزل عن برجه العاجي وتنازل عن صلفه تحت ضغوط الشارع المريخي
*وطفق يقدم في الوعود ويجدد العهود ويقدم المغريات
*قرب يقول الآن فهمت الدرس
*والشارع المريخي المهذب لم يستعمل عبارة الشارع التونسي كاملة
*أسقط اللفظ الدال على عدم التهذيب
*واستعار الاسم الدال على الموصوف المقصود صراحة
*على سبيل الاستعارة التصريحية
*وقال انتهى الدرس يا نمير
*القصة ما قصة رغيف
*القصة قصة شعب مقهور بالفشل
*وبمنتهى الأدب طالب (بن علي) بالاستقالة رفقة من عيّنوه
*مع خالص الشكر والتقدير
*من أين لك سيدي النمير بالوعود البراقة
*وأنت عملت لينا المريخ زي الري المصري
*كلو مصريين لا هدف لهم سوى الحفاظ على أي قطرة ماء لصالح مصر
*ونحنا زرعنا مات عطش وصهاريج المياه عندنا تملأها الآهات والحسرات
*ارحل حبيبنا
*الشارع المريخي قال ليك
*قلت ارحل
*وعلى ذكر إخوتنا المصريين
*دائمًا في درامتهم
*لما يقبضوا متعاون مع قوى الشر
*بقول أنا (محطوط) هنا
*حطتني الحكومة
*يعني مزروع
*وعشان نطلع من سيرة الحط والزراعة
حقو نتعامل بعقلانية وبدون (قوة راس) ونعترف بأن الحاكمية للشعب الذي قال كفاية حرام خلاص
*توعدنا بي شنو؟
*توعدنا وتبخل بالصورة؟
*توعدنا بالتاء؟
*توعدنا بنادر خليل؟
*توعدنا بتسجيلات تهز الأرض؟
*وجهاز فني جهبوذ؟
*نادر خليل حيقول ليك جهاز فني ما يخرش المية
*جهاز فني حيَهِز الأرض
*وينسى اهتزاز الأرض مسبقًا بزلزال (أربعة) درجات بمقياس ريختر
*التسجيلات بقوم بيها منو؟
*منو البختار وبعزل لينا لعيبة نسجلهم؟
*موش ياهو السيد نادر؟
*الجاب لينا سوليناس وغريب وسانتياغو وطفش عضم التيم؟
*موش ياهو الزول الإنت فاكي ليهو الرسن ولما فشل أبيت تعمل ليهو القيد حرن؟
*يعزل لينا تااااني؟
*قالوا يا عمر يا أخوي
*قال لأبوه يابا أنا قررت أتزوج
*أبوه فرح وقال ليهو
*ده أجمل خبر سمعتو
*خليني أتغدى وأشرب الشاي ألبس جلابيتي وعمتي وأمشي أعزل ليك عروس
*الولد ضحك وقال لأبوه
*خليني أعزل برايي يابا
*عزلك شفتو في أمي
*أها
*دحين نحنا عزلكم يابا شفناهو في ناس سانتياغو وسوليناس وغريب
*يبقى ما في أي إغراء من وعودكم الجديدة دي
*عزلكم شفناهو
*كتر خيركم
*أيها الناس
*البقت بقت
*المجلس ده من ناحية ماشي ماشي
*في سبيل ذهاب هذا المجلس بكرامته أو بدونها
*أو بإجباره على الذهاب
*غدًا سنتناول الفقرات الخاصة بذلك في نظام 2019 تعديل مارس وتعديل يوليو 2021
*من ناحية ماشيين ماشيين
*ما في نقاش
*والحتة دي ذكرتني أهلا لينا جوا من الولايات بالبكاسي فرادي وجماعات
*جوا مستشفى أم درمان عندهم حبوبة ليهم دخلوها الإنعاش
*عمك زعيم كبير وصل في البكاسي الأولى
*دخل المستشفى بسأل عن بت الحسن
*قالوا ليهو في الإنعاش
*مشى الإنعاش الممرض قال ليهو ممنوع الزيارة لمصلحة المريض
*عمك قال ليهو مصلحة مريضنا ما بتورنا ليها إنت
*ووقف في محلو لم يبارحو قيد خطوة
*الممرض قال ليهو
*يا حاج ما قالوا ليك الزيارة ممنوعة واقف مالك؟
*عمك فنجري
*شنبو زي الساعة تلاتة إلا ربع
*فنجري كبير
*زول مك
*خشم باب وضو قبيلة
*عاين للممرض بقعر عينو وقال ليهو
*نحنا من ناحية داخلين داخلين بس عندنا ناسا لينا لسه ما وصلوا
*يصلوا وندخل كلنا مع بعض
*لكن من ناحية داخلين داخلين
*أها
*شعب المريخ الفنجري برم شنبو وقال ليكم
*من ناحية ماشيين ماشيين
*بس عندنا مراجعة لكل الأنظمة الأساسية الشرعية منها والغير شرعية عشان نأكد ليكم إنكم من ناحية ماشيين ماشيين
*مصلحة مريضنا ما بتورونا ليها إنتو
*أيها الناس
*إن تنصروا الله ينصركم
*أها
*نجي لي شمارات والي الخرطوم
*كان شفت يا والينا
*كل البلاوي الفينا
*إننا ما شغالين بالبلد وبنستهتر بقوانيننا
*نلوي عنق قوانينا
ونجقلب لما تبقى فينا

سلك كهربا
ننساك كيف والكلب قال عزلك شفتو في أمي يابا
وإلى لقاء
سلك