بابكر سلك
*الصقور فرحانة
*بل أفرحتنا
*فرحة في الزمن الحزين
*بالأمس رفرف علم السودان بين الأمم
*رفرف عالياً خفاقاً تعبيراً عن كبرياء أمة
*أمة مليانة تفاؤل حتى في أحلك الظروف وأشد النكبات
*دخلوا المباراة دون أدنى إحساس بالدونية برغم قوة وسمعة ونجاعة الخصم
*دخلوها بإصرار على التأهل
*دخلوها وصقيرها حام
*يا سلام
*ويا سلام
*حتى على المدرجات كان الحضور السوداني متألقاً ومتأنقاً
*مبدعاً مستمتعاً ببسالة أبنائه
*كان جمهوراً من الجنسين
*شباب يزأر
*وشوف عيني الوزين بصدره عام على المدرجات متوشحاً بعلم السودان
*وقلع
*ويا سلام
*فكان زئير أسد الأخير معلناً تأهلنا
*بثبات سددها وكأنه يقول لوزينة سودانية على المدرجات:
“عومي وعومي وعومي، وأديني الشبال يطفي ناري”
*وما بالك من الذين تسمروا أمام الشاشات وخلف شاشات التلفونات
*تارة يشجعون
*وتارة يبتهلون
*وتارة يسألون عن الزمن
*ما تسألوا عنه
*إنه الزمن الجميل
*زمن الانتصار على منتخب كبير
*الشقيقة جداً وتوأم الروح الجزائر
*ولو لا كان المطلوب واحد منا لأخذناها رفقتنا للمرحلة المقبلة بكل حب
*وجميعنا يعلم حبهم لنا وحبنا لهم والاحترام المتبادل
*التحية يستحقها أي سوداني
*على هكذا انتصار
*في الآونة الأخيرة نلاحظ انضباطاً تكتيكياً لا تعرفه ملاعبنا
*فخطة المدرب عندنا كان بالغنا ربع ساعة ونفكها عكس الهواء
*لكن انضباط وظيفي للدقيقة ستة وتسعين ده ما شفناهو إلا زمن الحبيب كواسي
*انطوه رقم وطني الراجل ده
*الشرود الذي يلازم اللاعب السوداني عادة والذي يقوده للانهيار في النهايات فارقناه فراق الطريفي لجمله مع كواسي ده
*زول بلعب بالطريقة الاقتصادية
*التخصص وتقسيم العمل
*عشان نصل لأجود منتج بأقل تكاليف ونحقق أعلى أرباح
*ولأننا شعب يحب الجمال
*ونفخر دوماً بكل جميل
*ما تستبعد لو بكرة لقيت ليك قصة في الفيس تحكي عن أن كواسي سوداني
*أبوه سوداني وأمه غانية
*أبوه مشى غانا بدري اشتغل هناك واتزوج من هناك وجاب الوليد ده
*وأبياه أساساً “إبراهيم” لكن الغانيين ما بعرفوا ينطقوها فبقولوا أبياه
*ألا يحق لنا أن نفخر بالرجل ونبحث عن أصوله السودانية في طبقات ود ضيف الله أو في واحد من كتب عون الشريف قاسم؟؟
*الزول ده عويناته بشبهننا
*حقنا
*أيها الناس
*الطموح والثقة بالنفس والعمل الجاد وإعطاء العيش لخبازه لابد وأن يكون الناتج نجاحات كبيرة
*وبرغم قصر الإعداد الذي أدى لانهيار اللياقة عند بعض أولادنا
*إلا أنه بلباقة الأداء والحرفية والاحترافية
*استطعنا أن نجرجر الجزائر الحبيبة لشوطين إضافيين ثم لركلات ترجيح وضح تماماً تمريننا عليها بكثافة
*لذا لم أستغرب وأسَد يزأر بين محاربي الصحراء بقوة
*غايتو يا أبياه لا تفوت لا تموت
*فأداء أولادنا اختلف كثيراً
*وكثيراً جداً
*فإذا كان هذا المنتخب ينقص الغربال والكابيتانو رمضان وود المصطفى للإصابة، وأبو عاقلة والجزولي ومانو وبخيت وطيفور وتيري للاحتراف
*تصور كيف يكون الحال لو اكتمل العقد!!!!!!
*زمااان لاعب واحد ناقص
*الضحك بشرطنا
*كواسي
*دي موش كورة
*دي مزيكة
*مبروك السودان
*مبروك لكل ما هو سوداني
*مبروك لكل من هو سوداني
*وخليك سوداني
*أها
*نجي لي شمارات والي الخرطوم
*والينا
*جد لينا وجد لينا
*بقينا نغلب الجزائر يا أخينا
سلك كهربا
ننساك كيف والكلب قال اسمعوا القصيدة دي… اسمها قصيدة الكلب:
*اقراها باللهجة المصرية عشان تستمتع
الكلب مخلص صح؟؟؟
طب ولاد الكلب ليه مش مخلصين؟
هم مش بقولوا الأب قدوة؟
طب ما أبوهم طيب هم بقى طالعين لمين؟
كنت مرة مربي كلب
وعاش معايا حبة حلوة
وبصراحة الكلب أجدع من صحاب عشرة سنين
الكلب لو أكلته مرة لقمة ناشفة يموت عشانك
يمشي جنبك وانت ماشي وعمرو ما يفارق مكانك
ليه بقى الإنسان بياخد كل حاجة وبرضو يقسي
وفي ثانية واحدة طباعه تقلب وتلاقيه هانك وخانك؟
واللي مش عنده المبادئ
شخص خالي من الأمانة
يبقى مع غيرنا علينا
ويبقى على غيرنا معانا
يلبس الوش المناسب
بس في الوقت المناسب
هينه واديله اللي عايزه
يقولك يا مرحب بالإهانة
هو ده النوع اللي فعلاً
عيب عليك لو كنت جنبه
وهو ده تعريف حقيقي
لبني آدمين جعانة
وإلى لقاء
سلك
