بابكر سلك
*لجنة التسيير الجديدة ماسكة خشمها عليها وشغالة
*أظنهم يرفعون شعار السواي ما حداث
*يسويها الله
*أو يرفعون شعار إن في الصمت كلام
*يا كمان الناس ديل ساكتين فوق رأي
*ما ساكتين ساي
*ربنا يوفقهم
*يوفقهم دي ما ذكرتكم بالوفاق؟
*التوفيق الحقيقي الذي ينشده الاستقرار بالمريخ
*المهم
*الناس ديل ما ساكتين ساي
*ساكتين فوق رأي
*وشغالين سكتم بكتم (بضم سين سكتم وباء بكتم)
*وعلى الرغم من ذلك تفاجئنا الحصريات في العصريات
*يعني الحارس الجديد ده جابوه لينا جوة الطيارة قبل يصل أديس
*وقصة نداي
*وموقف الست حرم نداي
*وتفاصيل عقده المستمر مع مازيمبي (فايف جي)
*الكلام ده كووولو جانا بالتفاصيل في الحصريات
*ولجنة التسيير بتقول (خشمي عندي) ما قلتو لي زول
*ولو قلتو بقول قلتو وأنا ستو
*طيب ناس الحصريات ديل عندهم وداعية يعني؟؟
*ولا بشوفوا الخيرة عند رمالي؟؟؟؟
*أنا مع لجنة التسيير كون أنها بتعمل في سرية
*سرية كاملة؟؟؟
*ويجب أن لا يكون خشمها خفيف
*لأجل صالح العمل ما لي شي تاني
*يعني أسي لو ما الموضوع طلع
*وصل أولاد نداي إزاي؟؟؟؟
*قابلتها صدفة فطومة أختي عند الحنانة يا ربي؟؟؟
*أكيد القصة ليها راوي
*والراوي ما حاوي
*قصة الحصريات والسبق الصحفي مرات بتضرنا شديد
*بتمرق أسرارنا وتحير أفكارنا وبتخلينا كتاب مفتوح لي جارنا
*وقبل كدة تسابقنا صحفياً وتنافسنا في نشر واقعة استفاد منها الجار وصلح الغلط
*ولو صبرنا مانشيت واحد كان خسر الجار بالشكوى
*عشان كدة حقو نبقي غتيتين شديد
*أبوك مثلاً يمشي السوق
*حليل أبوك وحليل السوق
*أبوك يمشي السوق وأنت عارف
*يسألك زول
*أبوك في؟
*والله ما متأكد
*شوفو لي بالله
*تدخل البيت تفتش أبوك وأنت عارفو مافي
*يمة أبوي في؟
*مافي
*تطلع للزول
*أبوي ده جوة ما لقيتو
*أسأل ناس بيتكم مشى وين؟؟؟
*قالوا مرق مشى مشوار
*مشوار وين؟
*مشوار كدة لكن ما عارف وين
*يجب أن نتعامل مع أسرار نادينا كدة للمصلحة العامة
*موش نفتو ونحتو في سباق حصريات من العصريات
*المهم
*يا ناس لجنتنا
*خشمكم عندكم
*أبوك مشى وين
*إجابتك لازم تكون حاضرة
*طلع مشوار كدة لكن ما عارف وين ولا عارف بجي متين
*أيها الناس
*ناس لجنة التسيير
*فترة الإحلال قربت تنتهي
*اقضوا حوائجكم بالكتمان
*لكن شوفوا لينا الحوائج السمان والمعسكر الأمان والمدرب الضمان
*ما يكون قرارو عند النسوان
*يكون (مان)
*المهم
*الأهم
*يجتمع اتحاد الكنغو اليوم للتقرير في شأن قضاء كاس في شكوى مازيمبي بضرورة إكمال الموسم
*وطبعاً مافي طريقة
*يعني الصح أننا نتأهل مباشرة للدور التاني
*يسويها الله
*لأنو لما حصلت قبل كدة جبنا مانديلا
*وما أدراك ما مانديلا
*والقصة دي ما مفروض نخليها على مزاج الكاف برغم حكم كاس
*نساعدها بي جكة
*نخاطب الكاف بدعم من اتحادنا متمسكين بقرار كاس
*لأننا وإن كنا ما تابعين لاتحاد الكنغو
*لكن أصبحنا بقدرة قادر أصحاب مصلحة في تنفيذ حكم كاس
*أيها الكاس
*أقصد أيها الناس
*إن تنصروا الله ينصركم
*أها
*نجي لي شمارات والي الخرتوم
*كل الدول البدت بعدنا فاتتنا يا والينا
*مشوا بعيييييد ونحن يانا نحن في محنة قابعينا
*جنسك شنو وأهلك من وين وربك منو وأسئلة لا تقدمنا لا تغنينا
*مهما كانت إجاباتها يا والينا
*متى يدب الوعي فينا
*فنحن الفينا مكفينا
سلك كهربا
ننساك كيف والكلب قال كنتم قاطرة تجر العربات أصبحتم عربة فرملة في آخر القطار ولسة تتصارعوا على الفرملة…. فكوا الفرملة خلوها تدردق
وإلى لقاء
سلك
