*نلتقي مدغشقر اليوم
*ممنوع الوقوف علي محطتهم
*يجب أن تكون مجرد محطة عبور للمحطة النهائية
*ولن تكون كذلك إذا لم نأخذهم مأخذ جد
*لا استهتار ولا غرور ولا قلة طموح
*طالما ثقتنا بأنفسنا أوصلتنا لهذا المقام
*يبقى نمسك في الثقة بدون غرور ولا خيلاء
*هم ذاتهم منتخب ماساهل
*وليهم طموحهم
*ويكفي أنهم تأهلوا على حساب كينيا صاحبة الأرض والجمهور
*يلعبون كرة سريعة
*يجيدون المرتدات
*يلعبون بحماس
*كلها ميزات تميزهم كثيرًا
*لكن مقلبين
*قصار شديد
*شدة ما قصار كورة أرضية ممكن يدقوها (هد)
*وهنا ممكن نستغل الوضع ده
*نشعلبها في السما ده
*نخلي نصيبهم بس الصنقيع
*يدافعوا بالنظر بس
*وإذا اجاد أسد الرأسيات
*الليلة بتوج نفسه هداف للبطولة
*عشان كدة بتوقع كواسي يركز على أطراف الملعب والعكسيات في حالة الهجوم
*ويركز على تقفيل المنطقة وعدم الاعتماد على (الأوف) في حالة الدفاع
*لأن مصيدة التسلل عادة تفشل إذا كان هجوم الخصم يتصف بالسرعة الجنونية
*مباراة ماهينة
*ولكن النصر حليفنا إن شاء الله
*وعلى قطرنا
*قطار الشوق لمنصات التتويج
*أن لايتوقف عن المسير
*والناس المسطحين ينزلوا يركبوا جوة
*ده مامظهر حضاري
*قطار المنتخب بشيل الجميع
*أها
*لجنتنا الجديدة لسة شغالة (سكتم بكتم) بضم السين والباء
*وهاهو أبوجا يعلن الانتماء لنادي البطولات الجوية
*شرف كبير لأبوجا وفرصة للتعطر بريحة المطار
*وبشوف أنه السبب الجاب لنا أبوجا برغم رغبة الجماعة في إعادته
*هو نفس السبب الجاب لنا هيثم مصطفى بعد سبعطاشر سنة ثانوي
*هيثم جاء المريخ بعد شهرين قابل بايرن ميونخ
*سبعطاشر سنة قاعد في نادي مقابل الصفر وضارب النوم
*ولو قعد في ناديه القديم لسة كان قابل ربو
*لذا كان أبوجا محقًا في قراره الأخير
*ولعله بعد العروض المقدمة له قد سأل
*المطار بي وين؟
*قالوا ليه المطار بي جاي
*فامسك بالقلم ووقع دون أن يسأل الصفر بي وين
*بالتوفيق يا كابتن
*المهم لجنتنا تعمل في سرية تامة
*برغم أن الحصريات خرجت علينا بمهاجم أفريقي وجناح ومدرب كبير عرك الملاعب الأفريقية
*سرك مافي بير ولا شنو يا زول؟؟؟؟؟
*أيها الناس
*الهلال يمضي بقوة لتجهيز وإعداد فريقه للموسم الأفريقي الجديد حيث يبدأ من التمهيدي
*ودي مرحلة متقدمة ومتطورة تحتاج لمجهود كبير من الأخوة الأهلة حتى يضمنوا المضي قدمًا بالمنافسة ثم يعودوا ليبدأوا من التمهيدي في العام الجديد
*ولكن بصراحة يا الحبيب محمد عبدالماجد
*السنة دي شايفكم خليتوا قصة أفريقيا يا هلال
*واستبدلتوها بسيكافا يا هلال
*ايوة كدة البدايات من الصفر يجب أن تكون منطقية ومتدرجة
*يعني أسى ولدك لو قلت ليهو عد
*قال ليك صفر سبعطاشر ستة وتلتين
*موش بتجيب ليه أستاذ خصوصي يعلموا العد
*صفر واحد اتنين تلاتة؟؟؟
*لذا
*من قال سيكافا يا هلال
*هو المدرس الخصوصي يا خالد عزالدين
*أسى يا خالد انت قاعد في أمريكا
*بتقول صفر سبعطاشر ستة وتلتين؟؟؟
*والله تقولها ترمب المتسبل ده يرجعك بسمبك
*وأنت ناقص سمبك؟؟؟
*ما كفاية صفركم أقصد سمبكم ده
*المهم
*اليوم لازم نتأهل للنهائي
*ده منتخب ما لعب
*يجيب القون روفا يجيبو أسد يجيبو بوغيا يجيبو كانتي يقشر بيهو روفا يجيبو الباك في روحه
*المهم السودان ينتصر ويتأهل
*بصرف النظر عن من يحرز الهدف لأن مع المنتخب بتذوب كل الألوان ويبقى علم السودان
*بالتوفيق (ولدنا) أبوجا
*وكامل الشفاء لود المصطفى فمكانه على كنبة المنتخب شاغرا
*أيها الناس
*ان تنصروا الله ينصركم
*أها
*نجي لي شمارات والي الخرتوم
*جد لينا يا والينا
*قالوا المجرمين الهمبتوا المعلمة في شارع الوادي قبضوهم لينا
*بس أوعة يكونوا لسة حييين يا والينا؟؟؟؟؟؟

سلك كهربا

ننساك كيف والكلب قال على قدر أهل العزم تأتي العزائم… خليكم أصحاب عزيمة بكبر طموحكم

والي لقاء

سلك