في السلك

*هي بقت على الكورة!
*وطن أدمن سماع كلمة معليش
*حتى صارت كلمة ثابتة في كل المناسبات كالمعايدة
*معليش معليش معليش ومعليش
*لما طموحنا قل وارتضينا بما يصيبنا بمنتهى الإيمان
*هكذا نحن صنعنا من وطننا حائط مبكى
*وطفقنا نتعبد بالنحيب ونتقرب بتقليب أكفنا لما صرنا إليه
*نضرب يدًا بيد
*تعبيرًا عن تاريخ أمة لا يشبه حاضرها وقطعًا لا مستقبل لها
*هي بقت على الكورة؟؟؟
*ما معليش وين وروني؟
*إذا مسكت التعليم معليش
*وإذا مسكت صحة البيئة معليش
*وإذا مسكت قيمة العملة وسعر الصرف معليش شديد
*فنحن من مجانية التعليم وإلزامية التعليم ومحو أمية التعليم
*تحولنا للتعليم الخاص بمناهج “اسكت بس”
*معليش
*لدرجة أن الطالب بالدراسات العليا إن قلت له اجلس القرفصاء
*يعتقد أنك تتحدث صيني
*وحيقول ليك: معليش ما فهمتك
*ومعليش مجانية العلاج
*ومعليش القطر
*ومعليش سودانير وخط هيثرو
*ومعليش الصمغ العربي الذي ننتج 80% من الإنتاج العالمي له
*وشاد ما فيها ولا شجرة هشاب
*وتعتبر تاني مصدر للصمغ العربي في العالم
*ومعليش عندنا حرس حدود بالمناسبة
*معليش شديد
*لأننا نستورد سلعًا تصنعها الأسر في دول أخرى وتعتبر من الصناعات الخفيفة تقوم بها الأسر المنتجة
*ونحن على مستوى الدولة ما قادرين نصنعها
*لو مرض لينا زول نجري بيهو مصر
*الوزير ذاته ما بكون عنده إجابة لو سألته عن قصوره غير كلمة “معليش”
*وطبعًا لا أعتقد أنه مر علينا وزير “ما قصر”
*دخلوا الوزارة بفكر في “التقصير”
*الناس دي كلها “قصرت” أشنع ما يكون
*تجار العملة الذين يخربون اقتصاد البلد في كل ثانية بــ”قصورهم” برضو
*هو الوزير ما يقصر؟؟؟
*ما يقصر كيف؟؟؟؟
*وأصبحت كلمة “معليش” هي المبرر لكل مقصر و”مقصر”
*الناس بتمشي لقدام
*ونحن راجعين لورا
*لأننا رفعنا شعار المسخرة “معليش”
*ومعليش يا سودان
*هي بقت على الكورة؟؟؟
*منتخبنا ما قصر بحسب المعطيات
*إعداد ناقص
*بلد ما فيها خطط ولا استراتيجيات
*ياخ ملعب واحد مطابق للمواصفات ما فيها
*والغريبة فيها مزارع خاصة لا تخلو من “قصور” كمان
*وبمناسبة “معليش” دي
*زمان قطعت لي نكتة من راسي ده
*قامت انتشرت
*الزمن داك فاكهة المريخ كان بلة جابر وموسي الزومة
*الناس ديل كانوا خالقين جو لطيف جدًا في التيم
*موسي مرات بتفلسف كده في اللعب
*أها عملت نكتة قلت فيها:
في كورة المريخ العجب لعبها بوش رجله لموسي وأخذ خانة
موسي “قلوزها” وطلعت تماس
موسي قال للعجب: سوري يا كابتن
تاني جات للعجب، شالها بالكعب ورجعها لموسي
موسي “طالت منو” وشالها الخصم
وقال للعجب: سوري يا كابتن
جات كورة عالية للعجب لعبها رأسية لموسي الذي “قلشها” براسه وشتتها الباك
وقال للعجب: سوري يا كابتن
جات كورة للعجب عمل مرجيحته العجيبة ديك ودخل لي جوة وأداها موسي لبره وأخذ خانة، لو وصلته الكورة كان انفرد بالمرمى
موسي ضربها موزة مشت للحارس وقال للعجب: سوري يا كابتن
العجب قال لموسي: إنت بتلعب معانا ليك كم سنة يا كابتن؟
موسي قال ليه: ستة سنين
العجب قال ليه: ستة سنين تعتذر يا موسي؟ خلينا نعتذر ليك مرة

*هذه النكتة القطعتها من راسي انتشرت بسرعة
*والسبب أن موسي الزومة كان محبوب جدًا عند الجماهير وعند زملاؤه
*وأظن الآن السودان زي العجب
*ونحن كلنا موسي
*والسودان قال لينا: 69 سنة تعتذروا؟؟ خلوني أعتذر ليكم أنا مرة واحدة
*شكرًا كواسي وكل الجهاز الفني والطبي والإداري
*شكرًا للاعبين فردًا فردًا حتى لبوغبا الذي أعياه النضال وأضاع هدف التأهل بسبب الإرهاق الناتج عن سوء الإعداد
*ومعليش يا سودان
*أيها الناس
*الأجانب ديل ماديين
*ما تأخروا ليهم رواتبهم
*بشيلوا شيكهم ويمشوا النيابة طوالي
*وببساطة بعد يختونا في الحراسة بقولوا: معليش يا مريخ
*وقباني حرام تذكرة سفره يقطعها من ماله الخاص
*ونحن حرام ما نصل لوفاق ينهي الصراع القانوني القائم
*ومن الكبائر أن نحلم بإنجاز ونحن نعترك
*عراك يفقدنا حتى كفاءات مريخية كانت ستضيف للكيان بسبب علمها وتمرسها وكفاءتها وتخصصها
*بسبب أنهم ما معانا
*أيها الناس
*إن تنصروا الله ينصركم
*أها
*نجي لي شمارات والي الخرطوم
*كان شفت يا والينا
*لو داير أحكم على بلد يا أخينا
*بشوف تكسيها ووضع شرطيها ورواتب معلميها
*وبشوف مناهجها الدراسية والمقرر علينا
*بعد داك بكون الحكم جاهز يا والينا
*قلت لي مسكننا والعالم من حولنا والخراب الفينا؟؟؟

سلك كهربا

ننساك كيف والكلب قال: أيام لاءات الخرطوم الثلاثة كان في ميمين الخرطوم الاتنين… مجانية التعليم ومجانية العلاج و(قصر) واحد وجمهوري…. أسي البلد اتملت “قصور” وبقي لو ما عندك ما تقرأ وما تتعالج وتموت ذاتو… البلد ما بتحب المفلسين ومعليش يا سودان

والي لقاء
سلك