بابكر سلك
للأسف فشل المنتخب في الحصول على برونزية المحليين،
وبرغم ذلك نرفع لهم القبعات،
وصفقة ليهم كمان،
ما كان بالإمكان أفضل مما كان،
استبسلوا وما قصروا طيلة المنافسات،
ولكن إعداد علوق الشدة خذلهم،
دخلوا الملعب بالأمس ورهق المباريات يبدو عليهم،
علي الطلاق حضرتها،
ولي هسي ما عارف روفا لاعب ولا ما لاعب،
لا نقسو عليهم،
اجتهدوا وأدوا فوق قدرتهم،
ونتمنى أن نأخذ ما تبقى لنا من منافسات مأخذ الجد،
علنا بل عسانا نخرج بتأهيل لكأس العالم،
يكون لنا مجرد شرف التواجد،
شكرًا صقور الجديان فردًا فردًا،
فنحن ممتنون لكم ومفتونون برشيكم ريشة ريشة،
لا نحمل بوغبا وزر الخسارة،
ولا نحمل أبوجا وزر التعادل،
فالأمور لا تؤخذ بالتجزئة،
لولا الضغط السنغالي ما أخطأ أبوجا،
ولولا انهيار معدل اللياقة ما حدث الضغط السنغالي،
ولولا الإرهاق ما كان فقدان التركيز،
ولولا فقدان التركيز ما أطاح بوغبا بالترجيحية الافتتاحية،
شكرًا مجددًا لكم،
ومن المعطيات وتحليلها نجد لكم كل العذر.
أها،
سيرة المدرب الصربي لافة مواقع التواصل الاجتماعي،
تصاحبها عاصفة من الرفض والنقد للجنة التسيير،
ولكن المنطق يقول إن لجنتنا تعمل لإعادة تأهيل أنقاض راقدة في واطات الله دي،
وعملها إلى الآن ينم عن نجاعة في تناول الملفات،
فقط يحتاجون منا للصبر،
نحن صبرنا على النمير لمن ديل!!!!!!
الناس ديل يا ناس،
دخلوا المسطرينة البيت،
والمسطرينة لما تدخل البيت ما بتمرق بالساهل،
كلما أنجزت عملًا،
يظهر قبح في مكان آخر ما كان ظاهر عند وجود القبح الاتصلح،
ما تعاكسوهم،
خلوا المسطرينة تشتغل وتاخد زمنها،
تراجع كل الحوائط المسوسة،
والمافي شنو والمعدوم شنو،
الجاز راقد،
أقصد الأسمنت والرملة،
والمعلم لو لقى الطلب الجاهزين،
بنجز الشغل بدري،
حبة صبر،
فالتعمير صعب ما زي التدمير الحصل،
خلوهم يجكوا جكتهم،
وإذا فشلوا لا قدر الله،
على الأقل بكونوا أنجزوا لينا حيطة في الخرابة الاستلموها،
شيلوا الصبر،
المريخ بين يوم وليلة ما برجع مريخ زمان،
داير صبر،
ونحن صبرنا على ديك ما نصبر على ديل؟؟؟؟؟
المهم،
لو مشكلة الكنغو أدت لاستبعاد أنديتها،
بختنا،
تبقى الظروف خدمتنا،
ويجب أن نستغل ذلك في المزيد من التأهيل والإعداد،
وعلى الإدارة القانونية الجديدة العمل في الملف ده،
ومخاطبة الكاف بالإشارة لقرار كاس وقرار كاف ذاته بتسمية الفرق في توقيت محدد،
ومطالبتهم بمعرفة خصمنا أو استبعاده عشان تبقى المذكرة دي وسيلة ضغط على الكاف ذاته،
ده شغل شلاقة قانونية ولداحة ما بوصوكم عليه،
وعشت يا مريخ.
أيها الناس،
إن تنصروا الله ينصركم.
أها،
نجي لي شمارات والي الخرطوم،
كان شفت يا والينا،
ظهر بعوض غريب علينا،
بعضي بي دربكين وبمص بي فراشة يا والينا،
نوع بنقل ملاريا لينا،
ونوع ما بنقل ملاريا يا والينا،
نوع بجيب الضنك يودينا،
ونوع ما بنقل ضنك لينا،
ونوع بنقل الكلام يا والينا،
وده النوع البخوف فينا.
سلك كهربا
ننساك كيف، والكلب قال بقيتوا تعاينوا للبعوضة معاينة الكلب للشحموطة.
وإلى لقاء،
سلك
