في السلك
*لو داير تعرف حال المريخ كيف
*عاين لي وش خالد عزالدين
*لو لقيت شنب الحبيب خالد زي شنب الزول الطالع من طاحونة
*والنضارة بتنصل من وشو
*وخشمو عريييض
*ونفسو قايم
*اطمئن طوالي على أن المريخ بخير
*بخير شديد
خالد ده بشم ريحة مطار المريخ بسرعة شديدة
عندو منها حساسية
بتقوم عليهو (الجيوب)
بعرفها كوييييس
وبعرف جميع عبواتها
بدءًا من سيكافا (ون) سبب وبداية الحساسية
مرورًا بسيكافا (تو)
دي كمان خلت خالد يبكي على الصحفي التنزاني المات الصباح والكورة كانت بالليل بعد الدفن
سيكافا (ثري) دي قصتها قصة
ده السبب الخلي خالد بايت جمب السفارة الأمريكية
وقدم طلب لجوء
قال حاسي بتفرقة (إنجازية)
وقال لما يجي ماشي في الشارع الناس بتنمروا عليهو وبصفروا ليهو
وبقولوا الصفر الصفر
وعمل شرط في طلب اللجوء
السفر يكون إن شاء الله بـ”فلاي بوكس”
بس ما يكون عبر المطار
المطار ده عندو منو حساسية وبهرد فشفاشو
لسه عطورنا البتسبب الحساسية لخالد ما كملت
عندنا عطر عمبر عربي أصيل اسمو (دبي)
ده قرب يكتل خالد لأنو وقتها كان ماخد تطعيم ضد مرض (لاراش)
وعطر (دبي) بهيج مرض لاراش شديد لو كنت أخدت حقنتين منو
والغريبة فيهن واحدة طعنت روحك براك
لسه لسه
عطورنا البتسبب الأذية لخالد ما كملت
عطر عربي
عطر العود اسمو (الشارقة)
ده شارق خالد لليوم
وبتاورو مرات كتيرة
لكن أكتر عطر أسس للحساسية والدونية وخلى خالد يهطرق ويهضرب وجايب ليهو الكحة والحكة (شفت الجناس ده كيف)
هو العطر الإفريقي المستخلص من أزهار استوائية إفريقية مميزة
عطر (مانديلا)
عطر مانديلا ده خلي خالد تلتين عمرو يهطرق ويهضرب
وتقوم عليهو الحساسية وتجيهو كحة وحكة الدونية (الدونية دي من الدون)
أيها الناس
الشاعر قال: إذا رأيت أنياب الليث بارزة فلا تظنن أن الليث يبتسم
أها كمان إذا رأيت هضربة خالد كترت فلا تظنن أن الجرح يلتئم
طوالي اعرف أن الجرح القديم تاور خالد واحتمال التتنوس وارد
يا خالد
الله يسألك لمن جيت تفارق الصفر وتمشي أمريكا
موش طعموك ضد الحمى الصفراء؟؟؟
شفت كيف!!!!!
الصفار ده لازم تتطعم ضدو
كان ما اتطعمت بتشتت يا حبيب
وما تضيّع وكتك في بلاد العم سام هضربة وهطرقة
في دكتور شاااطر اسمو (جوردون)
فاتح في العمارة ناصية شارع بروكلين في نيويورك
كشفو رخيييس عشرة دولار بس
الراجل ده أخصائي إزالة الكلف والنمش وحب (الشياب) والصفر
بالليزر كمان
والليزر ما بقدر على الصفر بتاعك ده يا خالد
وإذا دكتور جوردون وليزرو غلبهم
بحولك محلية نيويورك
عندهم بوكلينات بتحفر للصفر
وإذا فشلت البوكلينات
تواصل في العلاج
حقنة في الوريد كل يوم مباراة للمريخ
خمسة سيسي (جاز سهلسيكولين) لو ما لقيت (سليسكو سهلين) برضو بتشتغل
توديك وترتاح
أيها الناس
ناس خالد بقوا ماشين بجاز المصافي وهم في نص الوحل
وتاني جاز مافي
جاز تاني غنا بس
زحوا منو سيادو جو
واتطعمي
أيها الناس
تسجيلاتنا ما شاء الله ماشة زي السكين في التورتة
الليلة في الأفق
بكرة جوة الجك
وكتبت عن لاعب سوداني يلوح بالأفق أول حرفو (أبو)
ناس خالد دايرين يموتوا
ما تفهونا غلط يا خالد
نحنا قاصدين أبو عشرين
المهم
الكاف كان بقت هلالية
ما بتقدر تتجاوز قرار (كاس)
يبقى باركوا لنا التأهل
أول فريق في العالم يتأهل قبل بداية المنافسة
وده البخلي خالد بدل يطلع علينا (لايف) يطلع علينا (داي)
قلت لي نداي مرتو ابت تجي السودان؟؟؟؟؟
المهم
لجنة التسيير تقوم بواجباتها برغم ضيق الزمن بإجادة
تعالوا نساعدها بالصبر
الصبر المجاني ده
عشان تقدر تشوف شغلها
أول مرة أشوف لي رئيس شغال صامت
لما ينور معناها في مكالمة
بدون إزعاج
بدون حصريات بدون (عصريات)
والشغل بالجاز خلوا اليشتغل
أيها الناس
إن تنصروا الله ينصركم
أها
نجي لي شمارات والي الخرتوم
والينا
الأمطار التي من بها الله علينا
غسلت كل الدرن الفينا؟
ولا لسه محتاجين مطرتين تلاتة تبل الكدوب العشعش فينا؟
سلك كهربا
ننساك كيف والكلب عاين كده وقال…. تسقط تسقط الأمطار
وإلى لقاء
سلك
