ثم ضاع الأمس مني

بالأمس القريب خسرنا من السنغال

وبالأمس البعيد حلمنا بالمونديال

ثم ضاع الأمس مني

الأمس القريب والأمس البعيد

الاثنين ضاعن

رفعنا سقف طموحاتنا

وبقينا نفكر في مجموعتنا بكأس العالم بكون معانا فيها منو

وكعادة الجمل السوداني

شكروهوا برك

برك جملنا

وبدد أملنا

لم يبرك بالأمس

فالسنغال وبديارها قادرة على أن (تنيخ) جملنا

ولكن جملنا برك في ليبيا

حينما قابلنا جنوب السودان والسنغال

وفقدنا في المواجهتين أربعة نقاط كانت كفيلة بجعلنا على الصدارة برغم هزيمة الأمس

صدارة مشتركة مع الكونغو برغم انتصارها على جنوب السودان بالأمس

وتجعل السنغال ثالثًا في الترتيب بأربعة عشر نقطة برغم فوزها علينا بالأمس

ضاعت نقاطنا بليبيا لأنو الجمع والإعداد كان متأخرًا جدًا لتلك المباريات

وده إهمال وتقصير إداري ما بعدو إهمال ولا تقصير

وهكذا نحن

نفتقد لثقافة النهايات

لذا ينفد صبرنا ويبرك جملنا ويصفر قطرنا في النهايات

ياخ نحنا في المدرسة

الحصة الأخيرة من ربع الساعة الأولى زول بفهم حاجة تاني مافي

نقعد نكورك بيوووت بيوووت بيوووت

ياخ نحنا لو دخلنا الاستاد لي كورة

آخر ربع ساعة تلقي نص الاستاد ماشي على الأبواب وكاسر رقبته على الملعب يعاين

مارق وهو بتفرج

ياخ في السينما

أيام كان عندنا سينما

الفيلم هندي البطل غنيتو في حلقو لسة ما غناها

نقوم حيلنا ونمشي على الأبواب

نحنا كده

ثقافة نهايات ما عندنا

عشان كده بنغيب عن النهائيات

نفرط برانا ونجي نضرب يدًا بيد حسرة على إنجاز ضاع

أيها الناس

ضاع الأمس مني في ليبيا بفقدان أربعة نقاط على التوالي أمام جنوب السودان والسنغال

ولن نتحدث عن ضعف حراسة المرمى

لن نتحدث عن أبو عشرين وأبوجا

لأننا تحايلنا على قرار الاتحاد (شداد) بمنع ضم حراس مرمى أجانب

فقمنا بتجنيس مكسيم وجمال سالم ولعبنا الحضري بالحريات الستة ولا الأربعة ما عارف

طبيعي يصل مستوى الخانة عندنا ما نشهده الآن

أيها الناس

البقت بقت

نقاتل فيما تبقى من مباريات

ونستفيد من التجربة

وما نهبش الجهاز الفني

خلوه يواصل

عشان ما نبدأ من الصفر

أيها الناس

أول مرة أعرف سيكافا دورة ساي ما رسمية

أول مرة أعرف أنو الناس بتشارك في سيكافا لا لأجل البطولة ولكن لأجل الإعداد لبطولة

أول مرة أعرف أنو في سيكافا ممكن تجيب أي شافع بدون ضوابط وتلعبو

أول مرة أعرف أنو فترة المعايشة للشافع بتسمح بإشراكو في بطولة يعترف بها الكاف

والأهم من ده كوووولو

أول مرة أعرف ليه الهلال شارك حداشر مرة في سيكافا ولم يتشرف بمجرد لعب النهائي فيها

أيها الناس

إن تنصروا الله ينصركم

اها

نجي لي شمارات والي الخرطوم

تعرف يا والينا

عشان نتفكفك من الفينا

الناس لازم تغير سلوكها ومفاهيما

سلك كهربا

ننساك كيف والكلب قال لو خرفان بابونج كان عندها وعي ما كان تبعت الخروف أبو فقرة ووقعن البحر

وإلى لقاء

سلك