تشيفي ما تشيلي!!

محمد الطيب كبّور

عايزين الجد المرة دي انا ظنيت وبعض الظن إثم انو الهلال حايشيل سيكافا قولوا لي باا …. بصراحة من لحظة اعلان قائمة الأندية المشاركة وعدم مشاركة فطاحلة الإقليم أصحاب الكاسات والمسجلين في لوح التتويج في سيكافا ثم أبعاد الأندية من خارج الإقليم المعروفين كضيوف بطعموا بيهم المشاركات السابقة قلت أن في الأمر أن.

اها ظني من هنا مع كلام كثير حول تنظيم الهلال للبطولة ومع اعلان المجموعة الي جانب الجماعة ضمت الأهلي مدني وكتور جوبا ومقديشو الصومال وبعد دا انكشف الحال بالتلتله صعد الهلال وعمل ريمنتادا علي الجيش الرواندي هنا ظني زاد وبقيت منتظر الميعاد ولما الحكم صفر قلت أمكن انا ألماجيت والصفر وقف مازاد.

طوعوا ليهم القانون شركوا لاعب ما مسجل في الكشف وكمان قاصر وبعد دا فاصل كبير والصفر لسه مواصل رحلة صمود طويلة وصبر كبير من جماهير ظنت زي ظني دا انو الموضوع محسوم والمدح اشتغل ولحسوا كلامهم الزمان لمن كان بقولوا بطولة الجعانين سموها سيكافا القيافة وبقوا يتحدثوا عن كأس جوي وانكشف الألم المقيم مع الصفر الغليد.

سنغيدا ولا اسمه شنو دا طبعا حديث التكوين وما من أندية تنزانيا المعروفة لدينا ناس الشباب وسيمبا وعزام وبعد دا وراهم الطفأ النور منو واللذيذ في الموضوع انهم قاتلوا عشان التلفزة واعلامهم ” السواق ” بقي يتكلم عن لحظة التتويج عايزة توثيق ودا كأس خارجي.. خارجي بالخاء .. .. اها تشيفي ما تشيلي.

انتهت الرواية وخلصت الحكاية وللصفر بقية والقصة مستمرة وانكشف شعور الألم تجاه انجازات الزعيم وأخيرا اعترفوا بانو سيكافا قيافة بعد ان استعصي عليهم كاسه ونالوا الوصافة واهو انجاز كبير ليهم غير مسبوق فرغم انهم اكثر الأندية السودانية مشاركة في سيكافا الا انهم عجزوا تماما عن تحقيقها وأفضل مركز ليهم فيها كان الثالث وهذه النسخة حسنوا التصنيف باحتلال مركز الوصيف.

13 محترف ولهفة علي المحليين وخطف وفي النهاية غسيل وشطف من سينغيدا الفرقة العنيدة وهذا المشترك عليه ان يحاول مرة اخري لان النسخة دي ” تشيفي ما تشيلي ” وبس خلاص كدي كفاية وتستمر الحكاية صفر غليد الي ما لانهاية.

مجرد سؤال

لمتين يلازمك مر الشجن ؟؟