سماكم ضلمة

بابكر سلك

*طبعا اي فريق بفوز ببطولة قارية بخت نجمة علي التي شيرت بتاعو
*الكلام ده عالميا
*ما قطعتو من راسي
*عشان كدة نحنا اسي عندنا نجمة علي تي شيرتاتنا
*من تسعة وتمنين
*باريس جيرمان يادوبك خت نجمة
*ريال مدريد خاتي ليهو طاشر نجمة
*الاهلي القاهري خاتي ليهو قريب تلطاشر نجمة
*الزمالك تي شيرتو مرصع بالنجوم
*البارسا
*حتي الاسماعيلي والمقاولون العرب
*خاتين نجوم علي تي شيرتاتهم
*من حقهم
*وبي حقهم
*الترجي النجم وقورماهيا
*عندهم نجوم علي تي شيرتاتهم لانهم فازوا ببطولة او بطولات من بطولات الكاف
*كلو بطولة بي نجمة
*القصة مازينة ساي
*قانون الانجاز هو البديك النجمة
*النجمة دي ماكل من هب ودب بختها علي تي شيرتو
*عندنا شرط
*وشرطها الفوز ببطولة قارية
*يعني لو ختيت ليك نجمة علي تي شيرتك وانت ما مؤهل لذلك
*الناس بتضحك فيك
*الناس بتضحك في فريقك
*بسموك الفريق خلا
*لانك بتكون لابس ليك رتبة ماعندك ليها رقبة
*عشان كدة
*الناس السماها ضلمة (بضم الضاض واللام)
*حقو مايهبلوا روحهم ويعملوا ليهم نجمة علي سماء تي شيرتاتهم الزرقاء المظلمة
*سماكم ضلمة ياخ
*المهم
*قالوا عملوا تي شيرتات مكتوب عليها سيكفا 2025
*تمهيدا للاحتفال
*وقالوا اتصلوا بسلطات مطار بورتسودان عشان يفتحوا ليهم صالة كبار الزوار للاستقبال
*سلطات المطار قالت ليهم اول مرة اسمع لي بي زول قادم بي سفرية محلية بستقبلوهوا
*كبار الزوار والاستقبال دي بستقبلوا بيها الناس الجايين بسفريات دولية
*البجي بي سفرية محلية ده بتأبط شنطتو ويشوف ليهو تكسي ويفحط
*اظنكم عندكم حمي صفراء
*الحمي الصفراء دي بتكتلكم
*لانو جواها ضنك السنين متخفي
*خت نجمة كان تقدر
*علي الاقل تضوي سماكم الضلمة ده
*ويظل الفريق خلا فريق خلا
*طالما تي شيرتو يخلو من نجمة الكلية
*كلية الكاف
*ياخ قبل النهائي بيوم
*قالوا الكاس ماعجبهم
*مشوا جابوا كاس فخم تبرعوا به لسيكافا
*فشكرهم شاما وجدد لهم الشامة علي خديدهم السادة
*ناس سماها ضلمة
*وتتفاصح
*مشوا اشتروا كاس يليق بعظمة سيكافا (المجاعة)
*ذكروني قصة البت الاسمها فتحية
** الجوا ناس خطبوها
*لما مرقوا من ابوها
*سألت امها
*يمة الرجال ديل جوا لابوي لي شنو.؟
*امها قالت ليها يافتحية يابتي الرجال ديل جوا خطبوك لي ولدهم
*فتحية قالت لي امها كر علي يمة الليلة بخت ليك ليكم العشا منو؟
*لاقتكم شفقة زي دي؟
*اسي دي يسموها شفقة منو؟؟؟
*مافي داعي
*نسميها شفقة فتحية الخطبوها وشالت الفضية
*الفضية حقت امها
*ايها الناس
*يجب ان يعمل الاتحاد بجد علي تطوير كرة القدم في السودان
*ماممكن فرقنا كلها فريق خلا
*الا من رحم ربي
*فريق مؤهل بي دبورتو وخاتي النجمة بي حقو غيرنا مافي
*بسحرونا بالطريقة دي
*غايتو ياعليقي
*لو داير تخت نجمة علي تي شيرتاتكم
*ماتخجل
*ختها
*وطبعا لازم تختها فوق للهلال
*ويبقي شعاركم زي علم تركيا
*ونسميكم الاتراك
اخير ليكم من الفريق خلا
*ونجموا كلامي ده
*بي نجمة كان تقدر
*لكن بكلام الجيش
*بعد ده لو (لو يعني) عملتوا ليكم انجاز تستحقوا به نجمة
*وده ما اظن يحصل
*طالبوا بالترقية بالاقدمية
*بنقبل
*لكن
*حايسموكم ضابط صف ويدوكم
نجمة بالاقدمية
*مية سنة خدمة ياخ
*دي اقدم من الاقدمية ذاتها ياخ
*ويظل الفريق خلا فريق خلا
*يلفح ليهو نجمة من اعلامو ويقدل بيها
*بس عليك الله
*بوريك العفن ده كان تضربو
*ايها الناس
*الانفصال فصلنا سياسيا
*ولكنه لم يفصلنا شعبيا
*لذا
*(مافوكا) حاجة لو شجعنا الجاموس
*وصدقوني
*خالد بخيت كيسو مابطير
*كيس الخواجة خفيييييف
*وفرق الجاز بدت تغني كلو واحدة اغنية براها
*وطبعا الناس مستغربة في كورة الفريق خلا ليه تقيلة
*طبعا لأنو عربية الجاز دائما حركتها تقيلة
*ولما تفتح بلاقيها مطب
*وتبدأ تاني من الصفر
*تكون عربات البنزين وصلت
*قلت لي نجمة علي التي شيرت؟؟؟
*لو حابي الفكرة اسهل ليك تبقي مريخابي
*بدل تكون في وضع الانتظار قرن تاني من الزمان
*سماكم ضلمة
*ولا نجمة
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*مافي زول بقدر يخت نجمة علي تي شيرتو زيينا
*مادايرين تاني فريق خلا يا والينا
*نجمة رسمية من كلية حربية لي طالب حربي بي حقو زينة في زينة
*والعندو دي اليورينا

سلك كهربا

ننساك كيف والكلب قال كان خجلان تخت نجمة علي التي شيرت العب عريان وارسم بالجير علي صدرك زي لب…. ولب يا لب

والي لقاء