بابكر سلك
*زمااااان
*لما كنا صغار
*حبنا الأول كان الكورة
*بالنسبة لاهلنا الكره الاول هو الكورة
*كانوا شايفنها عدو النجاح
*وكل اسباب الفشل فيها
*لذا منعونا عن ممارستها الا خلسة او بين الحين والحين كحافز اذا انجزنا حاجة
*لذا كنا نمارسها بالدس
*ونتشطف بعد الدافوري ونحتحت التراب من هدومنا عشان مايعرفونا لعبنا كورة
*اي زول من تلك الاجيال بكون قالوا ليهو
*الكورة دي بتضيعك وتطلع زول ساي
*زملانك يبقوا دكاترة ومهندسين وانت تحوم عنقالي ساي
*مفلس واغبش وزول بحترمك مافي
*لانك بتكون مامتعلم
*غايتو الزول لما يصل الثانوي العام بلقي ليهو فرصة لممارسة الكرة دون رضاء الاهل
*وطبعا ده رأي متخلف
*الراحل علي قاقرين ومازدا ودكتور ابشر حسين ودكتور محمد الحافظ ودكتور كسلا وكابتن عصام عباس وكرار ابو علي وعمر النقي وكابتن مهندس احمد آدم عافية وغيرهم كثر
*كلهم جامعيين ومثقفين ومتعلمين بل كانوا اوائل دفعاتهم ونجوما كروية يشار اليها بالبنان
*وده دليل علي ظلم الاهل للكورة وللنشئ
*الزمن داك كان الزمان زين والشعر مغطي الاضنين
*ومافي اسرة كانت ماقادرة تعيش
*زول واااحد في البيت شغال
*بدور الحلة وبصرف البيت كلو
*ولما الظروف بدت تضغط
*والماديات بقت تشكل الحياة
*والكورة بقت بي قروش
*بعدما كانت تدفع حتي تلعب
*بقت تقبض عشان تلعب
*الاسر بقت لاتتشدد كثيرا في حكاية لعب الكورة دي
*وتحضرني قصة حكاها لي واحد صاحبي بطلها والد لاعب مريخي اقليمي
*سجلو المريخ ودفع كشكوش صاح
*والد اللاعب قبض الكشكوش
*اللاعب شال مايكفي لشراء اتنين بنطلون جينز وكم تي شيرت واستيريو
*اصلو الزمن داك افخم حاجة تشتريها بنطلون جينز وتي شيرت واستيريو
*لا كان في اتوز ولا فيرنا
*ولا كان في طموح ذاتو لاكتر من كدة
*صينية الغداء في القصور والعشوائيات وااااحدة
*طبيخ ومفروك وسلطة
*طرقات الكسرة زي الرصيف
*وكل طرقة فوق عليها نص عيشة
*وبطيخ وموز او كاستر
*العندو والماعندو دي كانت صينتو
*المهم
*اللاعب اشتري الجينز والتي شيرت وعطر فور سيفن اليفن
*والباقي مع الحاج
*الحاج من مكتب الاتحاد ومشي علي السوق
*اشتري عشرة كور
*كل الالوان والاحجام
*وجا البيت
*نادي الشفع كلهم
*اصلو ولدو الكبير سجلو المريخ الليلة
*نادي الصغار كلهم
*ورمي ليهم كل الكور وقال
*من الليلة كدي اسمع لي واحد ماشي المدرسة
*مادايرين ضياع زمن
*تلعبوا بالكور دي تضمنوا مستقبلكم
*ماداير زول يضيع زمنو في مدرسة وقراية ويجي يقبض بعد خرف ملاليم
*تخيل بس
*الكلام ده حصل قبل خريج الجامعة يسوق ركشة
*وقبل الطبيب عشان يصلح دخلو يقوم يسوق حافلة
*وقبلما الضابط الفي المعاش يعمل نقل طارئ ويرفع بي يدينو عفش الناس في الضهرية وضهرو واجعو
*بدري الكلام ده
*تخيل
*لو عمك والد اللاعب ده عايش لليوم
*وسمع بما يتقاضاه رولاندو ولا ميسي ولا يامال ود امس ده
*حايقول شنو لي شفعو؟؟؟؟
*لو عرف قيمة الجائزة الشالها ديمبلي عليكم الله لو بيتو جمب المدرسة مابرحل؟؟؟؟؟
*غايتو عفينا لي اهلنا المنعونا الكورة عشان نقرا
*لابقينا بروفات ولا صبحنا مليارديرات
*جهجهونا وجهجهوا رقبتهم معانا
*ومن اليوم داك
*بجي ماشي جمب وزارة التربية والتعليم عادي
*لكن لما اجي جمب وزارة الشباب والرياضة
*قلبي برفني ومرات ببكي
*أبكي بس
*قال الكورة ضياع زمن قال
*ايها الناس
*لو بعد ده كولو مصرين علي التعليم والمدارس
*افتحوا لينا مدارس سنية ندخل فيها اولادنا يمكن تضرب معانا بعد العمر ده
*ايها الناس
*ان تنصروا الله ينصركم
*اها
*نجي لي شمارات والي الخرتوم
*تعرف يا والينا
*طالما رسوم القراية استحالت علينا
*قفلوها وجففوها وكتروا من المدارس السنية يا والينا
*خلونا نعيش علي كرعين اولادنا قبل القيامة تجينا
*هي ماجات لي اسي يا والينا؟
سلك كهربا
ننساك كيف والكلب قال مدارس سنية الا جوة الناموسية
وإلى لقاء
سلك
