بابكر سلك
*نحنا شعب ما شاء الله ماااااهل
*لا نربط عملًا بزمن
*والزمن ذاتو لا يعني لنا شيئًا
*نحنا كدة
*والغريبة كان لقينا سبب نؤجل به أعمالنا
*لما كنا في المدرسة
*لو صبّت مطرة البلد كلها تأجِّز
*ولو مات زول في الحلة
*ده سبب كافي لغياب التلاميذ والموظفين الساكنين حي بيت البكا
*ولو قالوا ليك الموضوع الفلاني عندك فرصة فيهو لمدة أسبوع
*براك بتقول إييك أسبوع
*حلك لما يجي الأسبوع
*أسبوع كامل لا الأمير يموت لا البعير يموت لا الفقير يموت
*ياخ نحنا في رمضان
*بنركب الستائر يوم العيد الصباح
*يوم تلتين رمضان لو ما أذاعوا لينا العيد ما بننضف
*نحنا كدة
*نحن التأجيلات والتأويلات
*زماااان الحكومة قلنا ليها
*بالغتِ يا الحكومة
*إهمالك للنشاط الرياضي ده عملية شينة منك
*قامت أمنا الحكومة قالت لينا
*ده إهمال فوق راي ما إهمال ساي
*البلد في حرب
*حرب الجنوب تستنزف كل ميزانية الدولة
*لكن بعد تنتهي الحرب حا نهتم بالموضوع
*طيب والتعليم والمدارس يا أمنا الحكومة؟
*قالت بعد الحرب
*والعلاج والمستشفيات العامة يا ماما؟
*قالت بعد الحرب
*طيب البنيات الأساسية والكهرباء والموية والصرف الصحي والطرق وجمال المدينة والعاصمة القلتي حضارية يمة؟
*قالت كوووولو بعد الحرب
*وبعد الحرب
*انفصل الجنوب
*مات التعليم
*اندثر العلاج
*تم عرض المستشفيات العامة للبيع أو الإيجار طويل الأمد
*قطعت الكهرباء واختفت الموية وتناثرت الكوش وغابت عربات النفايات
*وكبرت الكوشة القاعدة تحت اللافتة المكتوب عليها العاصمة الحضارية
*هسي ربنا جاب لينا الحرب الجد جد
*فوجدنا ضالتنا
*سبب وشماعة لتأجيل أي التزام
*الزول الخاطب وطالت خطوبتو
*إذا سألتو خطيبتو عن زمن العرس
*بقول ليها بعد الحرب
*الطالبك دين إذا سألك حاتسدد دينك متين
*بعد الحرب
*تارك الصلاة لو قلت ليهو حاتصلي متين مع الموت البقي الفحك الفحك ده
*بعد الحرب
*حاتبقي زول متين؟
*بعد الحرب
*رمضان متين؟
*بعد الحرب
*يقطع الحرب ويقطع سنينها
*أفظع ما في هذه الحرب أننا جعلنا منها شماعة لكل إخفاقاتنا
*المهم
*أمس تناولت اهتمام الدول بكرة القدم وملاعبها الما بتشبه خراباتنا ومراحلها السنية بفئاتها العمرية المختلفة
*وكلو بمنافسات تديرها اتحادات الكرة بتلك الدول
*وضربت مثل بي مصر
*الليلة داير أتناول بقية المناشط الرياضية
*دوري طائرة ويد وسلة وسباحة وجمباز وتنس أرضي وتنس طاولة وإسكواش وألعاب الدفاع عن النفس وصالات وأحواض سباحة ومضمار حلا وحمار
*كل ذلك في كل الدول
*وخير مثال مصر القريبة دي
*ويظهر إنو برضو لو طلبنا يد السلة
*حاتقول لينا دايرة أقرأ
*وكذا اليد والطائرة والسباحة وألعاب الدفاع عن النفس
*ولو طلبنا يد كورة اليد
*أكيد لو سألتنا عن مواعيد العرس
*حانقول ليها بعد الحرب
*ياخ مرتك لو قلت ليها أدينا شاي حاتقول ليك بعد الحرب
*ولو مرتك قالت ليك دخل المرتبة دي من المطرة
*أكيد ردك حايكون
*بعد الحرب
*ياخ لو قلت لي زول جيب سفة
*حايقول ليك بعد الحرب
*أيها الناس
*يا ربي الجماعة السنة دي بدخلوا لوح الشرف الإفريقي ولا بعد الحرب؟؟؟
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا
*باعوض الملاريا والضنك وذبابة الكلازارا كتلتوهم يا أخينا
*ولا بعد الحرب يا والينا
سلك كهربا
ننساك كيف والكلب قال جا حرامي قلت لي ولدي قوم انبح فيهو قال لي بعد الحرب ورقد ناااااااام
وإلى لقاء
سلك
