كورتنا كدة

بابكر سلك

*زماااان
*بدري الكلام ده
*لما الانجليز دخلوا السودان
*قعدوا شوية ودخلوا لينا القطر
*ودخلوا لينا الكهربا
*ودخلوا لينا مدنية الحياة
*ودخلوا لينا الخدمة المدنية
*ودخلوا لينا ودخلوا لينا ودخلوا لينا
*دخلوا لينا حاجات كتيرة من ضمنها الكورة
*لما دخلوها لينا كان اسمها التيوة
*بعد داك مرقوا
*ونحنا وطنية مننا كدة
*قمنا بمحو جميع آثار الانجليز واثرهم وآثارهم
*ورينا ليك الخدمة المدنية كتاب
*مشروع الجزيرة وديناهوا بهناك لخبر كان
*اما السكة حديد
*فالقطر مابمشي
*وكان مشي مابمشي بعيد
*اما سودانير فبقت مضحكة الطير
*المهم سودنا اي شي
*وبمعني ادق بشتنا اي شي
*ولأن الكورة واحدة من آثار الانجليز
*فداهية تاخد الانجليز
*وريناها ليك الطفي النور منو
*غيرنا اسمها من التيوة للكرة السودانية
*مدرسة ياخ
*ذات خصائص وصفات ومميزات
*المدرسة السودانية
*زيها وزي المدرسة الالمانية والمدرسة البرازيلية والمدرسة الانجليزية
*كورتنا كدة
*تعصب فايت الحدود
*تعصب سالب لا موجب
*ان احطم الآخر هو افضل من ان اطور النادي الذي انتمي له
*وكعادة المع والضد
*انقسمنا في الغالب لكومين
*اصلو نحنا كدة
*اي شي نعمل منو اتنين ونتقسم حولهما
*لانسمح لتالت ولانعترف بالتالت
*تلاتة عندنا (كووووف)
*حتي الخرطوم تلاتة غيرناها للخرطوم الوطني
*تلاتة دي ما معانا
*المهم
*ورينا ليك الكورة كتاب
*ونحتشد علي المدرجات لايجمع بيننا الا التعصب
*وهاك يا طفيش
*الجمهور تشجيعو كلو اركبو اركبو
*والعقلاء يقولون ختوا الكورة واطة ياناس
*عشاق القانون يهتفون
*التحكيم فاشل التحكيم فاشل
*والتحكيم ماشغال بي زول
*يهتفوا يتخبتوا
*ماشغال بيهم الشغلة
*اما التدريب فحدث ولا حرج
*واقف علي الخط غير شيل شيل شيل
*اطلع اطلع اطلع
*ختوا في صدرك ماعندو حاجة لينا
*ولو جبنا مدرب اجنبي
*زول بسمع كلامو اكتر من الخمسة دقائق الاولي مافي
*اديهو شهرين بس
*اذا اطلقنا صافرات الاستهجان احتجاجا علي سوء الاداء
*براحة بقول لينا بتدوروا العواااااض!
*كورتنا كدة
*ويستمر اللت والعجن والخرمجة والركوب والشليت
*وتخسر الجماهير مالها وزمنها ومزاجها
*وتنتهي المباراة بالتعادل السلبي
*سلبية في اي شي
*ويبكي الفريقان
*لانو الدرون بنزلهما الاتنين
*وينفض السامر
*ايها الناس نحنا كدة
*نعتبر الرمادي من الالوان المبغوضة
*ولاندري جمال اللون الوسطي الذي يجمع الابيض والاسود في بهاء وجلال
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*الرمادي لاهو ابيض وسيييخ
*ولاهو اسود قاتم
*لون يتحمل كتاحة البلد والطين والمطر
*فهمتني يا والينا

سلك كهربا

ننساك كيف والكلب قال البياض خلوهوا للنوايا والسواد للشعور والديس البحاكي الليل

والي لقاء

سلك