بابكر سلك
*لا نختلف اطلاقا حول دور الاندية في النهوض بالمستوي الكروي للكرة
*وهو دور ايجابي وضروري
*وفي الاحوال المثالية قد تتخلي الاندية عن مصالحها الذاتية في سبيل النهوض بالكرة بالبلد
*ويكون ذلك باتباع خطط الاتحاد الكبير وانفاذ خارطة طريقه لانه الجهة المناط بها تطوير وتقدم المستوي الكروي بالبلاد
*طبعا ده في الدول التانية
*اما في دولتنا
*فان الامر يأتي معكوسا
*يعمل الاتحاد الكبير علي انفاذ خطط الاندية المحققة لمصالحها الذاتية حتي ولو كان في ذلك اضرارا بالتطور الكروي بالبلد
*واعمال خطط الاندية لو ما اتبلعت ليكم
*اسهلها ليكم بعبارة
*انفاذ خطة نادي واحد تحقيقا لمصالحه حتي ولو اضرت تلك المصالح الآنية بمستقبل الكرة بالبلاد
*(والبلاد كال حماد)
*فلايعقل ان تصدر لائحة بالسماح بقيد تلطاشر اجنبي مضافا اليهم خمسة بالتجنيس
*طمنطاشر خانة وطنية في كل نادي يتغول عليها الاجانب
*يعني الاجانب بغنوا لي لعيبتنا
*زحوا منو واقعدوا فراجة
*فتتدهور الاندية من حيث انتاج مواهب وطنية
*وتضيع المواهب علي الكنبة
*وينقطع دابر تواصل الاجيال
*واذا ظهرت موهبة وطنية
*فان عيوننا لن تعانقها الا وهي علي اعتاب الاعتزال جراء الجلوس علي الكنبة
*وتظهر لينا كموهبة بدون خبرات
*لان فرصة الاحتكاك واكتساب الخبرات الخاصة بها قد استحوذ عليها الطمنطاشر اجنبي المذكورين
*ايها الناس
*اول ادوار ومهام الاندية هو المشاركة الايجابية في عملية تطوير الكرة
*ويتم ذلك بمراقبة قرارات الاتحادات واتخاذ المواقف القوية ضد الطالح منها
*لذا نجد ان مجالس ادارات الاندية شريكة في هذا الوضع السيء بمواقفها السلبية واجماعها السكوتي
*فأن لم تغير مجالس ادارات الاندية عندنا واولها المريخ
*ان لم تغير من تلك المواقف السالبة
*ابشركم بوصول منشط كرة القدم بالبلد
*للدرك الذي انهارت اليه مناشط السلة والطائرة واليد وتنس الطاولة وتنس ناس ماجد طلعت فريد وسباحة كيجاب وممدوح وسارة جاد الله ومارثون ناس خليفة عمر والكشيف وكاكي
*لتظل كورتنا تكاكي دون ان ننال منها مثقال بيضة واحدة
*ووقتها سيغني لنا عبدالوهاب وردي
*(بطولة بتاع فنيلتك)!
*وبمناسبة بطولة بتاع فنيلتك
*عندنا نادي كثير الحلم بالبطولات القارية
*وفي كل موسم يكون نصيبه منها اغنية بطولة بتاع فنيلتك!
*سبعة وتمنين قالوا اننا لها
*فعادت طيارتهم والكابتن طيار مشغل ليهم في مسجل الطيارة اغنية بطولة بتاع فنيلتك
*ثم في اتنين وتسعين شغلوا ليهم نفس الاغنية لكن هذه المرة بامدرمان تحت قيادة مايسترو مغربي قاد الاوركسترا التي عزفت لحن الاغنية
*بطولة بتاع فنيلتك
*ثم تكرر اللحن عشرة مرات بسيكافا
*وتسعين مرة علي مر التاريخ
*حتي اضحت الاغنية نشيدا وطنيا لهم
*اسي في المجموعات دي
*ماتستبعدوا في مبارياتهم ان تعزف الموسيقي نشيد العلم النشيد الوطني لي جماعة كدة
*بطولة بتاع فنيلتك
*وبعدها يصافح الغربال وطمنطاشر اجنبي الخصم
*اسي قريب ده
*كتروا من اطلاق بوريهم (العفن)
*وطالعتنا مانشيتات
*سيكافا يا……
*واعدوا العدة
*قيل غيروا الكاس ذاتو
*قالوا داك مابليق بيهم
*مشوا اشتروا كاس اطول من شهر عشرة
*وسارت الامور كما يشتهون
*الشوط الاول
*وحتي منتصف الشوط التاني
*وهم يمنون النفس بالبطولة
*بس
*وجات ليك الكورة لي شامة
*جاهو بوغبا موه ليهو
*بوغبا رقد
*واعقبه اثنان من زملائه
*ورقدوا تضامنا مع بوغبا
*قام شامة كشحها لي فريد
*وهو يغني
*بطولة بتاع فنيلتك!
*محمد عبدالماجد
*غايتو العملها فيكم عبدالوهاب وردي كبيرة
*قلت لي الاميرة السمراء؟؟؟
*سمراء بتاعت فنيلتك!!!!
*ايها الناس
*نجموا العنوان اعلاه
*سنكرره قريبا
*واحفظوا الاغنية
*ايها الناس
*ان تنصروا الله ينصركم
*اها
*نجي لي شمارات والي الخرتوم
*تعرف يا والينا
*دايرين نبني دولة تليق بينا
*بس الخوف الشمات يغنوا لينا
*دولة بتاعت فنيلتك؟؟؟
*عشان كدة تعالوا سويا نخت ايديننا
*لا اقصاء ولا استغصاء يا والينا
سلك كهربا
ننساك كيف والكلب قال مرة جريو لاقاني قال لي (هو) قلت ليهو (هو) بتاع فنيلتك
وإلى لقاء
سلك
