بابكر سلك
*أشهر مقلبين مر بها بشة
*حصلو لي بشة حكاهم ليهو واحد صاحبو
*قام صحبو حكاهم لي
*المقلب الأول في اتنين وتسعين
*الزمن داك بشة يحكم قبضتو بقوة
*رئيس جديد وشديد ولضيض
*قاااعد في قصرو
*مشوا ليهو الجماعة
*يا بشة كأس افريقيا ده من ناحية حقنا مسألة زمن بس
*لازم تجي يا بشة ونتشرف بتسليمنا الكاس وتتشرف بي كاسنا كإنجاز في عهدك وعهد الثورة الظافرة
*وما تتنقلب تاني يا بشة وتخلي الشغلة لايدام
*ايدام لي الليلة قاشر بمانديلا المريخ
*لو ماجيت ايدام بقشر بي كاسنا
*وبشة صدق
*خلي شغلتو
*نسي ليك معاناة المواطن
*نسي ليك التغول علي الميادين داخل الاحياء وحولها
*نسي ليك قطعت الموية وهجران الكهربا لي لمبات البلد
*مشي ترزي الجيش
*فصل ليهو لبسة جديدة
*دبابيرها تسوي بق
*واتكل علي الله
*وجا الاستاد في موكب مهيب
*اربعين عربية قدامو
*وسارينات
*الموتر تمنية بستم
*والسايقين المواتر تقول سايقين حصين
*واقفين حيلهم وسايقين
*وريسين بيوتنا كانت مشغولة بتأمين سيادة الرئيس
*ريسين بيوتنا كلها ناس لابسين نضارات سوداء
*وواحدين خاتين قناصات
*ونحنا جاريين ورا الموكب نهتف
*عاش بشة
*وواحدين يهتفوا
*مايغشوك يابشة
*ونساء تزغرد (مستاجرات)
*اعلام السودان من حلفا لي نمولي
*الزمن داك لسة ما اكتشفوا القونات
*فكانت الاذاعة الداخلية تصدح باغاني الحماسة والحماشة
*بشة علي المقصورة ليقشر بالكاس
*والملك في المغرب منتظر الكاس
*والزمن يمضي
*الوكت الضيعو بشة اليوم داك
*لو شرب فيهو شاي لبن بزلابية مع عبدالرحيم كان اخير ليهو
*وشال بشة الكاس اداهو لي ناس الوداد
*ورجع
*رجع زعلان شديد
*قال لايدام انت ماجيت ليه؟
*ايدام قال ليهو انا مابمشي الا كي استلم كأس يا ريس
*والمثل قال موتر سوزوكي ولا احمر ولا اسلي
*لو داير كاس باري الاحمر ياريس
*ومن ديك بشة اخد موقف من الرياضة
*انتقم منها
*جاب ليها وزراء ماعارفين الكورة مدورة ولامربعة
*اعدم المناشط
*لاخلي ليك سلة لا طايرة ولا طلعت فريد ذاتو
*فركشها فركشة الجن
*وكلو من المغاربة ديل
*المهم
*بعد كم وعشرين سنة
*لما بشة قرب ينسي المقلب
*اتمقلب تاني
*جابوا ليهو فنيلة ميسي
*واتضح انو القصة مقلب كشف عن وهن دولتنا
*اي زول يغشها بكل ثقة
*وقالوا تحت تحت
*بعد الحدث داك
*جا واحد لي بشة
*بشة قال ليهو انت منو؟
*قال ليهو انا ميسي
*بشة قال ليهو ميسي منو؟
*ميسي بتاع فنيلتك
*المهم
*احرجتوا بشة يا محمد عبدالماجد
*ايها الناس
*الثورة ليست تغيير نظام او وضع رئيس بالحبس واستبداله بغيره
*الثورة هي تغيير سلوك ومفاهيم
*اذا ده حصل
*يبقي مبروك نجاح الثورة
*اما اذا ماحصل
*فعلي الثورة السلام
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*ان لم نغير السلوك الفينا
*بلدنا ماحاتبقي زينة
سلك كهربا
ننساك كيف والكلب قال الوعي هو مؤشر التغيير
وإلى لقاء
سلك
