بابكر سلك
*يا حليل عاطف القوز
*لما كان بطلق مسيرات
*العالم كلو ما كان سمع بالمسيرات
*ولن أنسى هدفو في الزبون
*كان الهدف التالت للمريخ في شباك الهلال
*الكورة كانت اتنين صفر لصالح المريخ
*وجات فاول بره الخط للمريخ
*وختوها لعاطف
*الجماعة جمهورهم في المدرجات عمل حيطة
*لما عاطف جا جاري على الكورة
*المدرجات كلها لبدت
*قلت ليكم مسيرة بس
*والحيطة رقدت
*كان حارسهم عوض حسب الرسول
*وطااااخ
*جوة خالص
*أصابت الهدف بدقة
*ماشة بإحداثيات
*والشكلة قامت
*كلو زول في الحيطة بقول للتاني انت متعاون
*انت رفعت الإحداثيات
*الغريبة الكورة جوة الشبكة
*الحكم قال ما قون
*مالك يا حكم؟
*قال الضربة غير مباشرة مفروض تتلعب باص
*نط عوض قال هبشتها
*طبعًا لو هبشها بتضيف ليهو
*لو شافها ساي بتضيف ليهو
*الجماعة قالوا ما هبشها
*وعوض قال هبشتها
*صراحتو دي دفع تمنها
*الصباح شطبوه قبل سيد اللبن يجي
*يا حليل ود القوز
*الكلام ده كلو ذكرني ليهو داودا
*أطلق مسيرة قلنا يمكن صدفة أو التصوير، ما تمام
*وكشح ليك واحدة تانية
*بإحداثيات دقيقة
*من سوق رواندا الكبير
*ذكرهم ليك حروباتهم قبل السلام الذي أنعم على رواندا بنهضة حضارية وتطور كبير
*ونحنا ذكرنا بعاطف القوز
*داودا القوز
*قولوا واحد
*غايتو في كورتنا ضد الجماعة
*بنلتي عديييل أخير ليهم من فاول بره الخط
*داودا القوز ده صعب
*وإحداثياتو في جيبو
*ونأمل أن نشاهد نجاحات لبقية الأجانب
*المهم
*خير ما قامت به اللجنة هو الإعداد لتأبين الرمز ود الياس بما يليق بالهرم الكبير
*نتمنى للجنة التوفيق في إخراج اليوم بقدر الطموحات
*وبالتوفيق لأي خطوة مريخية تعيد الزعيم لسابق عهده الريادي
*أيها الناس
*داودا القوز ده ما هين
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*الشوق والريد فاض بينا
*بالدرب الشايفنو انتهوا لينا
*نحنا خلاااااااس يا والينا
سلك كهربا
ننساك كيف والكلب قال كلو أول ليهو آخر وكل مقدر ببقي واقع وأي واقع ببقي ذكري
وإلى لقاء
سلك
