بابكر سلك
*توفق المنتخب في تخطي المنتخب اللبناني
*محمدة
*ولكن يجب أن لا تخدعنا الفرحة
*فمنتخب لبنان ليس من الأقوياء الذين نقيس عليهم مستوانا
*وليهم برضو ظروفهم الأسوأ من ظروفنا
*المهم تأهلنا
*ولكن السلبيات كتيرة
*الإيجابيات أيضًا موجودة ولكنها قليلة
*أهمها الحماس الذي أدى به المنتخب
*حماس مكتسب من المدرجات التي شكلت مرجلاً أدهش العجم والعرب
*نحن شعب يحب وطنه بجنون
*شعبٌ مجنونٌ بحب الوطن
*شعب يحب أن ينتصر
*اتنين بس
*يا نصر يا نصر
*لذا كانت الجالية السودانية بقطر مصدر فخرٍ لنا
*لم يبخلوا بشعار أو علم أو حلقوم شق جوفو الهتاف من القلب
*وقودنا بالملعب كان نابعًا من أسودنا على المدرجات
*ولن أنسى (أسداتنا)
*برضهن شرفن وشجعن وزغردن
*ومن الإيجابيات الشخصية القوية لبخيت خميس الذي حمل الشارة وتحمّل المسؤولية بجدارة
*ما كان كابتن مسكين وقنوع
*وره الحكم شعاع
*ودي شخصية افتقدتها الملاعب السودانية من حاملي الشارات
*جني وجن الكابتن الما شفت
*المهم تأهلنا لكن محتاجين شغل كتيييير
*المحيرني بنتعامل مع العكسيات زي المسيرات
*نلبد ونتجهجه نقرب نخفس جوه واطات الله دي
*عوووك يا كواسي
*عكسوك جوك جوك بكتلوك
*عالج لينا الحتة دي
*أما مدرب الحراس
*فحقو يشتغل معانا صاح
*معقولة ياخ
*مبروك السودان وهاردلك لبنان وكل الحسان
*إنتو ذاتو الكورة دايرين بيها شنو يا ناس لبنان
*المهم
*اليوم خاض الزعيم ثاني مبارياته بالدوري الرواندي
*كنا نتوقع تقدمًا أفضل في الأداء والانسجام
*مرحلة التجريب انتهت
*وسلة الأعذار بقت فاضية
*لكن داودا القوز لم يتحفنا بقوازية كدة
*أيها الناس
*إن تنصروا الله ينصركم
*أها
*نجي لي شمارات والي الخرطوم
*أها يا والينا
*خشمنا عندنا قافلينو بأيدينا
*نتفرج وشوف العين ما بكتل غزال يا والينا
سلك كهربا
ننساك كيف والكلب قال دخلتوا مجموعة أخير منها كان تطيروا
وإلى لقاء
سلك
