أحلام وأوهام

بابكر سلك

طبعًا نحنا ما بنفرّق بين الأمنيات والتوُّقَات
نحنا قاصد بيها نحنا ناس الكورة إن كانت عندنا كورة
مثلًا يكون منتخبنا لاعب ضد منتخب إسبانيا مثلًا
أمنياتنا لما تكون مجنونة بتكون هزيمة الإسبان
لكن ما ممكن يصل الأمر لدرجة توقّعاتنا تكون تخطّي المنتخب الإسباني
أمورنا عاطفية
ما بنعتمد على تحليل المعطيات بعلمية
تلقى المريخ مثلًا لاعب ضد البايرن
وصحفنا كلها تطلع بمانشيتات على شاكلة
جماهير البايرن تضع أياديها على قلوبها
الهلال مثلًا دخل مجموعة فيها معاهو الأهلي وصن داونز وبراميدز
وتلقى مانشيتاتهم
الأهلي وصن وبراميدز يتنافسون على البطاقة التانية
وسيكافا يا هلال
وتاني يوم تعود سيكافا بطولة مجاعة بعد ما كانت أمس بطولة الشبعانين
مانشيتات على شاكلة (بوريكم العفن ده عليكم الله كان تضربوه)
وبنفس الفهم خرج علينا البعض بأن الكاف الفاسدة أوقفت كلود عشان ما يلعب مباراتي صن داونز
كلود ده لعب سيكافتين ولا تلاتة وما جاب الترابة
وصن داونز خايف منو لدرجة يتآمر مع الكاف على إيقاف كلود
وكأن كلود لا يستحق الإيقاف
صن ده موش ياهو البغلب الهلال جوة استادو أربعة والشمس بره؟
ولا صن تاني؟؟؟؟
عشان كدة حقو نفرّق بين الأمنيات العاطفية والتوقعات القايمة على تحليل البيانات
وكلود لم يتم الحكم عليه بالإعدام
كلها تلاتة مباريات تشموهوا قدحة
وهو ذاتو يشم التنافس الأفريقي الموسم ده قدحة
لأنو لما العقوبة تنقضي
بلقي الهلال في الحتانة
أيها الناس إن تنصروا الله ينصركم
أها
نجي لي شمّارات والي الخرطوم
كان شفت يا والينا
وقفت كلود دخلت علينا
وزي وقفة العيد لبعضينا

سلك كهربا
ننساك كيف والكلب قال يعني كنتوا متوقعين الكاف يكرم كلود مثلًا…..

وإلى لقاء
سلك